Եթե իշխանությանն անվանեմ թշնամի, ԱԺ դահլիճում ուրիշ բան պետք է տեղի ունենա․ Իշխան Սաղաթելյան
ԱԺ նախագահի ընտրության վիճարկման համար դիմում ենք ՍԴ, որովհետև այլ իրրավաբանական ճանապարհ չկա։ Հույս ունենք, որ ՍԴ-ն կմնա իր բարձրության վրա և կկայացնի արդարացի որոշում։ Այս մասին լրագրողների հետ ճեպազրույցի ժամանակ ասաց «Հայաստան» խմբակցության պատգամավոր Իշխան Սաղաթելյանը։
Հարցին, եթե ՍԴ-ն օրինական ճանաչի ընտրությունը, կընդունեն, որ լեգիտիմ է ԱԺ նախագահի ընտրությունը, Սաղաթելյանը պատասխանեց, որ ՍԴ որոշումից հետո հանդես կգան համապատասխան եզրակացությամբ։
«Մենք տեղեկություն ունեինք, որ իշխանությունները դեմ են ԱԺ նախագահի տեղակալի պաշտոնում իմ թեկնածությանը, այդ առումով որևէ բանակցություն չկա մեր և իշխանության միջև։ Մենք չենք կարող բանակցել մի իշխանության հետ, ում օրոք կորցրել ենք Արցախի 75 տոկոսը»։
Հարցին՝ որքանով է արդարացված այն հանգամանքը, որ սահմանային լարվածության ֆոնին ԱԺ-ն քննարկում է ոչ այդքան կարևորություն ունեցող հարցեր, Սաղաթելյանը պատասխանեց․
«Սա մի ընթացակարգ է, որով պետք է անցնենք, պարբերաբար տեսնում եք, որ մեր և «Պատիվ ունեմ» խմբակցության պատգամավորները ցանկացած առիթի դեպքում խոսում են երկրի անվտանգության հարցերից»։
Ինչ վերաբերում է Աժ նախագահի տեղակալի պաշտոնում իրենց ունեցած լծակների օգտագործման մասին, Սաղաթելյանը նշեց․
«Երբ իրենց քաղաքական ղեկավարը գա և այս ամբիոնից մատ թափ տա, անմիջապես կօգվեմ այդ հնարավորությունից և կասեմ այն ինչ պետք է ասեմ։ Վստահ եղեք, որ ես ոչ այդ ծառայողական մեքենայի կարիքը ունեմ, ոչ այդ հարմարավետ սենյակի, ոչ էլ ինձ կոմֆորտ է այդ սենյակում նստել։ Այդ լծակը ծառայելու է մեր օրակարգին»։
Լրագրողի հարցին՝ շարունակում է իշխող մեծամասնությանը անվանել այն բնորոշումներով, ինչը որ արել է անցնող ամիսների ընթացքում, Սաղաթելյանը նշեց․
«Ինչ ես ասել եմ անցնող 8 ամիսների ընթացքում, ամբողջը հաստատում եմ և որևէ բան մեր օրակարգում չի փոխվել։ Բայց, եթե այս սրահում իրենց անվանեմ թշնամի, այդ դահլիճում ուրիշ բան է տեղի ունենալու»։