ՔՊ-ն Վարդենիսի ավագանու ընդդիմադիր անդամներին խոստումներ է տվել, որ իրենց թեկնածուի օգտին քվեարկեն. ավագանու անդամ

Ամեն մեկի վրա առանձին-առանձին եղել են ճնշումներ, համոզել են, խոստումներ տվել. Իշխող ուժը՝ «Քաղաքացիական պայմանագիրը» բոլորին նման խոստումներ է տվել։ Այս մասին այսօր՝ դեկտեմբերի 30-ին, Վարդենիսի համայնքապետարանում լրագրողների հետ զրույցում ասաց Վարդենիսի ավագանու ընդդիմադիր անդամ Սաթենիկ Մինասյանը՝ անդրադառնալով հարցին՝ ավագանու անդամների վրա ճնշումներ եղե՞լ են, թե ոչ:

«Ասեցին, որ բաժանել են բրինձ, ալյուր, պանիր, նկարներ դրվեցին սոցցանցերում: Ավագանու տարբեր անդամների խոստումներ են տվել՝ ասելով, որ իրենց թեկնածուի օգտին քվեարկեն»,-նշեց Սաթենիկ Մինասյանը։

Նա ընդգծեց, որ ընդդիմությունը միասնական է լինելու. «Նման ճնշումների համար ես՝ որպես ՀՀ քաղաքացի, ժողովրդավար երկրի քաղաքացի, ամաչում եմ»,-ասաց Մինասյանը։

Ավելի վաղ ավագանու ՔՊ-ական անդամը լրագրողների հետ զրույցում, անդրադառնալով դիտարկմանը, թե Վարդենիսի ՏԻՄ ընտրություններում ՔՊ-ն պարտվել է, նշել էր, թե վաղ է խոսել պարտության կամ հաղթանակի մասին, քանի որ մինչև նիստի կայացումը պարզ չէ՝ ավագանու անդամներից որ մեկն ում կընտրի՝ այդպիսով կասկածի տակ դնելով ավագանու ընդդիմադիր անդամների միասնականությունը։

Ավելի վաղ հայտնել էինք, որ դեկտեմբերի 5-ին կայացած ՏԻՄ ընտրություններում այս համայնքում «Քաղաքացիական պայմանագիր»-ը ստացել էր 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ։ Ընդդիմադիր ուժերն ընտրություններից հետո կոալիցիա կազմելու հուշագիր էին ստորագրել, եւ մանդատների քանակն արդեն բավարարում էր համայնքապետ ընտրելու համար։

Դրանից հետո «Միասնական Վարդենիս»-ի առաջին համար, Վարդենիսի նախկին քաղաքապետ Արամ Հարությունյանին հարուցված քրեական գործի շրջանակում մեղադրանք առաջադրվեց, եւ նա կալանավորվեց։

Այսօր Ոստիկանությունը փորձում էր բերման ենթարկել ավագանու ընդդիմադիր մեկ այլ անդամի՝ Ահարոն Խաչատրյանին, որը համայնքապետի ընդդիմադիր թեկնածուն է։ Ավագանու անդրանիկ նիստը տապալվեց, համայնքապետ չընտրվեց։