Ղազախստանի նախագահը Պուտինի ներկայությամբ հրաժարվել է ճանաչել Դոնեցկի ու Լուգանսկի անկախությունը
Ղազախստանի նախագահ Կասիմ-Ժոմարտ Տոկաևը, հանդես գալով Պետերբուրգի միջազգային տնտեսական ֆորումի ժամանակ, Դոնեցկի ու Լուգանսկի ինքնահռչակ ժողովրդական հանրապետություններն անվանել է քվազիպետական տարածքներ։ Տոկաևի խոսքով՝ Ղազախստանը չի ճանաչում նրանց անկախությունը։
Տոկաևն այդ մասին հայտարարել է Ռուսաստանի նախագահ Վլադիմիր Պուտինի ներկայությամբ, որը դեռ Ուկրաինա Ռուսաստանի ներխուժումից առաջ, ճանաչել էր դրանց անկախությունը։ Ընդ որում, Տոկաևը նման կարծիք հայտնել է համապատասխան հարցին պատասխանելու ժամանակ։
Տոկաևի խոսքով՝ Ղազախստանում ստեղծվել է բաց հասարակություն, որը տարբեր կարծիքներ ունի Ուկրաինայում Ռուսաստանի «հատուկ գործողության» վերաբերյալ։ Ղազախստանի նախագահը նշել է, որ աշխարհում գոյություն ունեն միմյանց հակասող երկու սկզբունքներ՝ պետությունների տարածքային ամբողջականությունն ու ազգերի ինքնորոշման իրավունքը։
Տոկաևի խոսքով, եթե ինքնորոշման ձգտեն շատ ազգեր, ապա աշխարհում ավելի քան 500-600 պետություն կլինի, իսկ այդ դեպքում «կլինի քաոս»։ Ղազախստանի նախագահը նաև ընդգծել է, որ իրենք չեն ճանաչում ո՛չ Թայվանի, ո՛չ Կոսովոյի, ո՛չ Աբխազիայի և ո՛չ էլ Հարավային Օսիայի անկախությունը։