Մանկապարտեզներում և դպրոցներում ջրծաղիկի դեպքեր են գրանցվում. ծնողներն ահազանգում են, նախարարությունը՝ պարզաբանում
ArmDaily.am-ը ահազանգեր է ստացել ծնողներից, որ հանրապետության մանկապարտեզներում և դպրոցներում կարմրուկի և ջրծաղիկի դեպքեր են գրանցվում, ծնողներին հորդորում են երեխաներին առայժմ չուղարկել կրթական հաստատություններ։
ԿԳՄՍ նախարարությունից մեզ հայտնեցին, որ դեռ դեպքեր չունեն, որ վերընշված հիվանդությունների պատճառով դպրոցները ամբողջությամբ հեռավար ուսուցման անցած լինեն։
«Բայց դպրոցներում եթե կան 1 կամ 2 լոկալ բնույթի դեպքեր, ապա դպրոցների տնօրինությունը, առաջնորդվելով հեռավար ուսուցման կազմակերպման կարգով, կազմակերպում են հեռավար ուսուցում իրենց դպրոցում որևէ հիվանդության պատճառով դասի չեկող երեխայի համար։ Նման դեպքերում դպրոցը պարտավոր չէ նախարարությանը իրազեկել»,- տեղեկացրին նախարարությունից։
ՀՀ ԱՆ ՀՎԿԱԿ-ի վարակիչ և ոչ վարակիչ հիվանդությունների վարչության համաճարակաբան Եվգենյա Խաչատրյանն էլ ArmDaily.am-ի հետ զրույցում նշեց, որ հիմա ջրծաղիկով վարակվելու սեզոնն է և կարող են հիվանդության դեպքեր գրանցվել։
«Ջրծաղիկը օդակալիթային վարակ է, որը կրում է սեզոնային բնույթ։ Հիմա սեզոնն է՝ ավելի շատ գարուն, ձմեռ, աշուն ժամանակահատվածն է, որի դեպքում ջրծաղիկի դեպքերի աճ է գրանցվում։ Դա բնորոշ է այդ հիվանդությանը։
Ջրծաղիկը դա մանկական վարակիչ հիվանդություն է, որը հիմնականում 5-9 տարեկան երեխաների շրջանում։ Կազակերպ հաստատություններում՝ հատկապես ձմռանը և գարնանը, որտեղ փակ տարածություն է, վարակը հատկապես արագ է տարածվում»,- ասաց համաճարակաբանը։
Ինչ վերաբերում է կարմրուկի դեպքերին՝ Եվգենյա Խաչատրյանը նշեց, որ կարմրուկի տեղական դեպքեր չունենք։
«Եթե վերցնում ենք կարմրուկը և ջրծաղիկը, ապա երկուսի կլինիկական դրսևորումը ցանն է։ Եթե մարդ չի իմանում ցանի բնույթը՝ հնարավոր է, որ ուղղակի չտարբերեն՝ դա ջրծաղիկ է, թե կարմրուկ»,- ասաց համաճարակաբանը։
Նա տեղեկացրեց, որ դպրոցներից ահազանգեր չեն ստացել ջրծաղիկով վարակվածության դեպքերի մասին։
«Մենք շաբաթական կտրվածքով իրականացնում ենք մշտադիտարկում և ստանում ենք բոլոր կազմակերպություններից արձանագրված դեպքերի վերաբերյալ տեղեկատվություն։ Մենք տեղեկատվությունը փոխանցում ենք Առողջապահական տեսչական մարմին և համաճարակաբանական հետազոտության ժամանակ մենք իրականցնում ենք և խորհուրդ ենք տալիս կազմակերպ հաստատություններին այդ դեպքերը տեղայնացվի, ինչպես նաև այդ խմբի երեխաների հետ շփումը հնարավորինս քչացվի, որպեսզի վարակը շատ ճտարածվի՝ իհարկե, պահպանելով ախտահանումը, օդափոխությունը։ Դրանք բոլորը միասին շատ մեծ նշանակություն ունեն վարակի էլ ավելի չտարածման համար։ Պետք է նշեմ, որ ջրծաղիկը ունի 99% վարակելիություն, եթե գրանցվում է դեպք, ապա չհիվանդացած երեխաները 90%-ով կհիվանդանան»,- ասաց Խաչատրյանը։
Վարակվելու դեպքում՝ համաճարակաբանը խորհուրդ է տալիս դիմել բժկի և հեևել բժկի ցուցումներին, ոչ թե ինքնաբուժությումբ զբաղվել։