«Հրապարակ». «Ես կոչ եմ արել՝ որեւէ քվե չտալ ՔՊ-ին՝ պատժել մեր երկրի այսօրվա վիճակի համար»

«Հրապարակի» զրուցակիցն է «Ապրելու երկիր» կուսակցության նախագահ Մանե Թանդիլյանը։

Դուք նախապես հայտարարել էիք, որ ՔՊ-ի հետ ոչ մի պարագայում դաշինք չեք կազմի։ Ընտրությունների արդյունքում կան ՏԻՄ-եր, որտեղ դուք վճռորոշ ձայների քանակ ունեք, եւ ձեր կողմնորոշումից է կախված, թե ինչ համայնքային իշխանություն կձեւավորվի։ Օրինակ, Սիսիանում արդեն պա՞րզ է, թե որ քաղաքական ուժերի հետ դաշինք կկազմեք։

Սիսիանում այս պահին, նախնական տվյալներով, հինգ քաղաքական ուժ է մանդատ ստանալու, եւ քննարկումներ, բանակցություններ պիտի սկսվեն, որոնք դեռ չեն սկսվել։ Բայց մեզ համար նախկինում էլ, այս անգամ էլ կարմիր գիծ է «Քաղաքացիական պայմանագրին» ձայն տալը կամ ընտրելը, այսինքն՝ սա մեր կարմիր գիծն է։ Մնացածը, թե ով մեզ հետ կհամագործակցի, ինչ պայմաններով, ով կուզի ընտրել, ինչ առաջարկներ կլինեն՝ բնականաբար, սա ցույց կտա գործընթացը։ Բայց, կրկնում եմ, մենք ունենք կարմիր գծեր, եւ մնացած ուժերը տեղյակ են այդ կարմիր գծերից։

Մեր տեղեկություններով, Ալավերդիում Ձեր կուսակցական ընկերներին խնդրել եք, որպեսզի ՔՊ-ին խիստ չքննադատեն։ Եղե՞լ է արդյոք նման խոսակցություն Ձեր եւ «Ապրելու երկիր» կուսակցության անդամների միջեւ։

Դա ամբողջովին ստահոդ տեղեկություն է։ Ես խնդրում եմ նայել իմ ֆեյսբուքյան էջին կատարված գրառումը ընտրությունների նախորդ օրը՝ ընտրություններից առաջ, եւ Ձեզ համար ամեն բան պարզ կլինի, որ նման բան չի կարող լինել, դա չի կարող համապատասխանել իրականությանը, եւ չգիտեմ, թե ում կողմից է տարածվում։ Մեր թիմակիցներին ամեն ինչ պարզ է եղել, եւ ես, ինչպես տեսել եք, լռության նախորդ օրը հանդես եմ եկել հայտարարությամբ, հորդորելով, կոչ անելով՝ որեւէ քվե «Քաղաքացիական պայմանագրին» չտալ եւ համայնքներում պատժել ՔՊ-ին՝ մեր երկրի այսօրվա իրավիճակի համար, եւ այն, ինչ կատարվում է առհասարակ մեզ հետ։ Եվ ամեն ոք իր պատասխանատվության ու մեղքի բաժինը պիտի կրի ու տեսնի ընտրությունների ժամանակ։

Ալավերդիում «Քաղպայմանագիրն» ու Ձեր կուսակցությունը հավասար քանակով մանդատ են ստացել։ Արդեն որոշե՞լ եք, թե որ քաղաքական ուժերի հետ դաշինք կկազմեք։

Այստեղ, ըստ նախնական տվյալների, մեկ մանդատ ունի Հայ ազգային կոնգրեսը, եւ 13-ական մանդատ՝ մենք ու իշխող կուսակցությունը։ Պիտի քննարկենք, նորից եմ կրկնում՝ մեզ համար կան կարմիր գծեր, եւ մենք պիտի քննարկենք, զրուցենք ՀԱԿ-ի մեր գործընկերների հետ, որպեսզի կարողանանք արդարացիորեն ստանձնել Ալավերդի համայնքում կառավարման պատասխանատվությունը, որովհետեւ ե՛ւ ձայների քանակով ենք մենք առաջինը, թեպետ մանդատներով հավասար ենք, ե՛ւ թեկնածուն էլ, բնականաբար, արժանի թեկնածու է։ Հետեւաբար, մենք կքննարկենք եւ կփորձենք գալ համաձայնության՝ կտեսնենք, թե ինչպես կստացվի։

Այսինքն՝ ամեն ինչ կանե՞ք՝ ընդդիմադիր ուժերի հետ միավորվելու համար։

Մենք՝ որպես քաղաքական ուժ, այդպիսի դիրքավորում ունենք, եւ դա հայտնի է նաեւ բոլոր քաղաքական ուժերին, ում հետ մասնակցում ենք քննարկումների եւ ընտրություններին։ Հետեւաբար, այդ տեսանկյունից եւ այդ ծիրից են ընթանում մեր քննարկումները։

Որո՞նք են այն ամենահավանական թեկնածուները, որոնց հետ հնարավոր է դաշինք կազմել։

Հնարավոր չէ դա հիմա ասել, որովհետեւ մանդատների բաշխում եւ տարբեր քննարկումներ ներսում են ունենում դեռեւս տարբեր քաղաքական ուժեր, բայց մեզ համար, բնականաբար, որոշակի եզրեր արդեն պարզ են»:

Առավել մանրամասն՝ թերթի այսօրվա համարում