Ալիևը դեռևս ուշքի չի գալիս, ոգևորված երեխայի նման նա գտնվում է հաղթական էյֆորիայի տակ, իսկ մենք գիտենք ինչ հետևանքներ են ունենում էյֆորիայի տակ կայացրած որոշումները. Արցախցի քաղաքագետ
Արցախցի քաղաքագետ Ժիրայր Ազիզյանն, ArmDaily.am-ի հետ զրույցում անդրադառնալով Շուշիի կողմից ադրբեջանցիների հրահրած հերթական փոխհրաձգությանն ու անդադար սադրանքներին, ասաց, որ դա նոյեմբերի 9-ի պայմանագրի խախտում է։
«Ադրբեջանական կողմը շարունակում է կոպտորեն խախտել նոյեմբերի 9-ի եռակողմ համաձայնագրի դրույթներն ու հրադադարի պահպանման ռեժիմը` փորձելով ճնշում գործադրելու միջոցով հասնել իր կողմից ընդունելի լուծման տարբերակներին, խոսքը մասնավորապես վերաբերում է իր կողմից առաջարկվող խաղաղության պայմանագրին ու Զանգեզուրի միջանցքին։ Ստեղծված իրավիճակում միակ ռացիոնալ տարբերակը ադրբեջանական սադրանքներին դիմակայելն ու համարժեք պատասխան գործողություններն են, Ալիևի տարածքային աննախադեպ հավակնություններն ու ռազմական հռետորաբանության ուժեղացումը պարզապես այլընտրանք չեն թողնում»,-ասաց Ազիզյանը։
Մեր հարցին, թե արդյոք սա խոսում է հնարավոր նոր պատերազմի կամ լոկալ բախումների հրահրելու փորձի մասին, քաղաքագետն ասաց, որ չի կարծում, թե Ադրբեջանին հիմա ձեռնտու է նոր պատերազմ այս փուլում. «Իրականում չեմ կարծում, թե Ադրբեջանը այդքան շահագրգռված է այս փուլում նոր պատերազմով, քանի որ նախ նա ակնհայտ անհարգալից վերաբերմունքով արդեն իսկ խնդիրներ ունի ռուսական կողմի հետ և հետո պաշտոնական Բաքուն քաջ գիտակցում է սուվերեն պետության տարածքային ամբողջականության խախտման հետևանքները, հատկապես հաշվի առնելով ռուսական կողմի հավանական ակտիվ միջամտությունը։ Իհարկե Ալիևը փորձում է օգտվել պատերազմի արդյունքում Հայաստանի պաշտպանողականության թուլացումից, բայց այնպես չէ, որ ինքը շատ լավ վիճակում է գտնվում, պարզապես սահմանային լարվածության ուժեղացմամբ փորձում է հնարավորինս արագ և սուբյեկտիվ լուծումների հասնել։ Պատերազմի հավանականությունը մեծ չէ, բայց կա և դա պայմանավորված է Ադրբեջանի հավանական սխալներով, Ալիևը դեռևս ուշքի չի գալիս, ոգևորված երեխայի նման նա գտնվում է հաղթական էյֆորիայի տակ, իսկ մենք գիտենք ինչ հետևանքներ են ունենում էյֆորիայի տակ կայացրած որոշումները, Հիտլերի օրինակով տեսել ենք, թե ինչ է պատահում կանգ չառնելու մոլուցքով տառապողների հետ»։
Առավել մանրամասն՝ սկզբնաղբյուր հոդվածում: