Բրիտանիայի թագուհու մահվանից հետո Անտիգուա եւ Բարբուդան կարող է երեք տարվա ընթացքում հանրապետություն դառնալ

Անտիգուա եւ Բարբուդայի վարչապետ Գաստոն Բրաունը հայտարարել է, որ Մեծ Բրիտանիայի թագուհի Եղիսաբեթ Երկրորդի մահվանից հետո երեք տարվա ընթացքում կարող է հանրաքվե նշանակել կառավարման հանրապետական ձեւի անցնելու վերաբերյալ, տեղեկացրել է PA Media-ն։

Կարիբյան երկիրը 14 պետություններից մեկն է, որոնց պետության ղեկավարը բրիտանական միապետն է։ Վարչապետ Գաստոն Բրաունը ստորագրել է փաստաթուղթ, որը հաստատում է Կառլի կարգավիճակը որպես նոր թագավոր։

Բայց մի քանի րոպե հետո նա ասել է, որ պնդելու է հանրաքվեի անցկացումն այն բանից հետո, երբ այս տարվա սկզբին Ուելսի դքսի ու դքսուհու այցի ժամանակ հայտարարել էր այդ քայլի անհրաժեշտության մասին։

«Դա թշնամանքի կամ Անտիգուա եւ Բարբուդայի ու միապետության միջեւ տարբերության որեւէ ակտ չէ, բայց վերջին քայլն է՝ փակելու համար անկախության այս շրջանակը, որպեսզի համոզվենք, որ մենք իսկապես ինքնիշխան ազգ ենք»,- ընդգծել է երկրի վարչապետը։

Նա ավելացրել է, որ իր երկիրը Համագործակցության հավատարիմ անդամ կմնա, անգամ եթե այն զրկվի միապետությունից հանրաքվեի արդյունքում։

Ապրիլին Բրաունը Ուելսի հերցոգներին կոչ էր արել օգտագործել իր «դիվանագիտական ազդեցությունը» «ռեպարացիոն արդարության» հասնելու համար եւ հայտարարել է, որ իր երկիրը ցանկանում է «հանրապետություն դառնալ»։

Գահի ներկա ժառանգներ Ուիլյամին եւ Քեյթին այդ ընթացքում մեղադրել էին Ջամայկայում գաղութատիրության ժամանակներին վերադառնալու մեջ. այդ ժամանակ՝ մարտին, նրանք մարդկանց ձեռքը սեղմում էին ցանցապատնեշի հետեւից եւ ամբոխի միջով անցան Land Rover-ի հետեւի նստարանին նստած, ինչպես դա արել էր թագուհին 60 տարի առաջ։

Ջամայկայի վարչապետ Էնդրյու Հոլնեսը Ուիլյամին եւ Քեյթին ասել էր, որ իր երկիրը կարող է դառնալ հաջորդ հանրապետությունը, իսկ Բելիզի նախարարը դրանից հետո հայտարարել էր, որ, գուցե, եկել է «իսկական անկախության հաջորդ քայլն անելու» ժամանակը։

Ուղեւորությունից հետո Ուիլյամը խոստովանել էր, որ միապետության օրերը Կարիբներում կարող են հաշվված լինել՝ ասելով, որ ապագան «պետք է որոշի ժողովուրդը»։