Մենք չենք արել մի բան, ինչի համար զղջանք կամ հետ կանգնենք. Գագիկ Առուշանյան

ArmDaily.am-ի զրուցակիցն է Գորիսի համայնքապետ Առուշ Առուշանյանի հայր Գագիկ Առուշանյանը:

-Ձեր դեմ քրեական գործ հարուցվեց ինչի մասին տեղեկացաք միայն ընտրությունների օրը, երբ «Առուշ Առուշանյան» դաշինքի կենտրոնական շտաբ ներխուժեցին կարմիրբերատավորները: Ինչպե՞ս եք մեկնաբանում Ձեր դեմ հարուցված քրեական գործը:

-Հումորով: Ինձ չեն կանչել հարցաքննության, եթե կանչեն էլ, ապա անարդյունք կլինի, քանի որ այդ մեղադրանքը անլուրջ է՝ դա իրենք էլ լավ գիտեն: Նրանց պետք էր ընդամենը խաթարել շտաբի աշխատանքները, որը իրենց հաջողվեց, բայց անօգուտ: Դա չէր կարող փոխել մեր ժողովրդի կարծիքը:

-«Հայաստան» խմբակցության պատգամավոր Դավիթ Սեդրակյանը վայր է դնում իր պատգամավորական մանդատը: Ցուցակում հաջորդը Ձեր որդին է: Նա կվերցնի՞ պատգամավորական մանդատը, թե կնախընտրի մնալ Գորիսի համայնքապետ:

-Իհարկե չի վերցնի, քանի որ Առուշը գործի մարդ է, նա չի գնա օրենսդիր, ինքը կմնա մեր ժողովրդի հետ և այն, ինչը մտածել է տարիներ առաջ, այն էլ կիրագործի՝ այսինքն կշենացնի մեր չքնաղ Գորիսը: Դեռ 16 տարեկանում էր ասում, երբ վերադարձավ Մոնակոյից, ասում էր՝ մեծանամ, Գորիսը կդարձնեմ Մոնակո: Իսկ ես ասում էի՝ իսկ ծովը, նա էլ ասում էր՝ մեր ժայռերը ծովից էլ սիրուն են: Ուզում եմ ասել,որ ինքը օրենսդիրում անելիք չունի, ժողովրդի ծոցից ելածը կմնա ժողովրդի հետ ու կշենացնի մեր չքնաղ Գորիսը:

-Լուրեր են պտտվում, որ նոյեմբերի 5-ից հետո, ամենայն հավանականությամբ, Առուշ Առուշանյանին բաց կթողնեն: Եթե դա չլինի, Գորիս համայնքի գործունեությունը Ձեր որդին շարունակելո՞ւ է կալանավայրից, ինչպես այս վերջին ամիսներին:

-Ինձ թվում է իրեն բաց կթողնեն, քանի որ չկա այնպիսի մեղադրանք, որը կարող է ազդել ու պահել իրեն, քանի որ նման մեղադրանքի համար հիմք չկա: Միակ դեմ ցուցմունքը, որը սուտ է ու չի եղել նման բան այդ կինը վախից, չգիտեմ ինչու է նման ցուցմունք է տվել: Դա Առուշի ձևի չի, Առուշն իրեն նման բան թույլ չի տա, որ տարեք, տվեք՝ թող ընտրեն: Դա մեր ձևը չի, մենք գործով ենք ապացուցում, որ կարելի է ընտրել: Առուշը ծնվել է ու լսել է իր պապերի արած գործերի մասին: Առուշը ճառ ասող չի՝ ինքը գործի մարդ է, ինքը տեսել է ոնց ենք քարը քարին դնելով շենացրել: Սրանից հարյուր տարի առաջ Առուշի պապն է եղել Խնձորեսկի ու շրջակա գյուղերի տանուտերը՝ Հայրապետ Առուշանյանցը, ով որ անմիջական մասնակցություն է ունեցել ու իրականացրել սահմանզատումը: Հետաքրքիր առաքելությամբ այսօր թոռը շարունակում է պապի գործը ու կարծում եմ՝ շատ արդյունավետ կլինի այդ գործը: 1918 թվականի հոկտեմբերի 2-ին իմ պապը Անդրանիկ Զորավարին է նամակով դիմել՝ Սյունիքը պաշտպանելու համար: Մենք կարիք չունեինք ինչ-որ մեկին բարեխոսելու, ինչ-որ բան առաջարկելու:



-Մամուլում տեղեկություններ սկսեցին պտտվել, որ Առուշ Առուշանյանը իշխանությունների հետ գործարքի է գնացել: Ի՞նչու սկսեցին նման լուրեր տարածել, ո՞րն էր նպատակը:

-Ընդամենը փորձում են Առուշի իմիջը գցել, որ հետ է կանգնում, բայց մենք չենք արել մի բան, ինչի համար զղջանք կամ հետ կանգնենք: Մեր հարցը պարզ է եղել՝ ինչի՞, ո՞նց եղավ, որ թուրքը եկավ կանգնեց Գորիսի գլխին կամ ճանապարհները փակեց: Պատերազմը, որտեղ ավարտվել էր՝ մինչև 18 -25 կմ տարածք կար՝ մինչև նույն ճանապարհը, նույն Սև լիճը: Մենք հետ կանգնելու պատճառ չունենք, մենք ընդամենը ցանկացել ենք, որ ապահով լինի մեր երկիրը, մեր սահմանները, որ անվտանգային գոտի ստեղծվեր: Որոտանի ճանապարհից մինչև Արցախի Սանասարի շրջան (Կուբաթլու) 28 կմ ազատ գոտի կար այն պահին, երբ պատերազմն ավարտվել էր: Անհասկանալի էր, թե ո՞նց դա տվեցին, քանի որ եռակողմ հայտարարությամբ նման բան չկար, որտեղ որ պատերազմն ավարտվում էր, այնտեղ էլ սահման էր դառնում: Բայց չգիտեմ ինչ պայմանավորվածությունների համաձայն բերեցին, հասցրին, խառնեցին մեզ թուրքի հետ: Այսօր ճանապարհ չունենք, այսօր Գորիսի գլխին են կանգնած թուրքերը ու ոչ մի բան չի արվում դրան հակադարձելու համար: Նշեմ, որ մեր սահմանը Քուռ-Արաքսի հովիտն է, եթե ոչ մինչև Բակուրակերտ՝ Բաքու: Հիմա առաջնորդվում են կոմունիստների ժամանակների քարտեզներով, որտեղ Որոտանն ու Սև լիճը կամ Շուռնուխի կեսը չի կարող մտնել Ադրբեջանի տարածքի մեջ: Իմ տարեկիցները լավ գիտեն, որ նման բան չի եղել: Երիտասարդներին կարող են խաբել, բայց ոչ իմ տարեկիցներին:

-Ի՞նչ ցույց տվեցին այս ընտրությունները:

-Որ ժողովուրդն իմաստուն է ու գիտի՝ ո՞ւմ հետ ճանապարհ գնա, թե ո՞վ կարող է քաղաքն ու գյուղը շենացնել: Գոնե մի ծառ այդ մյուս թեկնածուները կամ իրենց պաշտպանները տնկած կա՞ն իրենց ապուպապերով հանդերձ, իսկ մենք ապուպապերով ստեղծող մարդիկ ենք եղել, քարը քարին դնող մարդիկ ենք եղել: Ժողովուրդն իմաստուն է, ժողովուրդը լավ գիտի՝ ո՞վ և ինչի՞ համար է գնում իշխանության: