CO2-ի գլոբալ արտանետումները վերադառնում են 2019թ. մակարդակին

COVID-19 պանդեմիայի ընթացքում նկատելի անկումից հետո գլոբալ արտանետումները վերադարձել են 2019 թվականի մակարդակին։ Այս մասին ասվում է Global Carbon Project-ի զեկույցում։ Վերլուծության համաձայն՝ անցած տարի ածխաթթու գազի գլոբալ արտանետումները նվազել են 5,4 տոկոսով, սակայն այժմ կանխատեսվում է, որ 2020 թվականին կհասնեն 4,9 տոկոսի:

«Անցյալ տարվա կտրուկ անկումից հետո CO2 արտանետումների արագ վերականգնումը չպետք է զարմանք առաջացնի։ Աշխարհում ուժեղ տնտեսական վերականգնումը առաջացրել է էներգիայի պահանջարկի կտրուկ աճ, եւ համաշխարհային էներգետիկ համակարգը նախկինի պես շարունակում է մեծապես կախված մնալ հանածո վառելիքից»,-գրում են հետազոտողները:

Զեկույցի համաձայն՝ բոլոր տեսակի հանածո վառելիքներից՝ ածուխից, նավթից եւ բնական գազից արտանետումներն այս տարի ավելացել են։ Ածխի արտանետումները նվազել են մինչեւ մինչքովիդային մակարդակի։ «Նավթի գլոբալ օգտագործումից CO2 արտանետումները մնում են մինչքովիդային մակարդակից ցածր, սակայն ակնկալվում է, որ առաջիկա տարիներին կավելանան, քանի որ ճանապարհային տրանսպորտը եւ ավիացիան վերականգնվում են COVID-ի հետ կապված սահմանափակումներից հետո»,-նշում են հետազոտողները:

Global Carbon Project-ի ուսումնասիրությունը ցույց է տվել, որ Չինաստանը, որն աշխարհում ածխաթթու գազ արտանետող ամենախոշոր աղբյուրն է, հավանաբար ամենամեծ ներդրումն է ունենալու արտանետումների արագ աճի մեջ։ Կանխատեսվում է, որ Հնդկաստանի արտանետումները կաճեն նույնիսկ ավելի արագ, քան Չինաստանինը, ընդ որում ակնկալվում է, որ մակարդակը կաճի 4,4 տոկոսով՝ 2019 թվականի համեմատ։ Ակնկալվում է, որ ԱՄՆ-ի եւ Եվրամիության արտանետումները այս տարի կաճեն 7,6 տոկոսով, ինչը մոտ 4 տոկոսով ցածր է 2019 թվականի մակարդակից: