Ի՞նչ վտանգավոր բարդություններ կարող են առաջանալ կապիկի ծաղիկով վարակվելու հետեւանքով
Կապիկի ծաղիկով վարակված 31-ամյա տղամարդը սուր միոկարդիտ է ձեռք բերել կապիկի ծաղիկի ախտանշանների հայտնաբերումից մոտ մեկ շաբաթ հետո, նշվել է JACC: Case Reports ամսագրում հրապարակված հետազոտությունում։
Կապիկի ծաղիկն առաջանում է կապիկի ծաղիկի վիրուսից, որը պատկանում է այն նույն ընտանիքին, ինչ եւ ծաղիկ առաջացնող վիրուսը, որն առաջ է բերում բշտեր կամ ցան ձեռքերին, ոտքերին, դեմքին, սեռական օրգանների վրա եւ մարմնի այլ մասերում։ Կապիկի ծաղիկի մասին առաջին անգամ տեղեկացվել է Եվրամիությունում 2022թ. մայիսին, ինչպես նաեւ ԱՄՆ-ում եւ այլ ոչ էնդեմիկ երկրներում։ Հիվանդության դեպքերի թիվը շարունակում է ավելանալ։ Միոկարդիտը՝ սրտամկանի բորբոքումը, սովորաբար առաջանում է վիրուսային վարակից։
Պացիենտը դիմել էր պոլիկլինիկա կապիկի ծաղիկի ախտանշանների հայտնվելուց հինգ օր հետո։ Նա նաեւ տկարություն էր զգացել, ունեցել էր միալգիա, տենդ եւ բազմաթիվ բշտեր դեմքին, ձեռքերին եւ սեռական օրգանների վրա։ Կապիկի ծաղիկի առկայությունը հաստատվել է քսուքի նմուշի ՊՇՌ-ի օգնությամբ։ Պացիենտը երեք օր հետո վերադարձել է շտապօգնության բաժանմունք՝ տեղեկացնելով կրծքում ճնշվածության զգացման մասին, որը փոխանցվում էր ձախ ձեռքին։
Նա հոսպիտալացվել է ինտենսիվ թերապիայի բաժանմունքում՝ նախնական պլանային բուժզննումից հետո, սուր միոկարդիտի կլինիկական կասկածանքով։ Նախնական էլեկտրասրտագիրը ցույց է տվել սինուսային ռիթմ՝ փորոքների վերաբեւեռացման ոչ սպեցիֆիկ խախտումներով, իսկ սովորական լաբորատոր անալիզները պարզել են С-ռեակտիվ սպիտակուցի, կրեատինֆոսֆոկինազայի (ԿՖԿ), գերզգայուն տրոպոնին I-ի եւ ուղեղի նատրիյուրետիկ պեպտիդի բարձր մակարդակներ, որոնք կարող են մատնանշել սրտի սթրեսային ախտահարման մասին։ Սրտի մագնիսառեզոնանսային հետազոտության (ՄՌՏ) արդյունքները համապատասխանել են միոկարդի բորբոքմանը եւ սուր միոկարդիտ ախտորոշմանը։
Պացիենտը լրիվ ապաքինված դուրս է գրվել հիվանդանոցից մեկ շաբաթ հետո։ Հետազոտության հեղինակները հայտարարել են, որ անհրաժեշտ են հետագա հետազոտություններ՝ պարզելու համար կապիկի ծաղիկի եւ սրտի ախտահարման միջեւ փոխադարձ կապը։