Այլընտրանքային ճանապարհը շատ հեռու է լիարժեք լինելուց, բայց ինտենսիվ աշխատանքներ են գնում. Ռոբերտ Ղուկասյան. hraparak.am

Այլընտրանքային ճանապարհը շատ հեռու է լիարժեք լինելուց, բայց ինտենսիվ աշխատանքներ էին գնում։Այս մասին hraparak.am-ի հետ զրույցում ասել է Նիկոլ Փաշինյանի խորհրդական Ռոբերտ Ղուկասյանը, որը շուրջ 1 տարի է, կարելի է ասել՝ տեղափոխվել է Սյունիքի մարզ և Սյունիքում Նիկոլ Փաշինյանի ներկայացուցչի համարում ունի։

Պարոն Ղուկասյան, ինչպե՞ս է կյանքը Սյունիքի՝ շրջափակման մեջ հայտնված բնակավայրերում՝ Շուռնուխում, Որոտանում, Բարձրավանում։

Ես այժմ ավելի շատ Ծավի թեւի 6 բնակավայրերում եմ լինում, գիտեմ, որ, եթե չեմ սխալվում, սկսված օրից մինչև հիմա հացը տարվում-տրամադրվում է, ճանապարհների հետ էլ աշխատում են, ճանապարհներն են բարեկարգում։ Ինձ բոլորն էլ այդ գյուղերում ճանաչում են, դեռևս հատուկ ինչ-որ խնդրով չեն զանգել մարդիկ, բայց, ինչ խոսք, բազմաթիվ խնդիրներ կլինեն, որովհետև գիտեմ, որ վերջնական ավարտված չեն ճանապարհները, և այդտեղ պետք է որ խնդիրներ լինեն։

Իսկ այդ համայնքներում բնակիչները կարողանո՞ւմ են համայնքից դուրս գալ, այլ համայնքներ գնալ, ինչ-որ ճանապարհներ կա՞ն։

Շուռնուխից գիտեմ, որ Շուռնուխ-Տանձավերը կա, և Շուռնուխից դեպի Քաշունիով այդ ճանապարհն է, աշխատում են այնտեղ, նաեւ Շուռնուխից Որոտանով Խոտ գյուղը տանող ճանապարհը կա, Բարձրավանից էլ դեպի Տանձավեր գնացող ճանապարհը կա։ Ես մի 3 օր առաջ եմ այնտեղ եղել, տեխնիկան աշխատում էր, վարչական ղեկավարների հետ միշտ կապի մեջ եմ, գիտեմ, որ ինտենսիվ կառուցվում են ճանապարհները, մնացած բոլոր տեսակի խնդիրները, որ զանգում-բարձրաձայնում են, փորձում եմ դրանց օպերատիվ լուծումներ տալ։ Եթե չեմ սխալվում, այնտեղ «ՈւԱԶ» մեքենաներ էլ են տրամադրվել, եւ նաեւ 2 «ԿամԱԶ»-ներ կան, որ հրատապ դեպքերում օգնում են։ Այլ բան այս 3 գյուղերում գոնե ինձ չեն ասել վարչական ղեկավարները։ Իսկ մնացածը, բնական է, կյանքն այս պահին ավելի դժվարացել է։

Կապված միջանցքի կամ ճանապարհի հետ՝ բնակիչները Ձեզ դիմո՞ւմ են մտահոգություններով, իրենց ի՞նչ եք պատասխանում։

Ինձ իրականում բնակիչները չեն դիմում, որովհետև ես հունվարի 4-ից եմ այստեղ, իրենք շատ լավ գիտեն, թե որն է իմ առաքելությունը՝ մաքսիմում իրենց օգնելը, կյանքն ավելի լավ դարձնելը։ Ինձ չեն դիմում, բայց հատկապես եթե համացանցում դա շատ է տարածվում, իհարկե։ Ես գիտեմ, որ «միջանցք» բառը նույնիսկ չի ընդունվում հայկական կողմից, մնացածն իրավասու մարդիկ պետք է պատասխանեն, կոմպետենտության խնդիր է։

Արդեն համարյա 1 տարի է՝ Դուք Սյունիքում եք ապրում եւ ասում եք, որ Ձեր առաքելությունը գիտեն։ Ո՞րն է Ձեր առաքելությունը, չէ՞ որ Դուք վարչապետի խորհրդական եք։

Հրատապ խնդիրները, սոցիալ-տնտեսական, նաեւ անվտանգային որոշ խնդիրներ կան, որոնք միջգերատեսչականով են անում, բնականաբար, հիմնական գործառույթները նախարարություններն են անում, բայց հրատապ լուծում պահանջող բազմաթիվ խնդիրներ ստանում են լուծումներ։ Խոսքը չի վերաբերում հիմնական գործառույթներին, բայց տարբեր ոլորտներում լինում են հրատապ դեպքեր, որոնց մենք արագ արձագանքում ենք եւ լուծումներ ենք տալիս։ Խնդիրները, որոնք ի հայտ են գալիս, փորձում եմ տեղում միջգերատեսչականի շրջանակներում լուծել, իսկ որպես մարդ՝ գրեթե միշտ այնտեղ եմ, ժամանակի գրեթե 98 տոկոսն այնտեղ եմ, որովհետեւ կարծում եմ, որ ճիշտը հենց այդ տարբերակն է՝ մնալ այնտեղ եւ փորձել տեղում խնդիրները լուծել եւ համակարգել որոշ խնդիրներ։ Բազմաթիվ ծրագրեր առաջ ենք տանում, ինչքան հնարավոր է՝ ժամանակի մեջ փորձում ենք խնդիրներին լուծումներ տալ։

Ասում են, որ համայնքներին տրվող դրամական միջոցները Դուք եք բաշխում, Դուք եք որոշում, թե որ համայնքում ինչ չափի օգնություն տրվի։

Դրամական օգնություն համայնքներին միջգերատեսչականով չի եղել, չկա, եւ չեմ կարծում, որ կլինի։ Դա բացառված է։ Կա ընդամենը 2 դեպք, ուղղակի անունները չեմ տա, 1-ը կապված է երեխայի հետ, երեխան առողջական խնդիրներ ուներ, այդտեղ է մեկ ընտանիքին գումար տրվել, եւ մեկը տունը կորցրել էր, եւ երեխաների ուսման վարձի հետ կապված հրատապ խնդիր է եղել, դա ենք արել։ Հիմա ծրագրեր ենք իրականացնում, դրանք թե՛ զարգացման կենտրոններ են, թե՛ գյուղատնտեսական ոլորտի տարբեր ծրագրեր են, բայց բացառված է, որ բնակիչներին գումար հատկացվի։ Իհարկե, խոսքը չի վերաբերում նրան, որ, օրինակ, անասունն անցնում է հակառակորդի կողմը եւ չի վերադառնում, փոխհատուցումներ են տրամադրվում։ Բնականաբար, դա աջակցության հետ կապ չունի, նույնը՝ Շուռնուխում․ տները կորցրած մարդկանց ամսական վճարներ կան։ Համացանցում շատ են ասում, որ գումար է բաժանվել, նպաստներ կան․․․, դա բացառված է, չկա նման բան։

Ասում են, որ մարզում մեկ տարի է՝ դե ֆակտո մարզպետը Դուք եք, Դուք եք որոշումներ կայացնում։ Ինչպե՞ս կմեկնաբանեք։

Եկեք ես չմեկնաբանեմ, էլի, որովհետեւ դա իրականությանը, բնականաբար, չի համապատասխանում, ես ոչ միայն որպես վարչապետի խորհրդական, այլեւ որպես մարդ, որը շատ լավ հասկանում է խնդիրները, ամեն ինչ անում եմ, որպեսզի օգնեմ մարդկանց։ Չգիտեմ նույնիսկ, թե ինչպես արձագանքեմ։ Այդ խոսակցություններն ինձ համար անլուրջ բան են։

Շարունակելով ճանապարհների թեման՝ երեկ տեսանյութ տարածվեց Կապան-Ճակատեն ճանապարհից, որտեղ դիակն ընկել էր մեքենայից՝ ճանապարհի անանցանելիության պատճառով։

Դա ավելի շատ Գեղանուշ-Ճակատեն ճանապարհն է։ Ես այդ օրը, ճիշտ ասած, Ճակատենում եմ եղել․․․, ինձ ասել են, որ մամուլում կա նման բան, չգիտեմ։

Այդ ճանապարհներն ընդհանրապես երթեւեկելի՞ են։

Այն ճանապարհները, որոնք կառուցվում են, երթեւեկելի են ամենագնացների համար, բայց հիմա այդ ճանապարհը խճապատվում է։ Մյուսն էլ Մեղրիով է, բոլորին հայտնի, Շվանիձորով գնում է Մեղրի։ Այդտեղ փորձել եմ ամեն ինչ անել, բոլոր խնդիրները, որոնք բարձրաձայնվում են, օպերատիվ լուծումներ են ստանում։ Տրամադրել ենք նաեւ անհրաժեշտ քանակի վառելիք՝ տարբեր տեսակի, նաեւ վարչական շենքերում ենք թողել, որպեսզի, եթե պակասի, օգտագործեն։ Շարժական գազն է գնացել այնտեղ, որպեսզի մեքենաները լիցքավորվեն, վաղը, կարծում եմ, հեղուկ գազը կհասնի։ Բոլոր տեղերում, երբ մարդկանց ինչ-որ բան է պետք լինում, վարչական ղեկավարներին են ասում, համակարգում, կազմակերպում ենք, որ ժամանակին հասնի։ Այսինքն՝ ստեղծված իրավիճակում անում ենք ամեն ինչ, որ մարդիկ իրենց շատ նեղված չզգան, եւ կարծում եմ՝ պիտի այսպես անենք, մինչեւ այլընտրանքային ճանապարհը սկսի լիարժեք գործել։

Ե՞րբ կսկսի գործել, աշխատանքներն ի՞նչ փուլում են։

Ես մի քանի օր առաջ այնտեղ ոտքով քայլել եմ, բնականաբար, ասել, որ ճանապարհը լիարժեք է, շատ հեռու է լիարժեք լինելուց, բայց ինտենսիվ աշխատանքներ էին գնում։ Ես մեքենայով էլ եմ անցել, բարդ ճանապարհ է, եւ քանի որ աշխատանքներ են իրականացվում, դա հավելյալ էլի բարդացնում է, բայց համապատասխան մարմինները խոստացել էին, որ 2-3 օրվա մեջ կխճապատեն, եւ փակված ճանապարհին զուգահեռ ճանապարհը կսկսի գործել, որը կդառնա հիմնական։

Հիմնական Գորիս-Կապան ճանապարհին ադրբեջանցիները մաքսակետ կառուցեցին, այդ ճանապարհով որեւէ մեքենա երթեւեկե՞լ է։

Քանի որ վերջին մի շաբաթում Ճակատենի թեւի գյուղերում եմ եղել, չեմ կարող ասել, թե ինչ թողունակությամբ են մեքենաներ գնում, ես գիտեմ, որ Տաթեւ-Աղվանիով անցնում են պարսկական մեքենաներ, մյուս կողմի վերաբերյալ հիմա ինչ էլ ասեմ, պիտի լինի կարծիք, որովհետեւ վստահ չեմ՝ գնո՞ւմ են կամ ի՞նչ քանակությամբ են գնում։ Այն, ինչ որ ես իմացել եմ վերջին անգամ, ժամը մեկ՝ ռուսական կողմի ուղեկցությամբ, մեքենաներն անցնում են։ Կդժվարանամ ասել՝ այս օրերին ինտենսիվությունը փոխվե՞լ է, թե՞ ոչ։