Քաջարան համայնքի ավագանու անդամները չգիտեն, թե իրենց համայնքապետին ինչի համար են կալանավորել. Մանրամասներ Գորիսի քաղաքապետ Առուշ Առուշանյանի և մյուսների գործով դատական նիստից
Քաջարան համայնքի ավագանու անդամները՝ երեկ՝ նոյեմբերի 29-ին, հայտարարություն են տարածել՝ ի աջակցություն Քաջարանի քաղաքապետ Մանվել Փարամազյանի։
Նրանք ասել են, որ մինչ այսօր չգիտեն, թե իրենց համայնքապետին ինչի համար են կալանավորել։
«Շուրջ 6 ամիս է՝ համայնքապետը չկա, քաղաքն անտեր-անտիրական է» , - ասաց ավագանու անդամներից մեկը՝ նշելով, թե հայտարարության տեքստն ուղարկելու են դատարանին։
«Հարգելի դատարան, հայտնում ենք ձեզ մեր խորը անհանգստությունն ու մտահոգությունն այն հանգամանքի վերաբերյալ, որ Քաջարան համայնքի ղեկավար Մանվել Փարամազյանն արդեն 6 ամիս է՝ գտնվում է արգելանքի տակ, իսկ Փարամազյանի գլխավորած համայնքն իր բացակայության պայմաններում գլխատված է, քաջարանցին՝ հիասթափված։
ՀՀ Սահմանադրությամբ ամրագրված է, որ տեղական ինքնակառավարումը միայն ենթադրում է ժողովրդի կողմից ընտրված համայնքի ղեկավար և ավագանի։ Աներկբա է Քաջարան համայնքի համար ևս, որ գրեթե 100 տոկոս քվե ստացած համայնքի ղեկավարն այսօր գտնվում է կալանքի տակ։ Դեռևս անհայտ է նրան մեղսագրվող արարքների օրինականությունն ու իրավաչափությունը։ Ավելին, դրանք հետագայում, միանշանակ, կլինեն ՄԻԵԴ գանգատի առարկա։
Ներկայումս քաջարանցու ընտրական իրավունքի խախտման պայմաններում ինչպես պետք է իրականացնել համայնքի ղեկավարումը, երբ գործ ունենք ամբողջությամբ պարալիզացված ներհամայնքային կյանքի, մշակույթի, աշխատավոր քաջարանցու վստահության բացակայության հետ, երբ վերջիններիս կայացրած որոշումը երաշխավորված չէ։ Այսօր բոլոր ժամանակներում անառիկ Սյունիքը կանգնել է պատմական հորձանուտ անցնելու վտանգի առաջ, իսկ սյունեցուն ոգեշնչելու, իր դիրքերում ամուր կանգնելու և բնօրրանը երբեք չլքելու համար պայմաններ ստեղծելու փոխարեն գլխատում են։ Սա է ներկայիս կարգավիճակով Քաջարան համայնքը։
Հարգելի դատարան, ձեզ է ընձեռված գործի անկողմնակալ, անաչառ և օբյեկտիվ իրավագիտակցությամբ ընկալելու բացառիկ իրավունքը։ Մեր համայնքի ղեկավարին մեղսագրվող արարքի մեղադրանքի առումով համոզված ենք, ունենք բավարար երաշխիքներ, մեղադրական թեքումից ձերբազատվել և անկողմնակալ արդարադատություն իրականացնել։ Խնդրում ենք փոփոխել Մանվել Փարամազյանի խափանման միջոցը, նրան ազատ արձակել և ընտրել մեկ այլ խափանման միջոց։ Արդար չէ ներկայումս չհիշատակել հզոր համայնքապետի դերն ու նշանակությունը ողջ 44-օրյա պատերազմում, առավել ևս հիմա, երբ պետականության հիմքերն ամրացնելու անհրաժեշտությանն ենք լծված յուրաքանչյուրս» , - նշված է ավագանու տարածած հայտարարության մեջ։
***
ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը երեկ այցելել է Գորիս՝ ներկա գտնվելու Գորիսի համայնքապետ Առուշ Առուշանյանի գործով դատական նիստին։
«Եկել ենք աջակցելու, որպեսզի իրեն մենակ չզգա, իմանա, որ իր ընկերներն իր հետ են, իր կողքն են» ,- լրագրողների հետ զրույցում ասել է Լևոն Քոչարյանը։
Նա ասաց, թե Առուշ Առուշանյանի, Մխիթար Զաքարյանի և Մանվել Փարամազյանի հանդեպ իշխանությունը անձնական վրեժխնդրություն ունի. «Փոքրոգի, ճղճիմ մարդու վրեժխնդրություն է սա։ Այս իշխանությունն, իր ղեկավարով հանդերձ, ինչ-որ մոլուցք ունի՝ մեկ օր ավելի ընդդիմադիր մարդկանց բանտարկված պահելու։ Դա, կարծես, իրենց կյանքի նպատակը լինի»,-նշել է Քոչարյանը։
Նրա խոսքով՝ սյունեցի համայնքապետերին մեկուսացնելը կոնկրետ անվտանգային հարցեր է առաջացնում Սյունիքում։
«Բայց միամիտ պետք է լինել կարծելու համար, որ բանտարկելով Առուշին կամ մյուս տղաներին՝ կարող են ընկճել», - ասել է Լևոն Քոչարյանը։
***
«Մենք միշտ եղել ենք համախմբված համայնք, որտեղ ամբողջ համայնքը ներգրավված է եղել 44-օրյա պատերազմում: Երբ հոկտեմբերի 18-ին համայնքապետը կոչ հնչեցրեց, ԵԿՄ-ի հետ համատեղ ուժերով իրականացրեցինք ամբողջ ընթացքը: Բոլորդ էլ երևի տեսել եք թե սարքված խրամատները Փելա սարում, թե մնացած աշխատանքները»,-այ մասին էլ ասել է ԵԿՄ Քաջարանի տրածքային բաժանմունքի փոխնախագահ Հովհաննես Հարությունյանը:
Հարցին, ինչպե՞ս եղավ, որ մեր ուժերը Փելա սարից իջան, Հարությունյանը պատասխանել է. «Զինվորական բարձրագույն ղեկավարությունից եկան եւ ասացին, որ պետք է հանձնենք դիրքերը: հարցուպատասխանի ժամանակ մենք ասացինք, որ ճանապարհը գտնվելու է թշնամու թիրախի տակ, : Չլսեցինք, ասացին՝ մեկ է, պետք է հանձնեք: Դա եղել է երեւի դեկտեմբերի 17-18-ին:
Ես գիտեմ, որ Փելա սարի մի մասն արդեն հանձնվել էր հակառակորդին, մի մասում կանգնում էին ռուսները, մի մասում էլ մերոնք էին կանգնում: Ըստ երևույթին, դրանք էլ հանձնեցին»:
***
Նշենք աև, որ Սյունիքի մարզի ընդհանուր իրավասության դատարանի Գորիսի նստավայրում Գորիսի քաղաքապետ Առուշ Առուշանյանի և մյուսների գործով դատական նիստի ժամանակ երեկ՝ նոյեմբերի 29-ին, Քարահունջ համայնքի ղեկավար Լուսինե Ավետյանը հրաժարվեց Առուշ Առուշանյանի դեմ տված մեղադրական բնույթի ցուցմունքից:
Նա նշեց, որ Առուշանյանը ընդունել է բնակիչներին, լսել նրանց սոցիալական խնդիրների մասին, դրա հիման վրա օգնություն հատկացնելու մասին որոշում կայացրել. «Բազմաթիվ անգամ Առուշանյանը նույն բնակիչներին օգնել է և դա դիտել ընտրակաշառք անընդունելի է, զղջում եմ, որ սուտ ցուցմունք եմ տվել Առուշանյանի դեմ»,- նշել է Լուսինե Ավետյանը։
Նա պատմեց, որ հոգեբանորեն ճնշված է եղել Աբովյան քրեակատարողականում՝ ունենալով մի շարք հիվանդություններ, ստիպված է եղել նման ցուցմունք տալ։ Ավետյանի խոսքով, իրեն որևէ մեկը չի ճնշել այդպիսի ցուցմունք տալու համար։
Ավետյանը նշեց, որ իր ղեկավարած գյուղի բնակիչների նկատմամբ նույնպես ճնշում է եղել, որ հայտարարեն, թե Առուշանյանն իրենց ընտրակաշառք է տվել։
Ավետյանի խոսքով, ինքը սատարել է «Հայաստան» դաշինքին և իրականացրել է քարոզարշավ՝ օրենքի տառին համապատասխան։
Ամբաստանյալը պատասխանեց միայն պաշտպանական կողմի հարցադրումներին, կտրականապես հրաժարվեց պատասխանել դատախազի հարցերին։