ՀՀ 4 համայնքում ընտրություններից հետո դեռ իշխանություն չի ձևավորվել

2021 թվականի դեկտեմբերի 5-ին Հայաստանում կայացավ տեղական ինքնակառավարման մարմինների ընտրություն՝ միավորված 36 համայնքում: Ընտրություններն անցյալում են, խնդիրները՝ ոչ: Որոշ բնակավայրերում այդպես էլ ղեկավար ընտրելու գործընթացն ավարտին չի մոտեցել: Պատճառները տարբեր են:

Սկսենք Արարատի մարզի Վեդի խոշորացված համայնքից: Վեդիում ընտրությունների արդյունքներով առաջատար էր «Իմ հզոր համայնք» կուսակցությունը՝ ձայների 42,86 %-ով, «Քաղաքացիական պայմանագիրը» 2-րդ տեղում էր՝ 38,04 %-ով, «Հանրապետություն» կուսակցությունն ստացել է ձայների 16,31 %-ը: Որևէ ուժ բացարձակ մենածամասնություն չի ստացել, ավագանին այդպես էլ չի ընտրել համայնքի ղեկավար:

«Հանրապետություն» կուսակցությունը ո՛չ ընդդիմության, ո՛չ երկիրը ղեկավարող ուժի հետ կոալիցիա չկազմեց: Խնդրի հանգուցալուծումը քաղաքական ուժերը տեսան նոր ընտրությունների մեջ: Ի վերջո, 2-րդ և 3-րդ տեղերն զբաղեցրած «Քաղաքացիական պայմանագիր» և «Հանրապետություն» կուսակցությունների համամասնական ցուցակների ավագանու բոլոր թեկնածուները ԿԸՀ-ին ինքնաբացարկի դիմումներ ներկայացրին: Այժմ պետք է նշանակվեն նոր ընտրություններ՝ ցանկացող բոլոր ուժերի մասնակցությամբ:

Նոր ընտրության օրը դեռևս հայտնի չէ, իսկ մինչ ընտրության միջոցով իշխանություն ձևավորելը Տեղական ինքնակառավարման մարմինների մասին օրենքի համաձայն՝ երկրի վարչապետը նշանակում է համայնքի ղեկավարի պաշտոնակատար: Վարչապետ Նիկոլ Փաշինյանը համայնքի ղեկավարի պաշտոնակատար է նշանակել Վեդիում ՔՊ ցուցակը գլխավորող Գարիկ Սարգսյանին:

Մթնոլորտը թեժ է նաև Արմավիրի մարզի Փարաքար համայնքում: Փարաքարում արտառոց դեպք եղավ՝ ավագանու առաջին նիստում երկու համայնքապետ ընտրվեց, նույն օրը երդվեց համայնքի երկու ղեկավար՝ «Ապրելու երկիր» կուսակցության ցուցակը գլխավորող Վոլոդյա Գրիգորյանը և «Դավիթ Մինասյան» կուսակցությունների դաշինքից Դավիթ Մինասյանը:

Ընտրության արդյունքներով՝ Փարաքարում 10 մանդատ էր ստացել «Ապրելու երկիր» կուսակցությունը, 9 մանդատ՝ «Դավիթ Մինասյան» կուսակցությունների դաշինքը, 2-ը՝ «Քաղաքացիական պայմանագրի» մանդատն է։ Ավագանու առաջին նիստը տեղի ունեցավ դեկտեմբերի 20-ին: Ըստ «Դավիթ Մինասյան» դաշինքի, «Ապրելու երկիրը» Վոլոդյա Գրիգորյանին համայնքի ղեկավար է ընտրել 10 կողմ ձայնով, բայց ընդմիջման ժամանակ, երբ մյուս ուժերի ավագանիները ներկա չեն եղել: Դրանից հետո նիստը շարունակել են կոալիցիա կազմած «Դավիթ Մինասյան» դաշինքն ու «Քաղաքացիական պայմանագիրը» և 11 ձայնով ղեկավար ընտրել Դավիթ Մինասյանին:

Կրքերը թեժացան՝ «Ապրելու երկիրն» ընտրեց բողոքի ակցիաների ճանապարհը, իսկ կոալիցիա կազմած քաղաքական ուժերը հայցադիմում ներկայացեցին վարչական դատարան՝ Փարաքար խոշորացված համայնքի ընտրության արդյունքներն անվավեր ճանաչելու պահանջով: Դատարանը դեկտեմբերի 30-ին բավարարեց հայցը: Ենթադրվում էր, որ կլինի ավագանու նիստ և կընտրվի համայնքի ղեկավար, բայց քաղաքական ուժերից ոչ մեկը դահլիճ չմտավ, չնայած «Դավիթ Մինասյան» դաշինքն ու «Քաղաքացիական պայմանագիր» կուսակցության ներկայացուցիչները տարածքում էին: Խնդիրը լուծում չի ստացել, չի բացառվում, որ կրկնվի Վեդիի սցենարն ու Փարաքար խոշորացված համայնքում անցկացվի նոր ընտրություն:

Անորոշ վիճակ է նաև Գեղարքունիքի մարզի Վարդենիս համայնքում: Այստեղ ամենաշատ ձայներն ստացել է «Քաղաքացիական պայմանագիր» կուսակցությունը, և ավագանու կազմում 13 մանդատ ունի, սակայն 10 մանդատ ունեցող ընդդիմադիր «Ահարոն Խաչատրյան» դաշինքն ու 4 մանդատ ունեցող «Միասնական Վարդենիսը» կոալիցիոն հուշագիր են ստարգրել ու դեկտեմբերի 30-ին համայնքի ղեկավար ընտրել Ահարոն Խաչատրյանին: Քպ-ն այդ նիստին չի մասնկացել ու վստահ է, որ ավագանու այդ նիստն օրինական չէ, քանի որ արձանագրություն չկա: «Քաղաքացիական պայմանագիրը» հայցադիմում է ներկայացրել Վարչական դատարան: Հունվարի 4-ի ավագանու նիստը կայացավ բակում. ոստիկանությունն ավագանու անդամներին թույլ չտվեց մուտք գործել համայնքապետարան:

Լոռու մարզի Վանաձոր համայնքն էլ ընտրություններից հետո նոր ղեկավար չունի: Այս տարվա դեկտեմբերի 5-ին համայնքում տեղի ունեցած ՏԻՄ ընտրություններում անցողիկ շեմը հաղթահարել է 5 քաղաքական ուժ, սակայն համայնքային իշխանությունը միանձնյա ձևավորելու համար ոչ մի ուժ չի հավաքել անհրաժեշտ ձայներ: Առաջատարը «Մամիկոն Ալսանյան» դաշինքն է՝ ձայների 38,7 տոկոսով: «Լուսավոր Հայաստանը» դատարան է դիմել՝ վիճարկելով ընտրությունների արդյունքները, ինչի պաճառով էլ մանդատների բաշխումը հետաձգվել է։