Տոկիո-2020. Հայտնի են Արթուր Ալեքսանյանի և Կարապետ Չալյանի առաջին մրցակիցների անունները (ֆոտո)
Ճապոնիայի մայրաքաղաք Տոկիոյում ընթացող 32-րդ ամառային Օլիմպիական խաղերի հունահռոմեական ոճի ըմբշամարտի մրցաշարում տեղի է ունեցել 77 և 97 կգ քաշային կարգերի վիճակահանությունը: Պայքարը կմեկնարկի օգոստոսի 2-ին:
Գործող օլիմպիական չեմպիոն Արթուր Ալեքսանյանը (97 կգ) 1/8 եզրափակիչում ուժերը կչափի Ղրղզստանի ներկայացուցիչ 25-ամյա Ուզուր Ջուզուպբեկովի հետ: Այդ զույգի հաղթողը քառորդ եզրափակիչում կմրցի կամ կուբացի Ռոսիլիո Քինդի, կամ ֆինն Արվի Սավոլայնենի հետ:
Արթուր Ալեքսանյանն ու Ուզուր Ջուզուպբեկովն այս տարվա հունվարին հանդիպել են Կիևի մրցաշարում:
Արթուր Ալեքսանյանի մրցակիցներից ռուս Մուսա Եվլոևը հայտնվել է մյուս հատվածում: Նրանք կարող են հանդիպել միայն մեդալային գոտեմարտում:
Կարապետ Չալյանի (77 կգ) առաջին մրցակիցը 1/8 եզրափակիչում կլինի աշխարհի առաջնության կրկնակի բրոնզե մեդալակիր (2017, 2019), 27-ամյա իրանցի Մուհամադալի Գերային: Քառորդ եզրափակիչում այդ զույգի հաղթողը կմրցի Բոզո Ստարչևիչ (Խորվաթիա) – Պենա Ֆլորես (Կուբա) գոտեմարտի հաղթողի հետ:
Հիշեցնենք, որ Տոկիո-2020-ի ըմբշամարտի մրցաշարում Հայաստանի հավաքականի առաջին ներկայացուցիչ Արմեն Մելիքյանն օգոստոսի 1-ին հաղթանակով մեկնարկելուց հետո պարտություն էր կրել քառորդ եզրափակիչում: Եթե Արմեն Մելիքյանին հաղթած 31-ամյա ուկրաինացի Լենուր Տիմուրովը նվաճի եզրափակիչի ուղեգիր, հայ ըմբիը հնարավորություն կստանա պայքարել բրոնզե մեդալի համար:
Հունահռոմեական ոճի ըմբշամարտի մրցաշարում Հայաստանի վերջին ներկայացուցիչ Կարեն Ասլանյանը (67 կգ) պայքարի մեջ կմտնի օգոստոսի 3-ին:
Ազատ ոճի ըմբշամարտի մրցաշարում Հայաստանը կունենա 2 մասնակից՝ Արսեն Հարությունյանը (57 կգ) և Վազգեն Թևանյանը (65 կգ):