Սաակաշվիլին ասել է, որ իրեն Պուտինի հրամանով են տեղափոխել բանտային հիվանդանոց
Վրաստանի հատուկ քրեակատարողական ծառայությունը նախկին նախագահ Միխեիլ Սաակաշվիլիի մասնակցությամբ տեսանյութ է հրապարակել, որում նրան ուժով քարշ են տալիս բանտային հիվանդանոցի բաժանմունք։ Ի պատասխան՝ քաղաքական գործիչը վիճաբանում է պահակների հետ և փորձում հարվածել նրանց, ինչպես նաև ջարդում է տեխնիկան, գրում է «ՌԻԱ Նովոստի»-ն։
Սաակաշվիլին երկար հացադուլից հետո առողջական վիճակի պատճառով Ռուսթավիի բանտից տեղափոխվել է Գլդանիի բանտային հիվանդանոց։ Փաստաբանները նշում են, որ երկրի նախկին ղեկավարին խաբել են՝ խոստանալով նրան տեղավորել Թբիլիսիի քաղաքացիական կլինիկա, ինչն առաջացրել է նրա դժգոհությունը։
Հայտնվել է նաև մի տեսանյութ, որտեղ երևում է, թե ինչպես է քաղաքական գործիչը հրաժարվում լքել շտապօգնության մեքենան, որով նրան տեղափոխել են Գլդանիի բանտի հիվանդանոց։ Կադրերում լսվում է, թե ինչպես է նա իրեն մեքենայից իջնել հորդորող իրավապահներին անվանում ռուսական շահերին ծառայողներ։ Սաակաշվիլիի խոսքով՝ իրենք կատարում են ՌԴ նախագահ Վլադիմիր Պուտինի հրամանները։
«Դուք մարդիկ չեք, դուք մարդասպաններ եք, ես իմ կամքով չեմ հեռանա այստեղից, ինձ հետ տարեք Ռուսթավիի բանտ ..., ինձ ձեր խոսակցությունները չեն հետաքրքրում»,- բարկանում է բանտարկյալը։
Սաակաշվիլին ձերբակալվել է Վրաստանում հոկտեմբերի 1-ին: Միաժամանակ, Վրաստանի օմբուդսմեն Նինո Լոմջարիան հայտարարել էր, որ ձերբակալությունից հետո նա հացադուլ էր սկսել, քանի որ համաձայն չէ առաջադրված մեղադրանքների հետ և իրեն համարում է քաղբանտարկյալ: Վրաստանում Սաակաշվիլին ներգրավված է մի քանի քրեական գործերում: Նախկին նախագահը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիի ծեծի համար: Առաջին դեպքում նա դատապարտվել է երեք տարվա ազատազրկման, երկրորդում՝ վեցի: Բացի այդ, Սաակաշվիլին ներգրավված է 2007 թվականի նոյեմբերի 7-ին ընդդիմության հանրահավաքը ցրելու, «Իմեդի» հեռուստաընկերության ջարդի և պետական բյուջեից միջոցների յուրացման գործերում: Դրանք դեռ դատարանում են: