«Մեծ Խաղաղօվկիանոսյան աղբի կարկատանը» ծովային օրգանիզմներ են սկսել բնակեցնել

Կենսաբանները պարզել են, որ պլաստիկի հսկայական կուտակումները թույլ են տալիս ափամերձ կենդանիներին ուսումնասիրել նախկինում դրանց համար անհասանելի բաց ծովը եւ տարածվել օվկիանոսի բոլոր անկյուններում, գրել է Naked-Science-ը։

Հյուսիս-Խաղաղօվկիանոսյան հոսանքը ձեւավորում է հսկայական հորձանուտ, ուր աղբը գալիս է ամբողջ Հյուսիսային Ամերիկայի, Ճապոնիայի եւ Հարավարեւելյան Ասիայի ափերից: Այն կազմում է Խաղաղօվկիանոսյան մեծ աղբի շերտը, որը գնահատվում է ավելի քան 1.5 միլիոն քառակուսի կիլոմետր՝ մի քանի անգամ մեծ Ֆրանսիայի տարածքից, որտեղ մոտ 80 հազար տոննա պլաստիկ է կուտակվել։ Պլաստիկը արագ քայքայվում է միկրոսկոպիկ բեկորների, որոնք արտաքինից գրեթե անտեսանելի են եւ միեւնույն ժամանակ թունավոր են ծովային օրգանիզմների համար:

Սակայն այս մարդածին անապատը աստիճանաբար բնակեցվում է կյանքով։ Նման եզրակացության են եկել Սմիթսոնյան բնապահպանական հետազոտությունների կենտրոնի (SERC) բնապահպանները, որոնց հոդվածը հրապարակվել է Nature Communications ամսագրում։ Ըստ հեղինակների՝ կյանքի այս գոտին ջրի այն շերտում է, որը մեծապես մոդիֆիկացվել է մարդկանց կողմից: Նրանք առաջին անգամ դա նկատել են մոտ տասը տարի առաջ, երբ հզոր ցունամին մեծ քանակությամբ պլաստիկ աղբ է նետել ճապոնական ափ, որում մի քանի հարյուր բազմատեսակ օրգանիզմներ են հայտնաբերվել:

Պլաստիկ աղբը բաց օվկիանոսում նոր էկոլոգիական միջավայր է ստեղծել, որը հարմար է ափամերձ օրգանիզմների համար: Դեռ հայտնի չէ, թե ինչպես են դրանք հայտնվել այնտեղ. գուցե կենդանիները եկել են աղբի հետ միասին: Անհասկանալի է նաեւ, թե ինչպես դրանց հայտնվելը կանդրադառնա բաց ծովի սովորական բնակիչների վրա, որոնք սովոր չեն նման «հարեւանության»։