Մոսկվայում Փաշինյանը հայ համայնքի, այդ թվում գործարարների հետ հանդիպում չի ունեցել, մինչդեռ շատ հարցեր ունեին.1in.am

1in.am-ը գրում է.

Մամուլի տեղեկություններով վերջերս Նիկոլ Փաշինյանի՝ Մոսկվա կատարած այցը չի սահմանափակվել միայն պաշտոնական հանդիպումներով. եղել է նաև ոչ պաշտոնական, կամ, այսպես ասած, կուլիսային հանդիպումների մի ամբողջ շղթա։

Փաշինյանը Մոսկվայում մասնավորաբար հանդիպել է մոսկվայաբնակ հայ գործարար շրջանակների որոշ ներկայացուցիչների հետ և փորձել է նրանց ամեն կերպ համոզել, որ այս փուլում ակտիվանան, քանի որ շատ կարևոր անցումային շրջան է, և Հայաստանը լուրջ ներդրումների և հավել յալ ֆինանսական հոսքերի կարիք ունի։ Սակայն նա մեծ հաջողությունների չի հասել:

Այս առնչությամբ «Առաջին լրատվական»-ի հետ զրույցում «Russia-armenia.info» լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ, հասարակական գործիչ Արամ Խաչատրյանը նշեց, որ իր տեղեկություններով այդպիսի հանդիպումներ չեն եղել:

«Մենք սպասում էինք, որ Նիկոլ Փաշինյանը հանդիպումներ պետք է ունենար նաև հայկական համայնքի հետ, բայց իմ տեղեկություններով այդպիսի հանդիպումներ չեն եղել, ես որևէ տեղեկություն չունեմ որևէ գաղտնի հանդիպման մասին: Գուցե եղել են, բայց ես որպես հայկական համայնքի ակտիվ ներկայացուցիչ, դրանցից տեղյակ չեմ»,-ասաց նա:

Արամ Խաչատրյանի խոսքով, երկու շաբաթ առաջ Մոսկվա էր եկել ԱԺ նախագահ Ալեն Սիմոնյանի գլխավորած պատվիրակությունը, հանդիպումներ էին ունեցել ՌԴ խորհրդարանի ներկայացուցիչների հետ. «Նաև հանդիպում էր եղել դեսպանատանը, շատ մարդիկ էին եկել: Անգամ Կարասինն էր եկել, որը Ռուսաստանի ԱԳ փոխնախարար է եղել, նաև Դաշնային խորհրդում միջազգային կապերի գծով կոմիտեի ղեկավարն էր: Շատ հոյակապ հանդիպումներ էին եղել: Դրանից մի քանի օր առաջ Ալեն Սիմոնյանի գլխավորած պատվիրակությունը Մոսկվայում հանդիպում է ունեցել նաև հայկական համայնքների հետ: Իսկ Փաշինյանի մասին մենք տեղեկություններ չունենք: Մենք հարցեր կտայինք Հայաստանի դրության մասին, Հայաստան-Սփյուռք կապերի մասին, որը վերջին 3 տարում ավելի է վատացել:

Իմ տեղեկություններով կան հայ գործարարներ, որոնք օգնում են Հայաստանին, ունեն փոքր ծրագրեր, բայց իրենց կայունության երաշխիքներ են պետք: Մենք ամեն օր լսում ենք, որ Ադրբեջանն այս արեն, այն արեց, իսկ Հայաստանը չի պատասխանում: Դա մեզ հիասթափեցնում է, որովհետև մենք ուզում ենք տեսնել ուժեղ, հզոր Հայաստան, որը կասի իր խոսքը:

Մենք չունենք համակարգող մարմին, որը կհամակարգի հայ գործարարների ներդրումները Հայաստանում: Շատերն են ուզում ներդրումներ անել: Նախկինում կար Սփյուռքի նախարարություն, հիմա կա Սփյուռքի հարցերով հանձնակատար, իրենք պետք է փոխգործակցեն, իրենց կառույցում ունենային մարմին կամ լիազորված պաշտոնյա, որը կզբաղվեր ներդրումների հարցերով»,-ասաց նա:

Արամ Խաչատրյանը տեղեկացրեց, որ հոկտեմբերի 18-ին Մոսկվայում փակ հանդիպում են ունեցել Արցախի պետնախարար Արտակ Բեգլարյանի հետ. «Շուրջ 20 հոգի տարբեր հիմնադրամներից, քաղաքագետներ, հասարակական գործիչներ, լրագրողներ: Նա Մոսկվայից հետո մեկնելու է ԱՄՆ՝ հայկական համայնքների հետ հանդիպելու»:

ՏԵՍԱՆՅՈՒԹԵՐ