Ինչպե՞ս պատրաստվել երեխայի հետ հանգստի մեկնելուն․ խորհուրդներ մանկաբույժից

Մանկահասակ երեխաներ ունեցող ծնողները կփաստեն, որ հանգստի մեկնելիս իրենցից շատերի մոտ հարցեր են առաջանում, թե երեխայի հետ հանգստի մեկնելիս ինչ անհրաժեշտ իրեր պետք է վերցնեն իրենց հետ, ինչպիսի ստուգումների անհրաժեշտություն կա մինչև մեկնելը և այլն։ ArmDaily.am-ի հետ զրույցում մանկաբույժ Աննա Մխիթարյանը փորձել է պատասխանել ծնողներին հուզող մի շարք հարցերի։
Մանկաբույժն, անդրադառնալով անհրաժեշտ հագուստին, նշեց, որ հայ ծնողների մի մասն ունի կարծրատիպեր և կարծում է՝ եթե նույնիսկ ամառ է, երեխային պետք է տաք հագցնել, որպեսզի չմրսի։ Նման բան չկա, երեխաները ևս շոգում են ու, եթե դրսում 26֊ից բարձր ջերմաստիճան է, երեխան պետք է ևս թեթև հագուստ կրի։

«Շատերն ասում են, որ երեխան պետք է ծնողից մեկ շերտ ավել հագուստ կրի, բայց դա ամռանը չի վերաբերում։ Սակայն եթե երեխայի հետ հանգստի են մեկնում քաղաքից կամ երկրից դուրս, անպայմանորեն անհրաժեշտ է, որ ծնողները, երեխաների համար բացի բարակ, ամառային հագուսներից, նաև տաք հագուստ ունենան իրենց մոտ, քանի որ այլ վայրում հնարավոր է ջերմաստիճանի փոփոխություն լինի։ Ինչ վերաբերում է գլխարկներին, ապա պետք է նշեմ, որ դրա հետ կապված ևս որոշակի կարծատիպեր կան, որ ամռանը երեխային պետք չէ գլխարկ դնել․ ընդհակառակը անհրաժեշտ է աղջիկ երեխաների համար ունենալ պանամաների նման գլխարկներ, իսկ տղաների համար հովարավոր գլխարկ՝ նույն ինքը կեպի։ Երեխաներն անպայման պետք է գլխարկներ կրեն, քանի որ դրանք պաշտպանում են արևի ուղիղ, անմիջական ճառագայթներից։ Գլխարկները պետք է լինեն բարակ, շնչող կտորից»,-ընդգծեց Մխիթարյանը։

Մանկաբույժի խոսքով՝ ծնողները երեխաների համար անպայման պետք է ունենան արևապաշտպան քսուկներ՝ երեխաների մարմնի բաց հատվածներին քսելու նպատակով։ Ամեն դեպքում խորհուրդ է տրվում միշտ խուսափել արևի ուղիղ, անմիջական ճառագայթներից։ Ժամը 12։00-16։00-ը երեխային արևի տակ պետք չէ թողնել։
«Հանգստի մեկնելիս կարևոր է, որ ծնողներն իրենց հետ ունենան որոշակի դեղեր՝ հիմնականում ջերմիջեցնողներ, իբուպրոֆենի շարքի մանկական ջերմիջեցնող-ցավազրկողներից, փորկապության դեմ մոմիկներ, սիրոպներ, քանի որ վայրը փոխելով միգուցե երեխայի մոտ փորկապություն առաջանա,նաև քթի կաթիլներ, ինչու ոչ մոծակների դեմ օգտագործվող քսուկներ, գելեր և այլն», -ընդգծեց մեր զրուցակիցը։

Հարցին՝ արդյոք հանգստի մեկնելուց առաջ կա՞ն հստակ ստուգումներ, որոնք երեխաները պետք է անցնեն, մանակաբույժը պատասխանեց․ «Եթե երեխան առողջ է, ապա հանգստի մեկնելիս կամ երկրից դուրս գալիս որևէ կոնկրետ ստուգման անհրաժեշտություն չկա։ Երեխաներն ունեն իրենց օրացույցով կազմված այցերը, եթե այդ այցերն իրականացվում են հավուր պատշաճի, ապա դրանից դուրս հատուկ ստուգում անցնելու կարիք չկա»։

Մեր զրուցակցի խոսքով՝ կա ևս մեկ տարածված միֆ, որ նորածնային երեխաների հետ ինքնաթիռով երկար ճանապարհ գնալը չի խրախուսվում, սակայն տարիքային նման հակացուցում չկա։ Որոշակի հակացուցում կա միայն առաջին 40 օրվա հետ կապված, քանի որ երեխան ադապտացիայի շրջան է անցնում, ուստի այդ ժամանակ ինքնաթիռ նստելուց պետք է խուսափել, բայց դրանից հետո որևէ հակացուցում գոյություն չունի։ Եթե մանկաբույժն այցերի ընթացքում զննել է, տեսել է, որ երեխան առողջ է, ուրեմն որևէ խնդիր չկա։
«Եթե նորանծնային երեխաներին պետք է ինքնաթիռ նստեցնեն, խորհուրդ է տրվում, որ ծնողներն իրենց հետ ունենան ծծակ։ Մթնոլորտային ճնշման տատանումից, երբ ինքնաթիռը բարձրանում է, երեխաները հիմնականում իրենց վատ են զգում՝ ինչպես ժողովուրդն է ասում «ականջները» փակվում են, դրա համար կարողն են ծծակը տալ, որպեսզի «ականջները» բացվեն ու երեխան անհանգիստ չլինի։ Մի փոքր արդեն ավելի մեծ տարիքի երեխաներին կարելի է մաստակ առաջարկել՝ էլի նույն խնդրից խուսափելու համար»,- ամփոփեց մանկաբույժը։