Մարզպետ ունենք, որ չգիտի՝ խաղողը վազի վրա է աճում, թե ձմերուկի նման ցանում են․ խաղողագործ
Արմավիրի մարզի խաղողագործներն այսօր՝ սեպտեմբերի 22-ին, բողոքի ակցիա էին իրականացնում կառավարության շենքի առաջ։ Նրանք հանդիպում էին պահանջում վարչապետի կամ փոխվարչապետ Սուրեն Պապիկյանի հետ։
«Գագիկ Ծառուկյանի «Նոյ» մուլտի գրուպը ոլորտի խոշորագույն ներկայացուցիչներից է և իր՝ խաղողը չընդունելը սոցիալական լարվածություն է առաջացնում։ Եթե կառավարությունն իր տեղում լիներ, իմանար իր անելիքները, պետք է պարզեր իր հարաբերությունները խոշորագույն մթերողների հետ վաղօրոք, որ չկանգնենք այս խնդրի առջև։ Խաղողն արդեն փչանում է։ Ես 30 տոննա խաղող ունեմ, որից օրական 500 կգ կորցնում եմ։ Մարդ էլ կա ավելի շատ է կորցնում։ Մենակ մի համայնքում այսօր վեց հազար տոննա խաղող կա։ Մենք գյուղացիներով ազգային անվտանգության խնդիր ենք լուծում՝ պարենային անվտանգության խնդիրը։ Կառավարությունն էլ հայտարարել է, որ խաղողագործությունը գյուղատնտեսության մեջ առաջատար ռազմավարական ճյուղ է»,- լրագրողների հետ զրույցում նշեց ակցիայի մասնակիցներից մեկը։
Խաղողագործը նշեց, որ 2018 թվականին նույնպես այդ խնդիրի առջև էին կանգնած և ճանապարհ էին փակել։
«Այդ ժամանակ Նիկոլ Փաշինյանը եկավ մարզ ու խոստացավ, որ հետայսու որևէ խնդիր չի առաջանալու»։
Արմավիրի մարզի խաղողագործները բողոքում էին նաև խաղող մթերման գնից։
«Խաղողագործը դեռ մարտ-ապրիլ ամսին պետք է իմանա, թե ինչ ծավալի խաղող է հանձնելու, որ գործարարանին է հանձնելու և ինչ գնով։ Այս տարի փոթորիկի նախանշան չկար, ամեն ինչ նորմալ էր։ Ապրիլին կոնյակի գործարանը հայտարարեց մթերման ծավալները, գինն էլ հայտարարեց ցածր՝ 115 դրամ, բայց դրանից հետո խաղողի գինը պետք է աճեր՝ հաշվի առնելով պետական ինֆլացիան պետության վիճակագրական վարչության կողմից ընդունված։ Ինֆլացիան երեք տարիների ընթացքում կազմել է 5-6 տոկոս։ Եթե 2018 թվականին խաղողն ընդունվել է 140 դրամով, ապա հիմա պետք է ընդունվեր 170-ից 180 դրամով»,- նշեց նա։
Խաղողագործների խոսքով՝ իրենք կուսակցական չեն, և իրենց ակցիան էլ չպետք է քաղաքական շահարկման առարկա դառնա։
«Չորս օր առաջ, երբ գործարանի մոտ կանգնել էինք, մի շքեղ ջիպից շատ շքեղ հագնված տղամարդ իջավ և ասաց՝ ինչո՞ւ եք սուսուփուս կանգնել, գործարանը վառեք, դռները ջարդեք։ Մենք չենք ուզում քաղաքական շահարկաման առարկա դառնանք։ Գյուղ չկա, որ զոհ տված չլինի, գյուղացին, որն այսքան զոհ է տվել իրավունք ունի՞ արժանապատիվ ապրելու, թե՝ ոչ, ու այդ արժանապատիվ ապրելու հարցում կառավարությունը դեր ունի՞ թե չունի։ Մարզպետ ունենք, որն արդեն երկու տարի է մարզպետ է ու իմ գյուղի՝ Շենավանի ճանապարհը չգիտի։ Այդ մարդը չգիտի՝ խաղողը վազի վրա է աճում, թե ձմերուկի նման ցանում են։ Բա երկու տարի ժամանակ ուներ, մի օր չմտներ մարզ մեր դարդերն իմանա»,- հավելեց նա։