Ի՞նչ ունեցվածք ունի Իշխան Սաղաթելյանը

ArmDaily.am-ը «Հայտարարագիր» շարքում այս անգամ կներկայացնի ՀՀ Ազգային ժողովի փոխխոսնակ, «Հայաստան» խմբակցության պատգամավոր Իշխան Սաղաթելյանի հայտարարագիրը։

Ո՞վ է Իշխան Սաղաթելյանը

Ծնվել է 1982թ. մայիսի 6-ին Գեղարքունիքի մարզի Գեղամավան գյուղում:

2003թ. ավարտել է ԵՊՀ միջազգային հարաբերությունների ֆակուլտետը: 2005թ.՝ նույն ֆակուլտետի մագիստրատուրան: 2008թ.՝ ՀՀ ԳԱԱ պատմության ինստիտուտի ասպիրանտուրան: Պատմական գիտությունների թեկնածու:

2008-2009թթ. եղել է Հայաստանի ազգային արխիվի գիտաշխատող, ԱԺ փոխնախագահի խորհրդական: 2009-2012թթ.՝ ԱԺ պատգամավորի օգնական: 2016-2018թթ.՝ ՀՀ բնապահպանության նախարարի խորհրդական: 2018թ. հունիս-սեպտեմբեր՝ ՀՀ Գեղարքունիքի մարզպետ: 2019-2021թթ.՝ «Նավասար» ՍՊԸ տնօրեն:

1999 թվականից ՀՅԴ անդամ է:

2018 թվականի հունիսի 1-ից մինչև նույն թվականի հոկտեմբերի 3-ը եղել է Գեղարքունիքի մարզպետ։ Պատմական գիտությունների թեկնածու է։

Համարվում է վարչապետ Նիկոլ Փաշինյանի ամենախիստ քննադատներից մեկը։ 2020 թվականի Հայ-ադրբեջանական պատերազմից հետո ստեղծված Հայրենիքի փրկության շարժման համակարգողն էր, 2020-2021 թվականներին ՀՓՇ կողմից կազմակերպված Նիկոլ Փաշինյանի հրաժարականի պահանջով բողոքի ցույցերի առաջնոդներից։ 2021 թվականի ապրիլի 25-ին Փաշինյանի հրաժարականից, սակայն ժամանակավոր պաշտոնակատար մնալուց հետո՝ հունիսի 20-ին նշանակվելիք արտահերթ ընտրությունների կապակցությամբ մայիսի 9-ին՝ Հայաստանի երկրորդ նախագահ Ռոբերտ Քոչարյանի և Վերածնվող Հայաստան կուսակցության նախագահ Վահե Ալբերտի Հակոբյանի հետ որպես ՀՅԴ ներկայացուցիչ հիմնադրում է Հայաստան դաշինքը։ Հունիսի 20-ին տեղի ունեցած խորհրդարանական ընտրությունների արդյունքում դաշինքը դառնում է երկրորդ ուժը խորհրդարանում։ Նույն տարվա օգոստոսի 2-ին Իշխան Սաղաթելյանը «Հայաստան» խմբակցության կողմից առաջադրվեց ԱԺ ընդդիմադիր փոխնախագահ, և օգոստոսի 6-ին ընտրվում է երրորդ փորձից։

Առաջնորդում է 2022 թվականի ապրիլի 5-ին սկսված Դիմադրության շարժումը, որի նպատակն է Նիկոլ Փաշինյանին իշխանությունից հեռացումը։

Ամուսնացած է, ունի 3 զավակ:

Ունեցվածքը

Սաղաթելյանը վերջին հայտարարագիրը ներկայացրել է 2022 թվականի մայիսի 31-ին։

Ըստ այդմ՝ նա հայտարարագրել է 2 բնակարան Երևանում, որոնցից մեկը Կենտրոնում, մյուսը՝ Արաբկիրում, 8 հողամաս Գեղարքունիքի մարզի Գեղամավան համայնքում, 2009 թ-ի արտադրության RANGE ROVER SPORT մակնիշի ավտոմեքենա։ Որպես թանկարժեք գույք նա հայտարարագրել է 8 մլն դրամ արժողությամբ մատանի։

Նա նշել է 15,200,000 ՀՀ դրամ փոխառություն «Նավասար» ՍՊԸ-ից, միաժամանակ, հայտարարագրել է նաև 2,656,547 ՀՀ դրամ և 4.04 ԱՄՆ դոլար դրամական միջոցները։

Սաղաթելյանը 2021-ի սկզբում ունեցել է 56,000,000 ՀՀ դրամ, 92,000 ԱՄՆ դոլար և 28,000 եվրո կանխիկ գումար, որը տարվա վերջում չի փոխվել։

Նախորդ տարվա ընթացքում ԱԺ նախկին փոխխոսնակը ունեցել է ընդհանուր 28,117,879 ՀՀ դրամ եկամուտ, որից աշխատանքի դիմաց վարձրատրություն ստացել է «ՆԱՎԱՍԱՐ» ՍՊԸ-ից 146,829 ՀՀ դրամ, ԱԺ-ից՝ 4,221,050 ՀՀ դրամ։ 8,500,000 ՀՀ դրամ նա ստացել է գույքի օտարումից։

Հաշվետու տարվա դեկտեմբերի 31-ի դրությամբ Սաղաթելյանի վարկերի և փոխառությունների մայր գումարի մնացորդը կազմել է 51,930,534 ՀՀ դրամ։ ԱԺ նախկին փոխխոսնակը 11,832,000 ՀՀ դրամ էլ եղել են վարկի մարմանն ուղղված վճարումները։