Կան պատասխանատուներ, որոնց պարտականությունն է վերլուծել պարտության պատճառները. ՀՀ նախագահը՝ Իտալիայի հայ համայնքին

Կան պատասխանատուներ, որոնց պարտականությունն է վերլուծել պատերազմի հաղթանակի և պարտության պատճառները։ Այս մասին Իտալիայի հայ համայնքի հետ հանդիպմանն ասել է ՀՀ նախագահ Արմեն Սարգսյանը՝ խոսելով Արցախյան 44-օրյա պատերազմում պարտության, դրա պատճառների մասին:

«2020 թվականը դժվար տարի էր աշխարհի շատ պետությունների համար, սակայն հայերիս համար այն շատ ցավալի էր։ Ցավալի էր, որովհետև երիտասարդ կյանքեր կորցրեցինք։ Պատերազմ էր, որտեղ մենք կորցրեցինք, սակայն չմոռանանք, որ նույն թշնամուն, նույն Ադրբեջանին 90-ականներին հաղթել էինք։ Կասկած չկար, որ մեր մարտիկները հայրենանվեր էին պայքարում իրենց հայրենիքի համար։

Հարցն ուրիշ տեղ էր. 90-ականների սկզբին մենք, երևի, ավելի լավ էինք պատրաստված պատերազմին՝ ներգրավելով մեր հայրենակիցներին, ինչ-որ տեղ առաջ էինք Ադրբեջանից և հաղթեցինք։ Ցավոք, 26 տարում չկարողացանք այդ հաղթանակը վերածել կայուն խաղաղության։ Եվ եղավ երկրորդ պատերազմը, որտեղ ավելի առաջ չէինք թշնամուց։ Ադրբեջանն օգտագործեց իր բնական ռեսուրսները՝ նավթ, գազ, կառուցեց նոր բանակ, օգտվեց Թուրքիայի ուղղակի աջակցությունից։ Եվ այդտեղ հարցը քաջության մեջ չէր, մարտիկների նվիրվածության մեջ չէր, այլ սպառազինության, տեխնիկական առումով մենք հետ էինք։

Այո, շատ մեծ դժբախտություն է, որի հետևանքները մինչև այսօր կան։ Կան գերության մեջ գտնվողներ, անհայտ կորածներ, պատկերացրեք իրենց ընտանքիների վիճակը։ Իմ հանդիպումների ժամանակ ես մեկ անգամ բարձրացրի մեզ հուզող բոլոր դժվարին հարցերը, սահմանային խնդիրներ, գերիների, անհայտ կորածների հարցեր, խնդրեցի Իտալիայի աջակցությունը։ Այո, պարտություն էր, բայց մի բանում վստահ ենք՝ այս ժողովուրդը վերապրող է։ Մենք Եղեռն ենք վերապրել, ոտքի ենք կանգնել , ու դա արել ենք աշխարհով մեկ, վերակառուցել ենք մեր կյանքը։ Ես վստահ եմ՝ բոլորս միասին վերականգնելու ենք մեզ։ Իհարկե, պետք է խոսենք այն մասին, թե ինչը սխալ արեցինք։

Մարդիկ, ովքեր պատասխանատու են, բաց նստեն, քննարկեն, թե ինչպես եղավ, որ չհաղթեցինք այս պատերազմում, ինչպես եղավ, որ 94-ին հաղթեցինք։ Կան պատասխանատուներ, որոնց պարտականությունն է վերլուծել պատերազմի հաղթանակի և պարտության պատճառները։ Ես վստահ եմ՝ ժողովուրդն ունի և՛ կամքը, և՛ ուժը, և՛ հաղթահարելու, վերապրելու եռանդը»,- հայտարարել է ՀՀ նախագահը։