Չեխիայի նախկին վարչապետը վերադարձել է դատարան՝ պայքարելու խարդախության մեղադրանքների դեմ

Չեխ միլիարդատեր եւ Չեխիայի նախկին վարչապետ Անդրեյ Բաբիշը նախագահական ընտրությունների շեմին վերադարձել է դատարան, որպեսզի պայքարի խարդախության մեղադրանքների դեմ 2 մլն եվրո սուբսիդիաների հետ կապված, գրել է Reuters-ը։

Բաբիշը կարեւոր դեմք էր չեխական քաղաքականությունում վերջին տասնամյակում, սկզբում՝ որպես ֆինանսների ազդեցիկ նախարար, հետո՝ որպես վարչապետ, ինչից հետո ընդդիմադիր կուսակցությունները միավորվեցին, որպեսզի նրան տապալեն 2021թ. ընտրություններում՝ չնայած նրա ANO կուսակցությունը խորհրդարանում ստացել էր տեղերի մեծամասնությունը։

Այժմ, երբ նրա կուսակցությունն ընդդիմությունում է, 68-ամյա Բաբիշը ձգտում է զբաղեցնել նախագահի պաշտոնը եւ փոխարինել անցյալում իր դաշնակից Միլոշ Զեմանին, որի երկրորդ ժամկետն ավարտվում է մարտին։

Սակայն Բաբիշը, որն այժմ քիմիական, գյուղատնտեսական, սննդի Agrofert մեդիա-կոնգլոմերատի սեփականատերն է, վաղուց արդեն մեղադրվում է իր հսկայական բիզնես-կայսրության շահերի պատճառով։

Բաբիշի դատը կապված է այն մեղադրանքների հետ, որ նա անօրինական ճանապարհով օգտագործել է ԵՄ սուբսիդիան մինչեւ 2011թ. իր ANO կուսակցության ստեղծումը, Պրահայից ոչ հեռու «Արագիլի բույն» կոնֆերանս-սրահի կառուցման համար՝ թաքցնելով իր մասնակցությունը նախագծին։

Բաբիշը չի ընդունում մեղքը եւ քանիցս հերքել է մեղադրանքները քաղաքական նպատակներով։ Նա չի խոսել լրագրողների հետ չորեքշաբթի դատարան մտնելուց առաջ։

Անգամ եթե դատարանը Բաբիշին մեղավոր ճանաչի եւ, հնարավոր է, դատապարտի բանտարկության, նա կարող է բողոքարկել, եւ հնարավոր է, որ գործը դիտարկվի մինչեւ ընտրությունները։ Բայց դատավարությունը կարող է վանել մի քանի չկողմնորոշված ընտրողների նախագահական ընտրություններում, կարծում են դիտորդները։

Բաբիշը երկրում հարստությամբ հինգերորդ մարդն է Forbes-ի 2021թ. ցուցակով, ընտրությունների, որոնց առաջին փուլն սկսվելու է հունվարի 13-14-ին, ֆավորիտներից մեկը։

Հարցումները ցույց են տալիս, որ Բաբիշի, չեխական բնանակի նախկին գեներալ Պետր Պավլի եւ համալսարանի նախկին ռեկտոր Դանուսա Ներուդովայի շանսերը հավասար են երկրորդ փուլ դուրս գալու համար, որտեղ երկու լավագույն թեկնածուները կմրցեն հունվարի 27-28-ին։

Հարցումները ցույց են տալիս, որ Բաբիշը երկրորդ փուլում կպարտվի։

Սակայն Բաբիշի АНО կուսակցությունը շարունակում է առաջատարը լինել կուսակցական հարցումներում անգամ այն բանից հետո, երբ նրա ղեկավարը մեղադրվում է շահերի կոնֆլիկտի մեջ։

Եվրոպական հանձնաժողովը նրան մերկացրել է շահերի կոնֆլիկտի մեջ, քանի որ Agrofert ընկերությունը, որտեղ աշխատում է ավելի քան 30 000 մարդ, օգտվել է զարգացման սուբսիդիաներից, քանի դեռ նա կառավարությունում էր։

Ֆրանսիացի դատախազները եւս հետաքննել են Ֆրանսիայում նրա կողմից անշարժ գույքի ձեռքբերումը օֆշորային ընկերությունների միջոցով, գրել է Le Monde թերթը։ Նա հերքում է բոլոր իրավախախտումները։