Դանիայում 22-ամյա բնակիչը կրակ է բացել Կոպենհագենի Fieldʼs առևտրի կենտրոնում. զոհվել է 3 մարդ

Առնվազն 3 մարդ է զոհվել կիրակի՝ հուլիսի 3-ին, Դանիայի մայրաքաղաք Կոպենհագենի Fieldʼs առևտրի կենտրոնում տեղի ունեցած հրաձգության հետևանքով։ Ինչպես հայտնում է DR-ը, առևտրի կենտրոնում, որը գտնվում է Կոպենհագենի ծայրամասում, հարձակումն իրականացվել է տեղի ժամանակով 17:35-ին (Երևանի ժամանակով՝ 19:35-ին)։ Հրաձգությունն իրականացվել է առևտրի կենտրոնի երկու տարբեր հատվածներում։ Այդ պահին Fieldʼs-ում գտնվող մարդիկ սկսել են փախչել, թաքնվել խանութներում, զուգարաններում և պահեստներում։

BBC-ի փոխանցմամբ՝ Իզաբել անունով ականատեսներից մեկը լրատվամիջոցներին պատմել է. «Ինձ թվում է՝ ես լսեցի 10-ը կրակոց, իսկ հետո մենք վազեցինք առևտրի ողջ կենտրոնով և հայտնվեցինք փոքրիկ զուգարանում, որտեղ թաքնվել էր 11 մարդ։ Այնտեղ շատ շոգ էր, և մենք շատ էինք վախեցել։ Սարսափելի բան էր»։

Դանիական ոստիկանությունից հայտնել են, որ զոհերի թվում կա Ռուսաստանի 47-ամյա քաղաքացի, ինչպես նաև 17-ամյա մի տղա և աղջիկ, որոնք եղել են Դանիայի քաղաքացիներ։ Թե քանի մարդ է վիրավորվել, ոստիկանությունից չեն նշել։ Հայտնի է, որ չորս վիրավոր գտնվում է ծանր վիճակում։ Դրանք Դանիայի 19 և 40 տարեկան քաղաքացիներ են, ինչպես նաև Շվեդիայից 50-ամյա մի տղամարդ և 16-ամյա աղջիկ։ Բացի այդ, ևս մի քանի մարդ թեթև աստիճանի վիրավորում է ստացել առևտրի կենտրոնից փախչելու ժամանակ։

Դեպքի վայր ժամանած ոստիկանները 17:48-ին ձերբակալել են հրաձգության մեջ կասկածվողին, որն այդ պահին եղել է առևտրի կենտրոնի հարակից ավտոմայրուղու մոտ։ Կոպենհագենի ոստիկանության աշխատակից Սերեն Տոմասենը լրագրողներին հայտնել է, որ ձերբակալությունը եղել է «համեմատաբար ոչ դրամատիկ»։ Ոստիկանության տվյալներով՝ ձերբակալվածը 22-ամյա «էթնիկ դանիացի է», որի մասին ավելի վաղ իմացել են հոգեբույժները։ Տղամարդու ձեռքից վերցրել են հրացան և փամփուշտներ, ինչպես նաև դանակ։ Հետաքննիչները կարծում են, որ պոտենցիալ հանցագործը, հնարավոր է՝ միայնակ է գործել։

Հուլիսի 4-ին ձերբակալվածը դատարանում կհարցաքննվի։ Կոմիսար Տոմասենը պատմել է, որ հարձակման մոտիվն անհասկանալի է, ոստիկանությունը չի բացառում ահաբեկչության վարկածը։ Դեռևս նրա նկատմամբ պատրաստվում են մեղադրանք առաջադրել սպանության հատկանիշներով։ Ոստիկանությունում վստահ են, որ հանցագործությունը կապ չունի ռասիզմի կամ էլ գենդերային հարցերի հետ։

DR-ի աղբյուրները նշում են, որ ձերբակալված տղամարդը հրաձգությունից մի քանի օր առաջ սոցիալական ցանցերում զենքով տեսանյութեր է հրապարակել։ Ոստիկանությունից նշել են, որ դրանք հիմա ուսումնասիրվում են հետաքննիչների կողմից։ Տեսանյութերից մեկում երևում է հրացան և պահարան, որտեղ կան այլ զինատեսակներ։ Jyllands-Posten-ը գրում է, որ հուլիսի 1-ին YouTube-ում հայտնվել է չորս տեսանյութ, որտեղ, ենթադրաբար, երևում է առևտրի կենտրոնում հարձակում իրականացրած անձը։ Տեսանյութում, որտեղ նա ցույց է տալիս հրացանը և ատրճանակը, վերնագրված է որպես «I donʼt care» («Ինձ համար միևնույն է»)։ Եվս մեկ տեսանյութ կոչվում է «Quetiapine doesnʼt work» («Կվետիապինը չի աշխատում»)։ Դեռևս անհայտ է, թե արդյոք այս տեսանյութերը կապ ունեն հանցագործի հետ։

Դանիայի վարչապետ Մետե Ֆրեդերիկսեն ցավակցություն է հայտնել զոհվածների ընտանիքներին և դանիացիներին կոչ արել այս ծանր ժամանակաշրջանում աջակցել միմյանց։ «Կիրակի երեկոյան Դանիան ենթարկվել է դաժան հարձակման։ Մի քանի մարդ սպանվել է։ Էլ ավելի շատ վիրավորվել։ Անմեղ ընտանիքները գնումներ էին անում կամ ընթրում տնից դուրս։ Երեխաները, չափահասները և մեծերը։ Մեր գեղեցիկ և սովորաբար այդքան անվտանգ մայրաքաղաքը փոխվել է վայրկյանի ընթացքում»,- իր հայտարարության մեջ հայտարարել է Դանիայի վարչապետը։

Մարգրետե II թագուհին և թագաժառանգ Ֆրեդերիկը հայտարարել են «տուժածներին, նրանց հարազատներին և բոլոր նրանց խորը ցավակցության մասին, որոնց անդրադարձել է այդ ողբերգությունը»։ Հրաձգությունից անմիջապես հետո Դանիայի թագավորական ընտանիքը հայտարարել է, որ կչեղարկվի ընդունելությունը, որը կազմակերպվելու էր «Տուր դե Ֆրանսի» հեծանվավազքի երեք փուլերից առաջինի՝ Դանիայում կայանալու առթիվ։

Դանիայում վերջին խոշոր ահաբեկչությունը կայացել էր 2015 թվականի փետրվարի 14-ին։ Այդ ժամանակ հանցագործը կրակ էր բացել Կրուտենդեն մշակութային կենտրոնի սրճարանում, որտեղ ընթանում էր շվեդ ծաղրանկարիչ Լարս Վիլկսի հետ հանդիպումը։ Վերջինս հայտնի էր Մուհամեդ մարգարեի իր ծաղրանկարներով։ Նույն երեկոյան Կոպենհագենի սինագոգի մոտ տեղի էր ունեցել հրաձգություն։ Երկու հարձակումների հետևանքով զոհվել էր երկու մարդ, ևս վեց ոստիկան վիրավորվել։