Սաակաշվիլին պատրաստ է դադարեցնել հացադուլը, սակայն մի պայմանով
Վրաստանի նախկին նախագահ Միխեիլ Սաակաշվիլին պատրաստ է դադարեցնել հացադուլը, բայց միևնույն ժամանակ առաջ է քաշում որոշակի պայմաններ, հայտարարել է նրա փաստաբան Նիկա Գվարամիան, գրում է sputnik-georgia.ru-ն։
Նոյեմբերի 10-ին ՄԻԵԴ-ը պարտավորեցրել է Վրաստանի իշխանություններին ապահովել երկրի նախկին նախագահ Միխայիլ Սահակաշվիլիի համարժեք բուժումն ու անվտանգությունը, ինչպես նաև տեղեկացնել դատարանին նրա վիճակի մասին։ Իսկ դիմումատու Սահակաշվիլիին կոչ է արվել դադարեցնել հացադուլը։
«Ես որոշեցի հաշվի առնել Ստրասբուրգի Մարդու իրավունքների դատարանի, ինչպես նաև մեր արևմտյան գործընկերների կոչը՝ հացադուլը դադարեցնելու վերաբերյալ։
Նրա խոսքով, քանի որ հացադուլից հետո վերականգնողական գործընթացը շատ բարդ է, և Գլդանիի բանտի հիվանդանոցում չկան տեխնոլոգիական պայմաններ, որակյալ բուժանձնակազմ և անվտանգության երաշխիքներ, պետք է որոշում կայացվի նրան տեղափոխել բազմաֆունկցիոնալ կլինիկա:
Որոշումը պետք է կայացնի բժիշկների խորհուրդը, որը բաղկացած կլինի հավասարապես ինչպես Սաակաշվիլիի, այնպես էլ իշխանությունների կողմից առաջարկվող ներկայացուցիչներից։
42 օր առաջ հացադուլ հայտարարած Սաակաշվիլիին Ռուսթավիի թիվ 12 բանտից տեղափոխել են Թբիլիսիի Գլդանի բանտի թիվ 18 հիվանդանոց։
Սաակաշվիլին ձերբակալվել է Վրաստանում հոկտեմբերի 1-ին: Միաժամանակ, Վրաստանի օմբուդսմեն Նինո Լոմջարիան հայտարարել էր, որ ձերբակալությունից հետո նա հացադուլ էր սկսել, քանի որ համաձայն չէ առաջադրված մեղադրանքների հետ և իրեն համարում է քաղբանտարկյալ: Վրաստանում Սաակաշվիլին ներգրավված է մի քանի քրեական գործերում: Նախկին նախագահը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիի ծեծի համար: Առաջին դեպքում նա դատապարտվել է երեք տարվա ազատազրկման, երկրորդում՝ վեցի: Բացի այդ, Սաակաշվիլին ներգրավված է 2007 թվականի նոյեմբերի 7-ին ընդդիմության հանրահավաքը ցրելու, «Իմեդի» հեռուստաընկերության ջարդի և պետական բյուջեից միջոցների յուրացման գործերում: Դրանք դեռ դատարանում են: