Կացարանի հրդեհից 13 օր անց հայտնի չէ՝ ինչից են մահացել 15 զինծառայողները․ News.am

 News.am-ը գրել է․

Զինվորական կացարանում հրդեհից մահացած 15 ժամկետային զինծառայողների գործով երկրորդ սպային է մեղադրանք առաջադրվել՝ զորամասի կոմունալ շահագործման ծառայության պետ, զորամասի հակահրդեհային պաշտպանության եւ փրկարար աշխատանքների ծառայության պետը։ Դատախազությունը միայն նրա անվան եւ ազգանվան սկզբնատառերն է հրապարակում՝ մայոր Մ.Ս.։ Նա մեղադրվում է զինվորական պաշտոնեական անփութություն կատարելու մեջ, որն անզգուշությամբ առաջացրել է մարդու մահ։ Մայորն այսօր ձերբակալվել է։ Նրան կալանավորելու միջնորդություն է ներկայացվել դատարան։

Փաստորեն, 15 զինվորի կյանք խլած ողբերգական դեպքից 13 օր անց գործով դեռեւս երկու մեղադրյալ կա, երկուսն էլ կատարվածի հետ միայն անուղղակի առնչություն ունեն։

Ավելի վաղ կալանավորվել էր զորամասի թիկունքի պետը, որը նաեւ կոմունալ շահագործման ծառայության գծով հրամանատարի տեղակալ Գոռ Աղեկյանն էր։

Մինչդեռ կապիտան Եղիշե Հակոբյանը, որն ըստ պաշտոնական վարկածի, այս դեպքին ուղղակիորեն առնչվող անձն է եւ նրան է վերագրվում անզգուշությամբ հրդեհ առաջացնելը, դեռեւս որեւէ կարգավիճակ այս գործով չունի, նա մինչեւ այժմ նույնիսկ չի հարցաքննվել։ Եղիշե Հակոբյանը երկու ժամկետային զինծառայողների հետ շարունակում է բուժումը Այրվածքաբանության ազգային կենտրոնում։ Զինվորներից մեկը հենց առաջինը օրը տեղափոխվել էր հիվանդասենյակ, կենտրոնի փոխտնօրեն Կարինե Բաբայանի խոսքով՝ զինվորը այսօր կամ վաղը դուրս կգրվի հիվանդանոցից եւ կտեղափոխվի հոսպիտալ, իսկ կապիտանն ու մյուս զինվորը, որոնք ունեին շնչուղիների այրվածքներ, մի քանի օր առաջ են վերակենդանացման բաժանմունքից պալատ տեղափոխվել։

«Վերակենդանացման բաժանմունքից մի քանի օր առաջ հիվանդասենյակ տեղափոխված սպայի ու զինվորի առողջական վիճակը գնահատվում է միջին ծանրության, բուժումը շարունակվում է, հնարավոր է մյուս շաբաթ նրանց կատարենք պլաստիկա, այսինքն՝ մաշկալաթով փոխպատվաստում, մյուս զինվորը լավ է, գուցե նա տեղափոխվի հոսպիտալ»,– նշեց Այրվածքաբանության ազգային կենտրոնի փոխտնօրենը։

Դեպքի առնչությամբ 2 քրեական վարույթ է նախաձեռնվել, մեկը՝ շրջապատի համար առավել վտանգ ներկայացնող նյութերի հետ վարվելու կանոնները խախտելու, մյուսը՝ զինվորական պաշտոնեական անփութության հատկանիշներով։ Մինչեւ այս պահը հարցաքննվել է մոտ երկու տասնյակ մարդ։ Գրեթե բոլոր զոհված զինծառայողների հարազատները լրատվամիջոցների հետ զրույցում հայտարարել են, որ չեն հավատում պաշտոնական վարկածին, ըստ որի, կապիտանը անփութորեն բենզինը վառարանի մեջ լցնելու միջոցով հրդեհ է առաջացրել։ Նրանք վստահ են՝ իրենց որդիներին միտումնավոր են սպանել։ Նման ենթադրության համար հիմք են ծառայել օրինակ՝ որդիների հետ վերջին օրերի խոսակցությունները, որ զինվորները սպաների հետ խնդիրներ են ունեցել։ Այդուհանդերձ, պաշտոնական նախնական վարկածը չի փոխվել։ Մենք կապ հաստատեցինք մի քանի ծնողների հետ, որոնք ավելի վաղ տեսախցիկների առջեւ հայտնել էին այս տեղեկությունները, նրանք ասացին, որ մինչեւ օրս չեն հարցաքննվել։ Քննչական կոմիտեից փորձեցինք ճշտել, արդյոք որեւէ ծնող հարցաքննվել է, կառույցի մամուլի քարտուղարը միայն ասաց.

«Քրեական վարույթի շրջանակում զոհված զինծառայողների այն ծնողները, որոնք դիմել են, տուժող են ճանաչվել։ Որպես տուժող՝ նրանց հետ դատավարական ու քննչական գործողություններ են նախատեսվում եւ իրականացվում։ Տուժող են ճանաչվել նաեւ վնասվածքներ ստացած եւ բուժհաստատություններում գտնվող զինծառայողները, բացառությամբ կապիտանի, որի հետ համապատասխան քննչական գործողություններ դեռեւս չեն իրականացվել»։

Հրդեհի հետեւանքով զոհված Հայկ Կիրակոսյանի եւ Վոլոդյա Ներսիսյանի ծնողները տուժող չեն ճանաչվել։ 13 օրերի ընթացքում նրանք չեն դիմել նախաքննական մարմին, Քննչական կոմիտեից էլ նրանց հետ կապ չեն հաստատել։

Զոհված զինծառայողներից 8–ի ծնողները դիմել են փաստաբան Նորայր Նորիկյանին, որպեսզի նա ներգրավվի որպես տուժողի ներկայացուցիչ։ Այս 8 զինվորների ծնողներից որեւէ մեկը, փաստաբանի խոսքով՝ վարույթն իրականացնող մարմնի կողմից տուժող չեն ճանաչվել, նրանք չեն էլ հարցաքննվել։

«Մենք հիմա պատրաստում ենք համապատասխան դիմումները, որովհետեւ նոր Քրեադատավարական օրենսգրքի իրավակարգավորումներով, զոհված երեխաների մերձավորները կարող են ճանաչվել տուժող եւ ոչ թե տուժողի իրավահաջորդ՝ ինչպես նախկին Քրեադատավարական օրենսգրքի դեպքում էր։ Մեկ–երկու օր հետո այդ դիմումները մուտք կարվեն վարույթն իրականացնող մարմին։ Քրեադատավարական օրենսգրքով սահմանված կարգով, ամենայն հավանականությամբ, 15 զինծառայողների մերձավոր հարազատներից որեւէ մեկը կճանաչվի տուժող»,– ասաց փաստաբանը։

Ծնողների մոտ պաշտոնական վարկածը կասկածներ է հարուցում նաեւ այն պատճառով, որ զինվորները դիահերձարանում եղել են զինվորական հագուստով եւ կոշիկներով, ինչից ենթադրում են, որ նրանք չէին կարող քնած լինել։ Ոմանց կարծիքով՝ իրենց որդիներին թունավորել են, ապա հրդեհ կազմակերպել հետքերը թաքցնելու համար։ Այս առեղծվածի վրա լույս կարող էր սփռել դատաբժշկական փորձաքննությունը, որի արդյունքները նույնպես մինչեւ օրս հայտնի չեն։

Դեպքից անմիջապես հետո պաշտոններից ազատվեցին 2-րդ բանակային կորպուսի հրամանատարը եւ եւս 7 բարձրաստիճան զինվորականներ։ Այսօր հայտնի դարձավ, որ աշխատանքից ազատվել է նաեւ դասակի հրամանատար Տիգրան Մանասարյանը, որը դեպքից հետո լրագրողներին ասել էր, որ կացարանում բենզին չի եղել, ըստ էության, հերքելով նախնական վարկածը առաջինը հրապարակած Նիկոլ Փաշինյանին: Նա նաեւ ասել էր, որ կատարվածի համար մեղավոր են բոլորը՝ մինչեւ վարչապետ։ Հարցազրույց տալուց կարճ ժամանակ անց նա աշխատանքից ազատվել է։ Նա կասկածյալի կամ մեղադրյալի կարգավիճակ չունի, բայց հարցաքննվել է որպես վկա։