Կառավարությունը վաղաժամկետ դադարեցրեց Թալինի ավագանու լիազորությունները. Կլինեն նոր ընտրություններ

Կառավարությունն իր այսօրվա՝ մայիսի 13-ի նիստում որոշեց վաղաժամկետ դադարեցնել Արագածոտնի մարզի Թալին համայնքի ավագանու լիազորությունները եւ ավագանու արտահերթ ընտրություններ նշանակել:

Առաջարկվել է ԿԸՀ-ին սույն որոշումն ուժի մեջ մտնելուց հետո՝ մեկշաբաթյա ժամկետում նշանակել Թալին համայնքի ավագանուարտահերթ ընտրության անցկացման օրը:

Որոշման հիմնավորման մեջ նշվում է, որ 2021-ի դեկտեմբերի 5-ին ՀՀ Արագածոտնի մարզի Թալին միավորված համայնքում տեղի է ունեցել համամասնական ընտրակարգով ավագանու ընտրություն: Թիվ 18 տարածքային ընտրական հանձնաժողովի դեկտեմբերի 12-ի որոշման համաձայն՝ Թալին համայնքի ավագանին ընտրվել է և մանդատները բաշխվել են 4 կուսակցությունների միջև.

1) «Զարթոնք» ազգային քրիստոնեական կուսակցություն՝6 մանդատ.

2) «Հայք» լիբերալ կուսակցություն՝3 մանդատ.

3) «Մեր համայնքը» կուսակցությունների դաշինք՝ 2 մանդատ,

4)«Քաղաքացիական պայմանագիր» կուսակցություն՝ 10 մանդատ:

Դեկտեմբերի 17-ին կայացել է Թալին համայնքի ավագանու անդրանիկ նիստը, որի ընթացքում ընդունվել է ավագանու որոշում, որի համաձայն՝ Տավրոս Սափեյանն ընտրվել է համայնքի ղեկավար: Սակայն, առ այսօր չի կայացել համայնքի ընտրված ղեկավարի երդման արարողությունը՝ ավագանու անդամների քվորումը չապահովվելու հիմքով:

Հիշեցնենք, որ ընդդիմադիր խմբակցությունները միասնաբար բոյկոտել են ավագանու նիստերը:

Ս.թ. փետրվարի 8-ից առ այսօր Թալին համայնքի ավագանու նիստեր չեն հրավիրվել և անցկացվել, քանի որ դրանք պետք է հրավիրվեին համայնքի ղեկավարի կողմից, այնինչ՝ Օրենքի 74-րդ հոդվածի 1-ին մասով սահմանված կարգով Թալին համայնքի ընտրված ղեկավարն իր լիազորությունները չի ստանձնել:

Օրենքի 69-րդ հոդվածի 1-ին մասի համաձայն՝

«Հայաստանի Հանրապետության կառավարությունը կարող է վաղաժամկետ դադարեցնել ավագանու լիազորությունները, եթե`

1) հերթական նստաշրջանի ընթացքում ավագանու նիստերը երեք ամսից ավելի չեն գումարվում»:

Այդ ժամկետը լրացել է ս.թ. մայիսի 8-ին:

Ելնելով վերոգրյալից՝ մշակվել և Կառավարության քննարկմանն է ներկայացվում «Հայաստանի Հանրապետության Արագածոտնի մարզի Թալին համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու մասին» Կառավարության որոշման նախագիծը:

Ավելի վաղ հայտնել էինք, որ ՏԻՄ ընտրություններից հետո ավագանի անցած երեք ուժերը՝ «Զարթոնքը», «Հայքը» եւ «Մեր համայնքը» կոալիցիա էին կազմել։ Ավագանու անդրանիկ նիստում ՔՊ-ն առաջադրել էր Տավրոս Սափեյանի, ընդդիմադիր կոալիցիան «Հայք» կուսակցությունից Դավիթ Մանուկյանի թեկնածությունը։ Տավրոս Սափեյանն ստացել էր 11 կողմ ձայն, իսկ Դավիթ Մանուկյանը՝ 10 կողմ ձայն: Սափեյանն ուներ 10 մանդատ, սակայն իր օգտին կողմ էր քվեարկել նաեւ «Հայք» խմբակցությունից Կարեն Գրիգորյանը, որը հետագայում հրաժարվել է մանդատից: Հետեւաբար, ՔՊ-ի 10 ձայնը բավարար չէր ավագանու նիստեր գումարելու համար: Արդյունքում՝ երեք ամիս շարունակ ավագանու նիստեր չէին անցկացվում։

Նախորդ շաբաթ ընդդիմադիր երկու խմբակցությունները՝ «Զարթոնքը» եւ «Մեր համայնքը» հայտարարել էին, որ պատրաստ են մասնակցել ընտրություններին։

Սակայն, Թալինի համայնքապետ Տավրոս Սափեյանը հայտարարեց, որ ավագանու նիստեր չեն գումարվի եւ համայնքը կգնա նոր ընտրությունների, քանի որ ընդդիմադիր խմբակցությունները որոշել են ներկայանալ ավագանու նիստերին միայն այն պատճառով, որ չկորցնեն իրենց մանդատները։

«Զարթոնք» խմբակցության ղեկավար Մնացական Մնացականյանն էլ մեզ հետ զրույցում նշեց, որ իրենց ավագանու նիստերին մասնակցելու նպատակը մեկն է՝ համայնքի խնդիրները, սակայն իրենք պատրաստ կլինեն նոր ընտրությունների։

Համայնքի ավագանին կլուծարվի ապրիլի 1-ին, Ազգային ժողովի արտահերթ գումարված նիստում ընդունված ՏԻՄ օրենքում փոփոխություն կատարելու «Քաղաքացիական պայմանագիր» խմբակցության պատգամավորների նախագծի շնորհիվ։ Ըստ փոփոխության՝ եթե օրենքով միավորված համայնքի ավագանու առաջին նիստն ավագանու լիազորությունները ստանձնելու պահից քսան օրվա ընթացքում չի գումարվում կամ օրենքով սահմանված կարգով այդ ավագանու լիազորությունները վաղաժամկետ դադարեցվում են, ապա վարչապետը նշանակում է համայնքի ղեկավարի պաշտանակատար մինչեւ օրենքով սահմանված կարգով նորընտիր համայնքի ղեկավարի լիազորությունների ստանձնումը: