Ուղիղ 40 օր՝ ինչ ասել են, 58 տարեկանում փորձել եմ կատարել, փորձել եմ առաջարկություններ անել, հուշել, բայց չեն ընդունվել. Սեյրան Օհանյան
Հայաստանի այսօրվա իշխանությունները գործում են ստեղծված ռազմաքաղաքական իրավիճակից դուրս, իրենց համար գերակայությունը ոչ թե սահմաններն են, անվտանգությունը, այլ իրենց համար գերակայություն է ընդհատակյա բանակցություններ վարելը թշնամու հետ, ինչ-որ պայմանավորվածությունների գալը, իրենց համար գերակա է Երևանում ասֆալտներին ոստիկանական զորքերը ուռճացնելը, գերակա է իրենց աթոռը պահելը, մեր սահմանները ամբողջությամբ աչքաթող են արել: Եռաբլուրում լրագրողների հետ զրույցում հայտարարել է «Հայաստան» խմբակցության ղեկավար Սեյրան Օհանյանը:
«Անգամ մենք ինքներս մեր սահմանին խրամատ չենք փորում, չեն գալու Միջին Ասիայից ու խրամատ փորեն, գոնե այդ խրամատները և պաշտպանական կառույցների ձևավորումը մեզ համար անհրաժեշտություն է եղել, որն այս իշխանությունը տապալել է»,-ասաց Օհանյանը:
Նա նաև պատմեց, որ 2018թ-ի իշխանափոխությունից հետո մի քանի անգամ ծառայություններ է առաջարկել Նիկոլ Փաշինյանին, ասել է, որ պատրաստ է անվտանգային հարցերով խորհուրդներ տալ՝ առանց որևէ ակնկալիքի, սակայն չեն ընդունվել իր առաջարկները.
«44-օրյա պատերազմի ժամանակ երկու օր անընդմեջ եղել եմ ՊՆ-ում, փորձել եմ հանդիպել ղեկավարության հետ, չեն ընդունել, ստիպված մեկնել եմ Արցախ, ուղիղ 40 օր՝ ինչ ասել են, 58-59 տարեկան հասակում ես փորձել եմ կատարել, փորձել եմ առաջարկություններ արել, հուշել եմ , որ մոբիլիզացիա պետք է հայտարարվի, բանակին թիկունք պետք է կանգնեն, տարբեր գործողությունների ժամանակ էլ հուշումներ եմ արել, բայց իմ առաջարկությունները չեն ընդունվել»,-ասաց Օհանյանը: