Պետական հիմնարկներում հաստիքների ուռճացում է

Երբ Նիկոլ Փաշինյանը եկավ իշխանության, հրատապ քայլերից մեկը եղավ նախարարությունների թվի կրճատումը, 18-ը դարձրին 12։ Հիմնավորեցին, թե արդյունավետ չեն աշխատում, շարիկ գլորողներ են և այլն։ Սակայն դրանից հետո, երբ քաղաքական թիմը մեծացավ և աշխատանքով բոլորին պահովելու խնդիր առաջ եկավ, զուգահեռ քաղաքական գործընթացներն ու հետապնդումները նոր վարչությունների, առանձին միավորների ստեղծման խնդիր բերեցին, սկսվեց պետբյուջեից սնվող հաստիքներ ավեացումը։ Տարբեր կառույցներում բացվեցին վարչություններ, բաժիններ և այլն, նոր աշխատողներ ընդունվեցին։ Անգամ ունեցանք դեպքեր, երբ հանձնաժողովները բաժանում էին մասերի, որպեսզի աշխատանքով ապահովեն իրենց թիմակիցներին։

Մշտապես մամուլը բացահայտումներ է անում, թե ում ազգականը որտեղ է աշխատանքի անցել կամ ինչպես են տարբեր ՊՈԱԿ-ներ ու այլ հիմնարկներ լցված մի քանի պաշտոնյայի ազգուտակով։

Հաստիքների ուռճացումից խոսող այս իշխանության օրոք կառավարական ապարատը տրաքվում է հաստիքներից։

Միայն այսօր՝ օգոստոսի 4-ին, տեղի ունեցավ հետևյալը

- Քննչական կոմիտեին հատկացվեց 200 մլն դրամ։ Հիմնավորումն այն էր, որ քննչական կոմիտեի հաստիքներն ավելացել են 210-ով և պետք է աշխատավարձ տալ։
- Դատախազությանը հատկացվեց 25 մլն դրամից ավելի գումար, քանի որ դատախազության աշխատողների թիվն ավելացել է 20-ով և պետք է լրացուցիչ գույք գնել։
- Էկոնոմիկայի նախարարությունը հայտարարեց, որ գտնվում է կառուցվածքային փոփոխությունների գործընթացում, ներկայիս 13 հիմնական մասնագիտական կառուցվածքային ստորաբաժանումների փոխարեն սահմանվել են 21 հիմնական մասնագիտական կառուցվածքային ստորաբաժանումներ։ Ավելացել է 8 ստորաբաժանում և առկա 85 քաղաքացիական ծառայության թափուր և ժամանակավոր թափուր պաշտոնների թվաքանակը նախատեսվում է դարձնել 110։

Հիմա, Նիկոլ Փաշինյանի տրամաբանությամբ, մեր երկրում ավելանում է բյուջեի վրա նստած շարիկ գլորողների թիվը։ Չի բացառվում, որ այս ամենի անհրաժեշտությունը կա, սակայն հարցն այն է, թե ինչու էր բողոքում հաստիքներից Նիկոլ Փաշինյանը, եթե իր օրոք էլ ավելի է մեծացել պետական կառավարման ապարատը։

yerevan.today