Վարդենիսի համայնքապետի աշխատասենյակի բանալին ու կնիքն անհետացել են, ոչ ոք տեղյակ չէ, թե ուր

Վարդենիսի համայնքապետի աշխատասենյակի բանալին ու կնիքն անհետացել են։ ՏԻՄ ընտրությունների արդյունքում կոալիցիա կազմած ընդդիմադիր ուժերից մեկի՝ «Միասնական Վարդենիս» դաշինքի ավագանու անդամ Դավիթ Շահնահազարյանը NEWS.am-ի հետ զրույցում ասաց, որ իրենք չգիտեն, թե ինչպես են կնիքն ու բանալին անհետացել, եւ որտեղ են գտնվում այժմ։

«Ըստ կարգի պետք է դրանք հանձնվեն աշխատակազմի ղեկավարին։ Աշխատակազմի ղեկավարն ասում է, որ ինքը տեղեկություն չունի, թե որտեղ է կնիքը եւ բանալին։ Մենք հունվարի 12-ին գրությամբ խնդրել էինք աշխատակազմի ղեկավարին, որ մեզ տրամադրի կնիքը եւ աշխատասենյակի բանալին։ Ղեկավարը պատասխան գրությամբ նշել է, որ կնիքը եւ բանալիներն իրեն հանձնված չեն։ Եթե աշխատասենյակը փակ է, չկա կնիքը, հայտնի չէ, թե որտեղ են դրանք, գործառույթ չի կարող իրականացնել։ Համայնքի ղեկավարման համար անհրաժեշտ է, որ համայնքի ղեկավարը ստանձնի իր լիազորությունները, համայնքի աշխատակազմ ձեւավորվի, իսկ այս պահի դրությամբ համայնքների նախկին ղեկավարների լիազորությունները կասեցված են, ստացվում է՝ Վարդենիս խոշորացված համայնքին միացված նախկին բոլոր համայնքաներում գործառություներն իրականացնողներ չկան՝ վարչական շրջանների պատասխանատուներ դեռ չեն նշանակվել, եւ բնականոն աշխատանքը խաթարվել է։ Ըստ օրենքի՝ Գեղամասար խոշորացված համայնքում, Վարդենիսի կազմի մեջ մտնող համայնքների ղեկավարներ չկան, քանի որ, ըստ օրենքի, խոշորացված համայնքի ղեկավարի ընտրությունից հետո միացված համայնքների ղեկավարների լիազորությունները դադարեցվում են»,- նշեց Շահնազարյանը։

Նրա փոխանցմամբ՝ համայնքի նորընտիր ղեկավար Ահարոն Խաչատրյանն աշխատանքային առաջին այցերը, սահմանային միջադեպերով պայմանավորված, Նորաբակ եւ Կութ գյուղեր է կատարել, բնակիչների հետ իրավիճակին վերաբերող հարցեր քննարկել։

«Քաղաքացիական պայմանագիր» կուսակցությունը Վարչական դատարան էր դիմել՝ պահանջելով չեղյալ հայտարարել Վարդենիս խոշորացված համայնքի նորընտիր ավագանու առաջին նիստի արդյունքները, որի ժամանակ համայնքի ղեկավար էր ընտրվել Ահարոն Խաչատրյանը։ «Միասնական Վարդենիս»-ի ավագանու անդամը հայտնեց, որ իրենց քաղաքական ուժը որեւէ կերպ Վարչական դատարանից չի ծանուցվել, որ դիմումը վարույթ է ընդունվել։

«Ընդամենը տեղյակ ենք, որ վարույթ է ընդունվել, եւ հունվարի 27-ին դատաքննական նիստ է նշանակվել»,- նկատեց Շահնազարյանը։