Այսօր Ազգային ժողովում մտքերի փոխանակման ժամանակ «Պատիվ ունեմ» խմբակցության անդամ Թագուհի Թովմասյանը անդրադարձավ նախընտրական պաստառներին մինչ հիմա փակցված լինելուն

Այսօր Ազգային ժողովում մտքերի փոխանակման ժամանակ «Պատիվ ունեմ» խմբակցության անդամ Թագուհի Թովմասյանը անդրադարձավ նախընտրական պաստառներին մինչ հիմա փակցված լինելուն։

Նա նկատեց, որ գրեթե բոլոր համայքներում շարունակում են նախընտրական պաստառները փակցված մնալ։ Նա հայտնեց, որ օրենսդրական նախաձեռնություն է առաջարկելու, որով կնախատեսվի ընտրություններից մեկ շաբաթ հետո այդ պաստառները քաղաքից մաքրել։

«Շենքերի վրա, բոլոր հնարավոր հատկացված վայրերում շարունակում են մնալ նախընտրական քարոզչական պաստառներ, ընդ որում՝ հիմնականում իշխանական։ Այնպիսի տպավորություն է, որ մարդիկ վախենում են, խուսափում են պաստառները պոկելուց, ինչը նորմալ չէ»,–ասաց նա և նշեց, որ մենք չենք կարող անընդհատ ապրել ընտրական գրոծընթացներով։

Նա պատրաստակամություն հայտնեց հ իր նախաձեռնության շրջանակներում հետագայում աշխատել ԿԸՀ–ի հետ։ «Որպեսզի երկար ժամանակ մարդիկ ստիպված չլինեն հանդուրժել քաղաքական այս կամ այն լիդերի ժպտացող, կամ դժգույն դեմքը, որպեսզի կառուցեն իրենց կյանքը»,–ասաց նա։