Առուշանյանի և իր ընտանիքի միջոցներով, կարճ ժամանակահատվածում, ջոկատն ապահովվեց զրահաբաճկոններով, սաղավարտներով, ինժեներական պարագաներով, կապի միջոցներով. Քոչարյան

44-օրյա պատերազմի ժամանակ ու հետպատերազմական շրջանում Առուշ Առուշանյանի ու նրա ընտանիքի կատարած աշխատանքների, Առուշանյան համայնքապետի ու մարտական ընկերոջ մասին պատմում է Գորիս խոշորացված համայնքի ղեկավարի տեղակալ, փոխգնդապետ Կարեն Քոչարյանը։

-Պարոն Քոչարյան, օրվա խորհրդով մտովի տեղափոխվենք մեկ տարի առաջ․ այս օրերին, երբ հնչեց Առուշ Առուշանյանի մարտական կոչը, որքանո՞վ էր այն Ձեզ համար սպասելի։

- Թե՛ պատերազմական ժամանակներում, թե՛ խաղաղ պայմաններում ես երբևէ որևէ ղեկավարից չեմ լսել այդպիսի ոգեշնչող մարտական կոչ, առավելևս չեմ հիշում, որ համայնքապետն ինքն անձամբ մասնակից լինի մարտական գործություններին։ Առուշ Առուշանյանի` հայրենիքը պաշտպանելու ազգասիրական կոչը և առաջնագծում լինելու պատրաստակամությունը ինձ մոտ մեծ ոգևորություն առաջացրեց և որոշեցի կանգնել երիտասարդ համայնքապետի կողքին։

-Ինչպե՞ս կազմավորվեց Ձեր ջոկատը, ի՞նչ դերակատարում ունեցավ Առուշանյանը ջոկատի կազմավորման գործում։

- Երբ Առուշանյանը հայտարարեց կամավորների հավաքագրման մասին համայնքի երիտասարդ ու ավագ սերնդի ներկայացուցիչները շատ կարճ ժամանակահատվածում համախմբվեցին և կազմավորվեց հայրենասեր գորիսցիներից կազմված ջոկատը, ինչը ևս մեկ անգամ փաստում է Առուշանյանի նկատմամբ նրանց ունեցած վստահության մասին։

- Ճի՞շտ է, որ ընդամենը մի քանի օրվա ընթացքում` Առուշանյանի նախաձեռնությամբ և անձնական միջոցներով ռազմական նշանակության բազմաթիվ պարագաներ են ձեռք բերվել։

- Ջոկատի կազմավորման պահից սկսած` մենք չունեինք ռազմական ապահովման համար անհրաժեշտ որևէ միջոց, բացի հրաձգային զինատեսակներից, սակայն Առուշանյանի և իր ընտանիքի նախաձեռնությամբ և միջոցներով, կարճ ժամանակահատվածում, ջոկատն ապահովվեց զրահաբաճկոններով, սաղավարտներով, ինժեներական պարագաներով, կապի միջոցներով, հագուստով և սննդամթերքով, քնապարկերով և առաջնագծի համար անհրաժեշտ այլ պարագաներով։

-Թույլատրելիի սահմանում խոսենք նաև Ձեր ջոկատի դիրքի, տեղաբաշխվածության և ռազմական խնդիրների կատարման մասին։

- Նահանջի հրամանից հետո՝ հոկտեմբերի 17-ին, հրաման ստացանք անցնել ինքնապաշտպանության։ Ջոկատը ստիպված էր անցնել ինքնապաշտպանության առանց պաշտպանական ենթակառուցվածքների։ Սակայն Առուշ Առուշանյանի կազմակերպչական ունակությունների և հմտությունների շնորհիվ` մեկ գիշերվա ընթացքում գործի դրվեց Առուշանյանների ընտանիքին պատկանող տեխնիկան, կատարվեցին ինժեներական աշխատանքներ և արդեն լուսադեմին ունեինք անհրաժեշտ:

-Գորիսում Առուշանյանին ճանաչում են որպես համանքի ղեկավար։ Հետաքրքիր է` ինչպիսի՞ն էր նա մարտի դաշտում։

-Առուշ Առուշանյանն իր անհանգիստ բնավորության համաձայն` ոչինչ չէր խնայում հայրենիքի պաշտպանության համար։ Լինելով արժանապատիվ ու հայրենասեր սյունեցի` միաժամանակ չէր խառնվում և չէր խանգարում զինվորական հմտություն և փորձ ունեցողներին, սրբորեն կատարում էր նրանց հրահանգները։
Նա տեսակով խիստ հոգատար և անհանգիստ անձնավորություն է, անգամ իր հանգստի ժամերին անհանգստանում էր ջոկատի յուրաքանչյուր անդամի համար։

-Ըստ շրջանառվող լուրերի` բացի ռազմական խնդիրներից, իրականացվել են նաև պաշտպանությունն ամրացնելու աշխատանքներ։ Կմանրամասնեք` ինչի՞ մասին է խոսքը։

-Մինչ օրս շարունակվում է համայնքային և Առուշանյանների անձնական միջոցների ներդրումը` մեր սահմաններում կանգնած զինվորներին անհրաժեշտ պարագաներով ապահովելու, մարտական հենակետերում կատարվող ինժեներական աշխատանքների համար անհրաժեշտ տեխնիկական միջոցների ձեռքբերման գործում։

-Պատերազմի օրերին Գորիսը դարձել էր մեր հայրենիքի պաշտպանության թիկունքը։ Ինչպե՞ս էր Առուշանյանը կազմակերպում թիկունքային աշխատանքները, երբ առաջնագծում էր։

- Առուշանյանը վստահում էր իր թիմակիցներին, որոնք հսկայածավալ աշխատանք էին կատարում թիկունքում։ Երբեմն հասցնում էր նաև կարճ ժամանակով համայնքում լինել, անհրաժեշտ հանձնարարություններ տալ՝ անօթևան դարձած հարյուրավոր փախստականներին ապաստանով ու սննդով ապահովելու, նրանց` դպրոցներում ու նախակրթարաններում տեղավորելու աշխատանքների ճիշտ կազմակերպման ուղղությամբ։ Միաժամանակ նա հասցնում էր զբաղվել մեր զոհված տղաների աճյունների տեղափոխման, վիրավորներին օգնություն ցուցաբերելու, անհրաժեշտության դեպքում նաև Երևան տեղափոխելու հարցերով։

-Այսօր Ձեր մարտական ընկերն անազատության մեջ է։ Ինչո՞ւ։ Որքանո՞վ է արդարացի Առուշանյանի կալանավորումը։

- Իշխանություններն Առուշ Առուշանյանին անարդարացի են զրկել ազատությունից։ Նրա ապօրինի կալանավորումն առաջացրել է Գորիս համայնքի ողջ բնակչության զայրույթը և մեծապես խոչընդոտում է համայնքի հետագա զարգացմանը։

-Առուշ Առուշանյանն առաջադրվել է առաջիկա ՏԻՄ ընտրություններում, որին մասնակցում է «Առուշ Առուշանյան» դաշինքով։ Ինչպե՞ս եք գնահատում նրա հնարավորությունները։

- Անկասկած Առուշ Առուշանյանը չունի այնպիսի մրցակից, որը կարող է ունենալ առավել մեծ վստահություն, քան նա։ Առուշանյանի կատարած աշխատանքները տեսանելի են և մեծ արձագանք են գտել ինչպես մեր համաքաղաքացիների, այնպես էլ քաղաքի այցելուների կողմից։ Նրա ծրագրերը բազմազան են, որոնց իրականացումը յուրաքանչյուր գորիսեցու երազանքն է։

-Եվ վերջում` Ձեր կոչը Գորիս համայնքի բնակիչներին։

-Կոչ եմ անում մեր սիրելի գորիսեցիներին` հոկտեմբերի 17-ին քվեարկել հանուն ուժեղ և բարեկարգ համայնքի։

Հարցազրույցը՝ «Առուշ Առուշանյան» դաշինքի էջից: