Yandex տաքսի ծառայությունն այսուհետև կհամագործակցի նաև խուլ ու համր վարորդների հետ (տեսանյութ)
«Վարորդը լսողության խնդիր ունի» գրությամբ նստատեղեր այսուհետև հաճախ կհանդիպեք «Yandex Go» տաքսի ծառայության ավտոմեքենաներում, այս մասին գրում է Tert.am-ը:
Ընկերությունն իր դռներ է բացել խուլ ու համր վարորդների համար, որպեսզի նրանք կարողանանք ամբողջովին ինտեգրվել աշխատաշուկայում:
Ավտոմեքենաներում հնարավոր է գտնել նաև տեղեկություն պարունակող քարտեր, որոնց միջոցով ուղևորն ու վարորդը կկարողանան ավելի արագ շփվել միմյանց հետ երթևեկության ընթացքում:
«Մեր ծրագրում կան բազմաթիվ ֆունկցիաներ, այդ թվում՝ ունենք «չաթի» հնարավորություն վարորդ-պատվիրատուի միջև: Երբ պատվերի ընթացքում պատվիրատուն ինչ-որ խնդրանք ունի, կարող է գրել»,- նշեց «Yandex Go»-ի վարորդների սպասարկման մասնագետ Հարություն Աղանյանը:
Tert.am-ը զրուցել է նաև վարորդներից Վոլոդյա Կիրակոսյանի հետ, որն արդեն 2 ամիս է՝ սեփական մեքենայով աշխատում է «Yandex Go»-ում: Նա ունի 2 փոքր երեխա և ուրախ է, որ արդեն գրանցված վարորդ է, կարող է աշխատել ու պահել իր ընտանիքը:
«Տարբեր մարդիկ են պատահում, որ չեն հասկանում՝ խաչմերուկում կանգնել չի կարելի, խնդրում են՝ կանգ առնել: Այսպիսի թեթև խնդիրներ կան, իսկ ընդհանուր առմամբ՝ գոհ եմ, դժվարություններ չկան»,- նշել է Վոլոդյա Կիրակոսյանը:
Վարորդներից Արման Նազարյանն էլ է նույնը պնդում, շեշտում է՝ նյարդայնացնող գրեթե ոչինչ չկա. «Մարդիկ կան, ասում են՝ գոհ են, որ հանգիստ ես վարում: Նաև ասում են՝ բա որ չես լսում, ապա ինչպես ես կարողանում վարել: Ես էլ պատասխանում եմ, թե ուշադիր եմ, նայում եմ աջ ու ձախ, լուսակիրներին եմ նայում: Զարմանում են, որ կարողանում եմ վարել»,- պատմել է Արման Նազարյանը:
«Yandex Go»-ի վարորդների սպասարկման մասնագետ Հարություն Աղանյանն ասում է՝ տաքսի ծառայության հիմնական խնդիրը վարորդ-պատվիրատու սխալ շփումն է, իսկ այս պարագայում շփումը մինիմալիզացված է. պատվիրատուները գոհ են, հոգատար՝ խուլ ու համր վարորդի հանդեպ, իսկ նրանք էլ իրենց հերթին ունեն բարձր վարկանիշ: