Պարտավոր ենք արագ հաղթահարել 44-օրյա պատերազմի բացասական հետևանքները. Արմեն Ռուստամյան

«Մենք այսօր աշխարհաքաղաքական և Հայաստանի շուրջ տեղի ունեցող իրադարձությունների առումով գտնվում ենք այնպիսի փոթորկալից իրավիճակում, որ շատ կարևոր է այս փուլում ճիշտ կողմնորոշվել, երկիրը ճիշտ ուղեգիծ որդեգրի, կարողանանք հաղթահարել այն մարտահրավները»,- Ֆրանսիայի հրապարակում «Հայաստանի առջև կանգնած մարտահրավերները և լուծումները» թեմայով քննարկմանն ասաց «Հայաստան» խմբակցության պատգամավոր, ՀՅԴ-ական Արմեն Ռուստամյանը։

Նրա խոսքով, մեր տարածաշրջանը եղել և մնում է աշխարհաքաղաքական առումով կարևորագույն կիզակետերից մեկը, որտեղ միշտ եղել են տարբեր շահերի բախումներ և Հայաստանը պատմական առումով միշտ ունեցել է պրոբլեմներ, երբ որ այդ բախումները թեժացել են։

«Հայաստանի համար շատ հստակ մարտահրավերներ են ձևավորված։ Պարտավոր ենք արագ հաղթահարել 44-օրյա պատերազմի բացասական հետևանքները։ Ժամանակն այսօր փորձում է օգտագործել Թուրքիան և Ադրբեջանը և այս իրավիճակից առավելագույնը քամել։ Ադրբեջանը փորձում է իր ձեռքբերումներն ամրագրել, ավելի անշրջելի դարձնել։ Այդ առումով պարտավոր ենք այդ մարտահրավները հաղթահարելու համար ընթանալ ճիշտ ուղղությամբ»,- ասաց Ռուստամյանը։

Քաղաքական գործչի խոսքով, իշխանություններն ասում են՝ ապագա կա, բայց մտքում ունեն՝ կենսական զիջումներ կատարեն, որ կարողանան այդ ապագան ունենալ, իսկ, ըստ էության, իրենք ասում են՝ կենսական զիջումների գնալու պարագայում ապագա չի լինելու։

«Այստեղ է մեր հիմնական բանավեճը՝ ճշտել քաղաքական և պետական ուղեգիծը։ Եթե մենք դա օր առաջ չանենք, անունը դնենք, թե իբր գնում ենք հարևանների հետ խաղաղության դարաշրջան, բարիդրացիական հարաբերություններ ունենալու, բայց երբ թուլացած ես ու չես վերականգնում անվտանգությունդ, դա խաղաղություն չի լինելու, այլ ստրակացում, նվաստացում։ Սա է, որ մեր ժողովուրդը զգալով, այսօր ոտքի է կանգնել։

Անվտանգության առումով մենք ասում ենք կան կարմիր գծեր, որոնք պետք է անպայման պահպանենք։ Կարմիր գծերը քո գոյությունը, տեսակը պաշտպանելուն ուղղված քայլերն են։ Դա ընկած է «Դիմադրություն» շարժման հիմքում, այսինքն՝ ոչ Հայաստանի թուրքացմանը, ոչ Արցախի հայաթափմանը»,- ասաց Արմեն Ռուստամյանը։