Տիբեթի հարավում հայտնաբերվել է 3,5 մ բարձրությամբ բեգոնիայի նոր տեսակ
Բուսաբանների միջազգային խումբը Տիբեթի հարավային Մեդոգ գավառում հայտնաբերել է բեգոնիայի մինչ այժմ անհայտ տեսակ, որի բարձրությունը կարող է հասնել 3,5 մետրի, ինչը նշանակում է, որ սա այդ բույսի ամենամեծ տեսակն է։ Բեգոնիաների այդ տեսակի առաջին լուսանկարները եւ նկարագրությունը հրապարակվել են PhytoKeys գիտական ամսագրի հոդվածում։
«Այդ բույսի, որը ներկայում Երկրի վրա բեգոնիաների ամենաբարձր տեսակն է, բնակության տարածքը շատ հատվածայնացված է։ Դա վկայում է այն մասին, որ Begonia gigantica-ն անհրաժեշտ է ներառել Տիբեթի հարավում աճող խոցելի տեսակների ցանկում»,- գրում են հետազոտողները։
Բեգոնիաները պատկանում են խոտաթփատեսակների շարքին, որոնք աճում են Եվրասիայի եւ Ամերիկայի մերձարեւադարձային շրջաններում։ Ընդհանուր առմամբ, գիտնականները հաշվում են այդ բույսի ավելի քան երկու հազար տեսակ, որոնց մի մասը տարածված է այգեգործների եւ ընտանի բույսերի սիրահարների շրջանում, քանի որ բեգոնիան կարող է աճել արեւի լույսի գրեթե բացակայության պայմաններում։
Բուսաբանների խումբը՝ Չինաստանի գիտությունների ակադեմիայի Բույսերի ուսումնասիրման Շանհայի կենտրոնի պրոֆեսոր Թյան Դայկեի գլխավորությամբ, Տիբեթի հարավում հայտնաբերել է Երկրի վրա այս պահի դրությամբ բեգոնիայի ամենամեծ տեսակը, որի բարձրությունը կարող է հասնել 3,5 մետրի, իսկ բնի հաստությունը՝ մոտ 12 սմ-ի։
Բույսը գիտնականները հայտնաբերել են Մեդոգ գավառի տարածքում, Տիբեթի անտառային բուսականության ուսումնասիրման ժամանակ, որն աճում է 400-1400 մ բարձրության վրա գտնվող գետակների եւ լեռնային գետերի երկայնքով։ «Բույսերի գրանցման» ընթացքում պրոֆեսոր Դայկեն հանդիպել է արտասովոր բարձրությամբ բեգոնիայի, որի ծաղիկներին հասնել չի կարողացել եւ որի ցողունը չի կարողացել գրկել մեկ ձեռքի մատներով։
Գիտնականները հանգամանալիորեն ուսումնասիրել են բույսը եւ եկել եզրակացության, որ այն բեգոնիաների մինչ այժմ անհայտ տեսակ է, որն ստացել է Begonia gigantica անունը։ Մեդոգ գավառում կատարված հետագա արշավները ցույց են տվել, որ այդ բույսի պոպուլյացիաները խիստ հատվածայնացված են։ Դա մատնանշում է բեգոնիայի այդ տեսակը (վերանալու վտանգը կանխելու նպատակով) Կարմիր գրքում ներառելու անհրաժեշտության մասին, ամփոփել են գիտնականները։