Իրականում ի՞նչ նախագիծ է ստորագրել Բայդենը հայ-ադրբեջանական հակամարտության վերաբերյալ․ հայամետ Շիֆի նախագիծը չի ընդունվել

Հայկական մեդիա տիրույթում տարածվում է ինֆորմացիա, որ ԱՄՆ նախագահ Ջո Բայդենի՝ դեկտեմբերի 27-ին ստորագրած 2022թ. ֆիսկալ տարվա «Ազգային պաշտպանության մասին» օրենքում առկա են կարևոր դրույթներ հայ-ադրբեջանական հակամարտության վերաբերյալ, այդ թվում այն, որ Ադրբեջանը պետք է անհապաղ և անվերապահորեն ազատ արձակի գերեվարված բոլոր անձանց, այս մասին գրում է 1in.am-ը:

Ըստ այդ հրապարակումների՝ օրենքում նշվում են Կոնգրեսի եզրակացությունները 44-օրյա պատերազմի վերաբերյալ, մասնավորապես 2020-ի սեպտեմբերի 27-ին Ադրբեջանը և Թուրքիան «օտարերկրյա աշխարհազորային ջոկատների աջակցությամբ» ռազմական հարձակում են սկսել Լեռնային Ղարաբաղի վրա, որը հայտնի է նաև Արցախ անունով, ինչի արդյունքում տեղահանվել են տասնյակ հազարավոր հայազգի բնակիչներ:

Ամերիկագետ Սուրեն Սարգսյանը, սակայն, «Առաջին լրատվական»-ի հետ զրույցում պարզաբանեց, որ հայկական ԶԼՄ-ները սխալմամբ հղում են կատարում մի նախագծի վրա, որը չէր ընդունվել Կոնգրեսի կողմից և մնացել էր նախագիծ: Խոսքը մասնավորապես կոնգրեսական Ադամ Շիֆի նախագծի մասին է, որը բնականաբար եղել է լուրջ պրոհայկական ձևակերպումներով, սակայն, ցավոք, չի ընդունվել։

Սուրեն Սարգսյանը պարզաբանեց, որ ընդունվել է մեկլ այլ տարբերակ՝ Ֆրենկ Փալոնի կողմից հեղինակած նախագիծ, որը սակայն այնքան փայլուն տեսք չունի, որքան էր Շիֆի նախագիծն էր․«Այսինքն՝ Կոնգրեսում նույն օրենքի վերաբերյալ միաժամանակ մի քանի նախագիծ է եղել, բայց տեխնիկական վրիպակի պատճառով հղումը տրվում է ոչ թե այն տարբերակին, որն ընդունվել է Կոնգրեսի կողմից ու նախագահի կողմից ստորագրվելուց հետո դարձել է օրենք, այլ այն նախագծի վրա, որը Ներկայացուցիչների պալատում քվեարկությամբ անցել է, բայց արդեն Սենատում չի անցել ու բնականաբար նախագահի կողմից չի ստորագրվել։ Այն նախագիծը, որը մեջբերել են հայկական լրատվամիջոցները Ադամ Շիֆն է հեղինակել, բնականաբար՝ մի շարք պրոհայկական ձևակերպումներով։ Անցել է այլ օրենք, որում էլի կան որոշ կարևոր ձևակերպումներ և դրանից մասին ես ավելի վաղ գրել եմ։Համապատասխան ձևակերպումներն օրենքի մեջ տվել է մեկ այլ հայամետ կոնգրեսական Ֆրենկ Փալոնը»։

Սարգսյանը հստակեցրեց՝ օրենքն ընդունվել է, բայց ոչ այն տարբերակով, որը տարածվում է հայկական մեդիա տիրույթում․«Պետք է սակայն նշեմ, որ ընդունված նախագծում ևս մատնանշվում է ռազմագերիներ եզրույթը, բայց ընդունված տեքստն էապես տարբերվում է, չունի այնպիսի պրոհայկական հստակ ձևակերպումներ՝ ինչպիսին որ տարածվող տարբերակում է»։

Մեր զրուցակիցը նաև նշեց՝ ընդունված տարբերակում ասվում է, որ Կոնգրեսին պետք է ներկայացվի հատուկ զեկույց՝ Պետդեպի Պաշտպանության նախարարության, պաշտպանության քարտուղարության ու այլ մարմինների կողմից, որում հստակ կուսումնասիրվեն ու 180 օրվա ընթացքում կնշվեն, թե ինչ է իրականում պատերազմի ժամանակ արել Ադրբեջանը և թե արտաքին ուժերն ինչ տեսակի ներգրավվածություն են ունեցել»։