Ապարանի դժբախտ պատահարը բերել ու կապել քաղաքական գործընթացների հետ՝ անբարոյականություն է. Արթուր Հովհաննիսյան

«Քաղաքացիական պայմանագիր» խմբակցության քարտուղար Արթուր Հովհաննիսյանը վստահեցնում՝ Նիգավանում տեղի ունեցած ողբերգական միջադեպը քաղաքական ենթատեքստ չունի։

ԱԺ-ում լրագրողների հետ զրույցում անդրադառնալով մամուլի տեղեկություններին, թե ՔՊ պատգամավոր Մաթևոս Ասատրյանի հարազատները և ՔՊ Արագածոտնի փոխմարզպետ Էդգար Փարվանյանի հորեղբոր որդին են վիճաբանել Նիկոլ Փաշինյանին հայհոյած ապարանցի մի խումբ երիտասարդների հետ, ինչի հետեւանքով հնչել են կրակոցներ եւ կան զոհեր, Արթուր Հովհաննիսյանն ասաց. «Դա մամուլը չի գրում, խոսում են մի քանի ընդդիմադիր պատգամավորներ եւ նրանց հետ փոխկապակցված անձինք, որոնք էլի զբաղվում են դժբախտության եւ ողբերգության կապիտալիզացիայով, ինչը միշտ արել են՝ ցանկացած դժբախտ պատահար, որ տեղի կունենա այս երկրում, բերել ու կապել քաղաքական գործընթացների հետ: Ներողություն, բայց դա առնվազն անբարոյականություն է:

Իմ գործընկեր Մաթեւոս Ասատրյանը անմիջապես հանդես է եկել հայտարարությամբ, երբ իրար հերթ չտալով վերցրել էին մի դեռեւս չճշտված, դեռեւս կիսատ մի տեղեկատվություն ու միանգամից փաթեթավորել էին որպես քաղաքական երանգ ունեցող միջադեպ: Կրկնում եմ՝ պարոն Ասատրյանը հերքել է այդ ամենը եւ հավելելու բան չկա: Ոստիկանությունը հայտարարություն է տարածե; դեպքի մանրամասների վերաբերյալ: Կարծում եմ՝ մեր հասարակության համար այս պահի դրությամբ բաց հարցեր չկան առնվազն այն մասով, որ այս միջադեպը որեւէ կերպ քաղաքական ենթատեքստ չունի: Իսկ դրան հաջորդող կամ զուգահեռ տեղի ունեցող իրադարձություններն ուղղակի աբսուրդի ժանրից են: Երեկ «Քաղաքացիական պայմանագիր» կուսակցության գրասենյակի մոտ տեղի ունեցածն էլ էր աբսուրդի ժանրից, ընդդիմադիր պատգամավորների մեկնաբանություններն են աբսուրդ, որ փորձում են հավասարության նշան դնել մեր ու իրենց քաղաքական հայրերի միջև, ինչը չի ստացվելու: Այդ մարդկանց կառավարման տարիներին մեր երկրում եղել է »Մարտի 1», «Հոկտեմբերի 27», Պապլավոկի դեպք, մի շարք այլ դեպքեր, ըննտրական գործընթացներին նախորդող եւ հաջորդող բազմաթիվ դեպքեր, որոնց մեր հանրությունը շատ լավ տեսել է եւ գիտի՝ ով ով է: Բնավ չի հաջողվելու մոլորեցնել մեր հանրությանը մեդիա փուչիկների միջոցով, այն էլ անորակ»,-ասաց ՔՊ-ական պատգամավորը:

Ավելի վաղ հայտնել էինք, որ ըստ ոստիկանության հաղորդագրության, հունիսի 19-ին' ժամը 19.45-ի սահմաններում, Արագածոտնի մարզի Նիգավան գյուղում մի խումբ անձանց մասնակցությամբ միջադեպ է տեղի ունեցել։ Այդ ընթացքում հնչել են կրակոցներ, նախնական տվյալներով' գործադրվել է որսորդական հրացան: Տուժած վեց տղամարդիկ տեղափոխվել են տարբեր բժշկական կենտրոններ: Նրանցից մեկը մահացել է: Դեպքի առթիվ քրեական գործ է հարուցվել, որի շրջանակներում ձեռնարկվում են օպերատիվ-հետախուզական ծավալուն միջոցառումներ: Տեղեկացնում ենք, որ միջադեպը քաղաքական ենթատեքստ չի պարունակում, ավելին' պատճառը կենցաղային է»:

Ավելի ուշ հայտնի դարձավ, որ եւս մեկը մահացել է:

politik.am կայքի տեղեկություններով Արագածոտնի մարզում ՔՊ-ականների հարազատները կրակել են երիտասարդների վրա, քանի որ նրանք հայհոյել են Նիկոլ Փաշինյանին։ ՔՊ պատգամավոր Մաթևոս Ասատրյանի հարազատները և ՔՊ Արագածոտնի փոխմարզպետ Էդգար Փարվանյանի հորեղբոր որդին վիճաբանել են ապարանցի մի խումբ երիտասարդների հետ, ինչի հետեւանքով վերոնշյալ մարդիկ (Մաթոսի և Էդգարի բարեկամներն ու ընկերները) կալաշնիկովով կրակել են երիտասարդների վրա, այս պահին կա մեկ զոհ և մի քանի վիրավորներ տարբեր բարդության։ Դեպքը տեղի է ունեցել Ապարանի Նիգավան միջնահատվածում։

Ավելի ուշ ՔԿ-ն հայտնեց, որ պատճառը եղել է ավտոմեքենայի ազդանշան տալը:

Ապարանում երկու անձի սպանության կասկածանքով 32-ամյա տղամարդ է ձերբակալվել: