Եվրոպայում գազի գները կտրուկ աճել են

Լոնդոնի ICE բորսայում չորեքշաբթի՝ դեկտեմբերի 8-ին, Եվրոպայում գազի գներն աճել են 9.4 տոկոսով՝ հասնելով 1219 դոլարի: Հոլանդական TTF կենտրոնի հունվարյան ֆյուչերսների գինը հոկտեմբերի 18-ից ի վեր առաջին անգամ գերազանցել է 1200 դոլարը: Ակնարկը գրելու պահին հազար խորանարդ մետր գազը վաճառվում էր 1186 դոլարով։

Գազի գներն աճում են այն լուրերի ֆոնին, որ ԱՄՆ-ն կձգտի արգելափակել «Հյուսիսային հոսք 2» գազատարը, եթե Ռուսաստանը ներխուժի Ուկրաինա: Վերջին շրջանում արեւմտյան լրատվամիջոցները գրում են Մոսկվայից ռազմական ագրեսիայի հեռանկարների մասին։ Ռուսական կողմը բազմիցս կտրականապես հերքել է մեղադրանքները։

Ռուսաստանի եւ ԱՄՆ նախագահները նախօրեին տեսակապով երկժամյա բանակցություններ են վարել, որոնց հիմնական թեման եղել է Ռուսաստանի հնարավոր հարձակումն Ուկրաինայի վրա։ Սպիտակ տան զեկույցի համաձայն՝ Ջո Բայդենը Վլադիմիր Պուտինին հայտնել է ԱՄՆ-ի եւ Եվրոպայի մտահոգությունը՝ Ուկրաինայի սահմանների մոտ ռուսական ռազմական ուժերի կուտակման հետ կապված:

Ռուսաստանի ղեկավարը կոչ է արել Ուկրաինայի շուրջ ստեղծված իրավիճակի պատասխանատվությունը «Ռուսաստանի ուսերին» չդնել եւ հիշեցրել է Կիեւի ապակառուցողական գործողությունների մասին, որոնք խարխլում են մինսկյան պայմանավորվածությունները։

Եթե ​​աշխարհաքաղաքական գործոնը բացառվի, «Հյուսիսային հոսք 2»-ը կգործարկվի սերտիֆիկացումից հետո: Ընթացակարգի ավարտի ճշգրիտ ժամանակը հայտնի չէ: Փորձագետները չեն բացառում, որ մեկնարկը տեղի կունենա գարնանը։