Ինչպե՞ս ձերբազատվել քաղցրի հանդեպ կախվածությունից. խորհուրդներ հայտնի սննդաբան, դիետոլոգ Գ. Շախաթունուց. ArmDaily.am
Քաղցրի հանդեպ կախվածությունը բավականին մոտ է թմրանյութերից կախվածությանը, ArmDaily.am-ի հետ զրույցում ասաց հայտնի սննդաբան, դիետոլոգ Գայանե Շախաթունին: Նա խոսքով՝ քաղցրը ստեղծում է թվացյալ հաճույքային վիճակ, և դա մարդուն գցում է կախվածության մեջ:
«Առօրյայում քաղցրը անընդհատ հանդիպող պրոդուկտ է և հնարավոր չէ այն վերացնել, եթե դուք ապրում եք սոցիումում: Քաղցրը ինքնին ցանկալի կոմպոնենտ չէ, ոչ միայն շաքարը, այլև գլյուկոզան: Անգամ, եթե դա մեղրն է, անգամ, եթե դա չամիչն է, չորամրգերն են և այլն, միևնույն է՝ բոլորը գլյուկոզա են պարունակում: Շաքարի հետ համեմատությամբ իրենք էկոլոգիապես բարձր որակի են, այսինքն՝ քիմիական միջամտություններ չկան, բայց որպես կոմպոնենտ, որպես գլյուկոզա օրգանիզմի համար պետքական նյութ չեն: Պետքական չեն չափից շատ օգտագործելու դեպքում»,-ասաց Շախաթունին:
Դիետոլոգը նշեց, որ բացի շաքարից նաև բնական գլյուկոզաների ընդունումը պետք է լինի սահմանափակված,սակայն պետք չէ քաղցրից հրաժարվել ամբողջությամբ, քանի որ չի բացառվում՝ անձը պոռթկում ունենա:
«Եթե Դուք օրգանիզմին սովորեցրել եք քաղցրից կախման՝ կտրուկ վերացնելը ցանկալի չէ: Կա գիտական փաստ և ապացույց, որ քաղցրի պատասխանատուն ոչ թե չափն է, այլ ժամանակը: Այսինքն՝ եթե դուք նույն տևողության մեջ ուտեք 100 գրամ կամ 10 գրամ, բայց տևողությունը նույնն է, այսինքն՝ տասը րոպեում կերաք հարյուր գրամ, տասը րոպեում կերաք տասը գրամ շոկոլադ, Դուք նույն հաճույքն եք զգալու: Այսինքն, ուղեղը հաճույքի ռեակցիա ունենում է տևողության մեջ»,- նշեց դիետոլոգը:
Որպեսզի այս մեթոդը հեշտ յուրացվի, Շախաթունին խորհուրդ է տալիս դանդաղ ուտելու պրակտիկան կիրառել: Օրինակ՝ սիրած տորթը կիսել և ուտել դանդաղ՝ յուրաքանչյուր շաբաթ նվազեցնելով չափաբաժինը:
«Այդպես շաքարը ձեր օրգանիզմում հետզհետե կնվազի: Այն լիովին վերացնելը ցանկալի չէ: Այնուհետև ամենօրյա թխվածքային ռեժիմը փորձեք փոխարինել շոկոլադային ռեժիմով, հետո մեղրով, բայց սա գոնե բնական է, ռաֆինացված չի, մուտագեններ չկան: Սա է պակտիկան: Մենք երկու խնդիր ունենք՝ փոխարինել վնասակար շաքարը ավելի անվնաս շաքարների հետ, այսինքն՝ ավելի բնական՝ չրերով սարքած կոնֆետներ մեղրի հետ, կարող է լինել ընկույզի, մեղրի հետ տնական կոնֆետներ, կարող եք գնել դեպի դառը գնացող շոկոլադ: Շուկայում կա ստևիա և գետնախնձորի օշարակ, որոնք բնական քաղցրացուցիչներ են, դրանցից պատրաստված շոկոլադներ կան խանութում և շատ ավելի անվնաս են: Եթե այս այլընտրանքները ձեռք բերելու հնարավորություն չկա, ապա պետք է օգտագործել տանը ձեռքի տակ եղած համեմատաբար անվնաս քաղցրավենիքները: Եվ երկրորդ խնդիրը՝ քչացնում ենք ուտելիքի չափաբաժինը՝ դրան զուգահեռ մեծացնելով ուտելու տևողությունը»,-եզրափակեց Գայանե Շախաթունին: