Դոնալդ Թրամփն ընդամենը 93 միլիոն դոլար կանխիկ գումար ունի

Նախագահության վերջին տարում Դոնալդ Թրամփն ուներ մոտ 93 միլիոն դոլար կանխիկ գումար, ինչը շատ ավելի քիչ է այն գումարից, որը, ինչպես ինքն է պնդել, եղել է իր բանկային հաշիվներում:

Forbes-ը գնահատականը հիմնել է անցյալ շաբաթ Նյու Յորքի գլխավոր դատախազ Լետիցիա Ջեյմսի հրապարակած փաստաթղթերի վրա՝ որպես Trump Organization-ի հնարավոր խարդախության սխեմաների քաղաքացիական հետաքննության մաս:

Հրատարակությունը համեմատել է տվյալները Թրամփի նախկին հայտարարությունների հետ այն մասին, թե որքան գումար ունի ինքը, հատկապես 2015 թվականին տված հարցազրույցում նա ասել է, որ 793 միլիոն դոլար կանխիկ գումար ունի:

Թրամփի ճշգրիտ կարողությունը երկար ժամանակ դժվար է եղել որոշել՝ հաշվի առնելով նրա բիզնես գործարքների բարդությունը եւ անկախ ապացույցներ հրապարակելու դժկամությունը:

Հրատարակությունը նշում է, որ կանխիկ գումարը պատկերի միայն մի մասն է՝ հաշվի առնելով անշարժ գույքի եւ բիզնեսի ոլորտում Թրամփի պորտֆելը։

Այնուամենայնիվ, այդ թիվը խիստ տարբերվում էր մի շարք այլ գնահատականներից, այդ թվում նրանից, որը Թրամփը տվել էր ուղղակիորեն Forbes-ին՝ հույս ունենալով, որ ամսագիրն իրեն կներառի հարուստ մարդկանց ամենամյա ցուցակում:

2015 թվականին, երբ Թրամփը հայտնեց նախագահի պաշտոնում իր թեկնածության առաջադրման մասին, նրա նախընտրական շտաբը հայտարարություն տարածեց, որում ասվում էր, որ 2014 թվականի հունիսի դրությամբ նա ունեցել է 302 միլիոն դոլարի լիկվիդացիոն ակտիվներ՝ կանխիկ եւ այլ մատչելի միջոցներ:

Ֆինանսական հաշվետվությունում, որը նա պետք է ներկայացներ իր նախագահական քարոզարշավի շրջանակներում, գումարն ավելի ցածր է եղել՝ 2015 թվականի կեսերին՝ 78-ից 232 միլիոն դոլար:

Ըստ Forbes-ի, 2015 թվականին ամսագրին տված հարցազրույցում Թրամփն ավելացրել է այդ թիվը: «Այսօր ես ունեմ 793 միլիոն դոլար»,- ասել է նա պարբերականին` նշելով մի թիվ, որը շատ ավելին է, քան նախորդները:

Forbes-ը հայտնել է, որ նրա կանխիկ գումարը գնահատել է 300 միլիոն դոլար այդ տարվա համար, եւ այդ թիվը, նրա կարծիքով, դեռ կարող է չափազանց մեծ լինել:

Դատախազի փաստաթղթերում նշվում է, որ Թրամփի կանխիկ եւ լիկվիդացիոն ակտիվները 2016 թվականին գնահատվել են 114 միլիոն դոլար։

2018-ին ունեցել է 76 մլն դոլար, 2019-ին՝ 87 մլն դոլար, 2020-ին հասել է 93 մլն դոլարի։

Հաղորդվում է, որ Նյու Յորքի երկու երկնաքերների վերաֆինանսավորման վերջին գործարքի արդյունքում նրա փողային արժեքը կարող էր հասնել մոտ 280 միլիոն դոլարի: