Դուբայի կառավարիչ շեյխը կարգադրել է կոտրել իր նախկին կնոջ եւ նրա փաստաբանների հեռախոսները

Դուբայի կառավարիչ շեյխ Մուհամմեդ բին Ռաշիդ ալ-Մաքթումը հրամայել է կոտրել իր նախկին կնոջ եւ նրա փաստաբանների հեռախոսները՝ երեխաների խնամակալության համար մղվող պայքարում «ահաբեկման եւ սպառնալիքների շարունակական արշավի» շրջանակներում, որոշել է Անգլիայի բարձր դատարանը, հայտնում է Reuters-ը:

Մուհամմեդն օգտագործել է իսրայելական NSO ընկերության մշակած «Պեգաս» բարդ ծրագրակազմը, որպեսզի կոտրի Հորդանանի թագավոր Աբդալլահի խորթ քրոջ՝ արքայադուստր Հայա բինտ ալ Հուսեյնի եւ նրան շրջապատող մարդկանց հեռախոսները:

Նրա մոտ աշխատողները փորձել են նաեւ առանձնատուն գնել բրիտանական մայրաքաղաքի մոտակայքում գտնվող Հեյի կալվածքի հարեւանությամբ: Դատարանը որոշել է, որ ահաբեկման հետեւանքով նա իրեն զոհ է զգացել

Վերջին վճիռները կայացվել են 19 ամիս անց այն բանից, երբ դատարանը եզրակացրել է, որ Մուհամմեդը առեւանգել է իր երկու դուստրերին, դաժանորեն է վարվել նրանց հետ եւ նրանց կամքին հակառակ է պահել իր մոտ: «Եզրակացություններն իրենցից ներկայացնում են վստահության լիակատար չարաշահում են եւ իսկապես լիազորությունների չարաշահում»,- իր դատավճռում հայտարարել է դատավոր Էնդրյու Մաքֆարլեյնը:

Շեյխը հերքել է դատարանի եզրակացությունները՝ հայտարարելով, որ դրանք հիմնված են ոչ լիարժեք պատկերի վրա: «Ես միշտ հերքել եմ ինձ առաջադրված մեղադրանքները եւ շարունակում եմ դա անել»,- ասել է նա իր հայտարարության մեջ:

«Բացի այդ, եզրակացությունները հիմնված են եղել ապացույցների վրա, որոնք չեն պարզաբանվել ոչ ինձ, ոչ էլ իմ խորհրդականներին: Հետեւաբար, ես պնդում եմ, որ դրանք կատարվել են անարդարացի կերպով»:

72-ամյա Մուհամմեդը եւ 47-ամյա Հայան ներգրավված են երկար, դաժան եւ ծախսատար խնամակալական պայքարում այն ժամանակներից, երբ վերջինս փախել էր Մեծ Բրիտանիա՝ իր երկու երեխաների ՝ Ջալիլայի եւ Զայեդի հետ: Նա ասել է, որ վախենում է իր անվտանգության համար այն կասկածների ֆոնին, թե ինքը սիրավեպ է ունեցել իր բրիտանացի թիկնապահներից մեկի հետ:

Հեռախոսները կոտրելու զոհերի թվում է եղել Մեծ Բրիտանիայի Լորդերի պալատի անդամ, Հայայի փաստաբան Ֆիոնա Շեքլթոնը, ով ներկայացրել է բրիտանացի գահաժառանգ արքայազն Չարլզի շահերը՝ նրա նախկին կնոջ՝ արքայադուստր Դիանայի հետ ամուսնալուծության ժամանակ: