«Աղցաններից մի քիչ համ էր գալիս, իսկ միսը նորմալ եփված չէր, արյուն կար մեջը. Գլխապտույտ, ուժեղ սրտխառնոց առաջացավ». ավարտական խնջույքից հետո շրջանավարտները թունավորումով հայտնվել են հիվանդանոցում

Ռուբիկ Հարությունյանի անվան Աբովյանի բժշկական կենտրոնում թունավորում ախտորոշմամբ հոսպիտալացված շրջանավարտների ու ծնողների թիվը 16–ն է։ Այս մասին ասել են Աբովյանի ԲԿ–ից։

Աբովյանի հիվանդանոցում կեսօրի դրությամբ թունավորումով հոսպիտալացված պացիենտները 14–ին էին, սակայն նրանց թիվը ավելացել է եւս երկուսով։ Հոսպիտալացվածներից 7–ը 9–րդ դասարանի շրջանավարտներ են, իսկ 9–ը՝ ծնողներ։ Նրանք հոսպիտալացվել են տարբեր օրերի։

Թամարա Յայլոյանը առաջինն է հիվանդանոց տեղափոխվել՝ հունիսի 5–ին։ Նրա ինքնազգացողությունը վատացել է հունիսի 3–ի ավարտական խնջույքից մեկ օր անց, իսկ հիվանդանոց է տեղափոխվել հաջորդ օրը։

Բյուրեղավանի հիմնական դպրոցի 9–ի Բ դասարանի շրջանավարտները, նրանց ծնողներն ու ուսուցիչները Երևան–Սևան մայրուղու վրա գտնվող «Նարեկ+» ռեստորանում էին խնջույքն անցկացրել։ Թամարան պատմել է, որ ռեստորանում կերել է «Մայրաքաղաքային» աղցան, խորոված, ֆրի ու տարբեր տեսակի երշիկ։

«Աղցաններից մի քիչ համ էր գալիս, իսկ միսը նորմալ եփված չէր, արյուն կար մեջը: Հաջորդ օրը զգացի, որ որովայնի հատվածում ցավեր կան, գլխապտույտ ու շատ ուժեղ սրտխառնոց առաջացավ մոտս։ Այսօր էլ ինձ լավ չեմ զգում, թուլություն ունեմ, որովայնիս հատվածում ցավեր կան»,– ասել է Թամարա Յայլոյանը։

Նույն ախտանշաններն են Աբովյանի բժշկական կենտրոնում բուժում ստացող՝ խնջույքի մյուս մասնակիցների մոտ։ Ախտանշանները բոլորի մոտ միաժամանակ չեն ի հայտ եկել։ Բոլորի առողջական վիճակը գնահատվում է միջին ծանրության։

«Հունիսի 5–ին, օրվա երկրորդ կեսից մի քանի դեպք եղավ, սկզբից եկավ Թամարան, նրա գանգատները ավելի շատ բնորոշ էին սուր աղիքային վարակի, նա ախտորոշվեց ու հոսպիտալացվեց։ Իսկ երբ եկան մյուս պացիենտները, հարցրինք, թե ինչ են կերել, խմել, ու նկատեցինք, որ բոլորն էլ եղել են նույն խնջույքին, հասկացանք, որ խոսքը սննդային թունավորման մասին է»,– ասաց Աբովյանի բժշկական կենտրոնի բժիշկ–վարակաբան Հրաչուհի Աֆյանը։

Սննդամթերքի անվտանգության տեսչական մարմնի ներկայացուցիչները երեկ այցելել են «Նարեկ+» ռեստորանային համալիր։ Ռեստորանի տնօրեն Կամիլա Սաֆարյանի խոսքով՝ ժամկետն անց ոչինչ չի հայտնաբերվել, սակայն հանդիսությունների սրահն ու խոհանոցը ժամանակավորապես փակ են։ Ռեստորանի տնօրենը պատմել է, որ միջոցառմանը մասնակցել է 67 հոգի, որևէ մեկը միջոցառման ընթացքում գանգատ չի ունեցել, նրանք գոհ ու շնորհակալ հեռացել են։ Կամիլա Սաֆարյանը կարծում է, որ սննդային թունավորման պատճառն այն է, որ սեղանին մնացած ուտելիքները, որոնք ծնողները հավաքել ու իրենց հետ տարել էին, կերել են հաջորդ օրը, երբ միջոցառումը շարունակել են այլ վայրում։

«Սխալմունքը եղել է ծնողների կողմից, նրանք ուտելիքները հավաքել են ու իրենց հետ տարել, իսկ հաջորդ օրն էլ հավաքույթ են կազմակերպել ինչ–որ մեկի տանը ու դրա հաջորդ օրը սկսվել է թունավորումը։ Կարծում եմ՝ պետք է արգելել, որ աղցանները տանեն իրենց հետ։ Մեր մեղքը այստեղ չկա, բայց եթե լաբորատոր հետազոտությունների պատասխաններով պարզվի, որ մեր մեղքով է նման բան եղել, ես պատասխանատվություն կկրեմ, բայց համոզված եմ, որ ծնողները տարել են ուտելիքը ու չգիտես ինչ պայմաններում են պահել ու նման բան է եղել։ Բացի այդ՝ իրենք նաև տորթ էին բերել, մենք տեղյակ չէինք, կրեմով տորթ էր, որը վեց ժամ մնացել էր սեղանին, իրենք դրանից օգտվել էին, ես հարցրի՝ որտեղի՞ց էդ տորթը, ասացին, որ ինչ–որ մեկը տնային պայմաններում պատրաստում է, իրենք էլ պատվիրել են։ Կցանկանամ, որ բոլորն էլ սպասեն լաբորատոր հետազոտությունների արդյունքներին, որ իմանանք՝ ինչի պատճառով են թունավորվել շրջանավարտներն ու նրանց ծնողները, հետո միայն եզրահանգումներ անեն»,– հավելեց «Նարեկ+» ռեստորանային համալիրի տնօրենը։

Թունավորվածներից վերցված նմուշները ուղարկվել են լաբորատոր հետազոտության։ Պատասխանները կլինեն վաղը, եւ պարզ կդառնա, թե կոնկրետ ինչն է եղել թունավորման պատճառը։