Այսօրվանից իմ և «ՀայՓոստ»-ի համագործակցությունը կավարտվի․ «ՀայՓոստ»–ի տնօրեն

«ՀայՓոստ»-ի տնօրեն Հայկ Կարապետյանը հայտնել է, որ հուլիսի 25-ից ավարտում է իր համագործակցությունը «ՀայՓոստ»-ի հետ: «Արմենպրես»-ի հաղորդմամբ՝ Հայկ Կարապետյանն այս մասին հայտնել է «Ֆեյսբուք» սոցիալական ցանցի իր էջում:

««ՀայՓոստ»-ի թվային տրանսֆորմացիան իրականացնելու համար երկու տարի առաջ նշանակվեցի «ՀայՓոստ»-ի տնօրեն, և թիմիս հետ միասին իրականացրինք հսկայական փոփոխություններ ինչպես թվային տրանսֆորմացիայի, այնպես էլ կադրային, ֆինանսական, սակագնային, կոմերցիոն, սպասարկման, փոստփոխանակման արդիականացման և միջազգային ուղղություններով: 2020 թվականին ստեղծեցինք հնգամյա զարգացման ռազմավարություն, որը հավանություն ստացավ «ՀայՓոստ»-ի դիտորդ խորհրդի և ՀՀ կառավարության կողմից: Արդյունքում, կառուցեցինք «ՀայՓոստ»-ի էկոհամակարգը, ստեղծեցինք դուստր ձեռնարկություններ և գործարկեցինք բազմաթիվ պրոդուկտներ, ծառայություններ. iNovation, HayPost Retail, ՀայՓոստ Մեդ, Բեր-Բեր, Արմոտեկա և այլն: Կարծում եմ՝ իրավահավաստի փոստի գործարկմամբ տրանսֆորմացիայի այս փուլը հաջողությամբ ավարտեցինք, ուստի, այսօրվանից իմ և «ՀայՓոստ»-ի համագործակցությունը կավարտվի»,-նշել է Հայկ Կարապետյանը:

Նա շնորհակալություն է հայտնել մեծ վստահության և հնարավորության համար, որ ընձեռվել է իրեն, ինչպես նաև շնորհակալություն է հայտնել աշխատանքային թիմին 24/7 ռեժիմով վերջին 2 տարին աշխատելու համար: