Ծառ տնկելու նոր մշակույթ Հայաստանում

«Նոյեմբերի 14-ին նախատեսված աշնանային համապետական ծառատունկին ընդառաջ այսօր Շրջակա միջավայրի նախարարությունում խորհրդակցություն-քննարկում է անցկացվել»՝ Ֆեյսբուքի իր էջում տեղեկացրել է շրջակա միջավայրի նախարար Ռոմանոս Պետրոսյանը:

«Քննարկվել են համապետական ծառատունկը պատշաճ կազմակերպելու վերաբերյալ մի շարք օրակարգային հարցեր՝ տարածքները, որտեղ կիրականացվի ծառատունկ, տնկիների, մարդկային և տեխնիկական ռեսուրսի հավասարաչափ բաշխմանը վերաբերող հարցեր։

Իմ առաջարկով աշնանային ծառատունկի ընթացքում կիրականացվի ձևաչափային փոփոխություն-նորամուծություն, որը միտված է հասարակության մեջ բնության հանդեպ սրտացավ ու հոգատար վարքագծի ձևավորմանը և յուրաքանչյուր քաղաքացու՝ շրջակա միջավայրի խնդիրների լուծմանը մաս դարձնելուն։

Այս ծառատունկի ընթացքում տարբեր կազմակերպությունների և ընկերությունների անվճար տնկիներ և տարածքներ կհատկացվեն, որտեղ նրանք կարող են համապետական ծառատունկի օրը ծառատունկ իրականացնել։ Առաջիկա օրերին նախարարությունը կիրազեկի մասնակցության և դիմելու ձևաչափի վերաբերյալ՝ տրամադրելով տունկը համակարգողների կոնտակտներ։

Նոյեմբերի 14-ի համապետական ծառատունկի ընթացքում նախատեսվում է․

Շուրջ 200.000 փակ արմատային համակարգով տնկի հատկացնել «Հայանտառ» ՊՈԱԿ-ի «Անտառտնտեսություն» մասնաճյուղերի տնկարկներում նախանշված տարածքներում տնկելու համար,

50.000 տնկի՝ մարզպետարաններին՝ տեղական ինքնակառավարման մարմինների հետ համատեղ համայնքային հողերում ծառատունկ իրականացնելու համար,

10.000 տնկի՝ դիմումատու կազմակերպություններին ու ընկերություններին՝ «Հայանտառ» ՊՈԱԿ-ի կողմից նախանշած տարածքներում տնկելու համար։
Խորհրդակցությանը մասնակցել են Շրջակա միջավայրի նախարարի տեղակալ Գ․ Գաբրիելյանը, նախարարության գլխավոր քարտուղար Գ․ Գուլյանը, նախարարի՝ ոլորտը համակարգող նորանշանակ խորհրդական Ս․ Գրիգորյանը, նախարարության Անտառային քաղաքականության վարչության պետի ժ/պ Ա․ Սահակյանը, Անտառային կոմիտեի նախագահի ժ/պ Ա․ Պետրոսյանը, «Հայանտառ» ՊՈԱԿ-ի տնօրենի ժ/պ Պ․ Ցուգունյանը, «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի ժ/պ Լ․ Ազիզյանը և ՊՈԱԿ-ների մասնագիտական ստորաբաժանումների ներկայացուցիչներ։

Իմ կողմից տրվել են մի շարք հանձնարարականներ՝ ծառատունկի աշխատանքներն առավելագույնս արդյունավետ իրականացնելու համար։ Հանձնարարել եմ առանձնակի ուշադրություն դարձնել ծառատունկի համար հատկացված տնկանյութի մատակարարումը ճշգրիտ կազմակերպելուն»,- գրել է Ռոմանոս Պետրոսյանը: