Մահ Իմացյալ՝ Անմահություն. Մեր անմահ Հերոսներին նվիրված հուշակոթող Նուբարաշենում. Հարգում ենք, հիշում, հպարտանում (Լուսանկարներ և տեսանյութ)

Օրեր առաջ Նուբարաշենի խճ. 2րդ շենքի հարևանությամբ տեղի ունեցավ մեր անմահ Հերոսներին նվիրված ևս մեկ հուշակոթողի բացման արարողություն։

Բոլորը հավաքվել էին մի շատ կարևոր գործի և առաքելության համար` հարգելու մեր հերոսների հիշատակը և բարձրաձայնելու նրանց սխրանքը։

Այս բակում անցել է հերոսներից 8ի կյանքի մի մասը` մի քանիսի մանկությունը, ոմանց պատանեկությունը, ոմանց էլ ամբողջ կյանքը։

Նրանք արիաբար, թողնելով իրենց կյանքի նպատակները, կյանքը զեհեցին հանուն մեզ, հանուն մեր վաղվա օրվա, հանուն հայրենիքի, հանուն այս բակերում կերտած նրանց մանկական հիշողությունների։

Համբարձումյան Ռուբեն

Հովհաննիսյան Ռոբերտ

Հարությունյան Գրիգոր

Մանուկյան Մարատ

ԳևորգյաՆ Նարեկ

Բաբայան Կարեն

ՎարդանյաՆ Հայկ

Վիրաբյան Դավիթ

Արարողությանը ներկա էին Հերոսների մայրեր, հայրեր և ոչ միայն...

Արարողության մասնակից էին Դավիթ Ամալյանը, ով ևս ՀԵՐՈՍԻ հայր է, նա իր «Պատիվ ունեմ» կատարումն ու խոսքն ուղղեց տղաներին:

Նանե Արզումանյանը, ով ՀԵՐՈՍ հրամանատար, կապիտան Արտուշ Արզումանյանի քույրն է, շատ մեծ սիրով ընդունել էր միջոցառումը վարելու հրավերը

Միջոցառմանը մասնակցում էին նաև Իսահակ Բուլանիկյանը, ով կատարեց ՀԵՐՈՍ Ռուբեն Համբարձումյանին նվիրված երգը, Եվա Աբրահամյանը և Նարե Գևորգյանը:

Հիշեցնենք, Ռուբեն Կարենի Համբարձումյանը ծնվել է 2001-ի հունիսի 25-ին Երևանում։ 2019թ․-ին ընդունվել է Երևանի պետական համալսարանի Ինֆորմատիկայի և կիրառական մաթեմատիկայի ֆակուլտետ։ Ռուբենը Վիկտոր Համբարձումյանի եղբոր թոռն էր և ժառանգել էր նաև Ֆիզիկա-մաթեմատիկա առարկաների հանդեպ սերն ու ունակությունները։
2019թ․ հուլիսի 26-ին զորակոչվել է բանակ։ Ծառայել է Մարտունի քաղաքում՝ Մոնթե Մելքոնյանի անվան զորամասում: Զորակոչվելուց հետո դարձել է Ավագ հետախույզ, ապա հրետանավոր։

Ծառայության 6-րդ ամսում ուղարկվել է սերժանտական դասընթացների, որից հետո ստացել է կրտսեր սերժանտի կոչում։ Ապա ծառայության բարձր որակի համար սեպտեմբերի 12-ին ստացել է սերժանտի կոչում։Պարգևատրվել է "Քաջարի մարտիկ"կրծքանշանով։

Մաթեմատիկայի և հաշվարկային գերազանց հմտությունների շնորհիվ դարձել է D20 հրետանային դիվիզիոնի կառավարման դասակի շտաբի պետի հաշվարկող։
Պատերազմի ընթացքում Ռուբենի հաշվարկած թիրախների կորդինատներով բացարձակ ճշգրտությամբ ոչնչացվել է թշնամու ահռելի թվով զրահատեղնիկա։Կառավարել է ամբողջ դիվիզիոնի հրետանիները։ Մասնակցել է Մարտունու թեժ մարտերին։
Հոկտեմբերի 2-ին վիրավորվել է՝ ստացել է կանտուզիա, և, հանելով երկու ընկերներին կրակային գոտուց,փրկել է նրանց կյանքը: Մի քանի օր բուժում ստանալուց հետո՝ ոչ լիովին ապաքինված նորից անցել է ծառայության։

Այժմ Երևանի պետական համալսարանի ԻԿՄ բաժնում գործում է Ռուբենի անվամբ կրթամրցանակ:
Պարգևատրվել է "Արիության" մեդալով։

Զոհվել է հոկտեմբերի 22-ին՝ Մարտունիում հայրենիքի պաշտպանության համար մղված մարտերում:

Տեսանյութը՝ այս հղումով: