Էս պահին էլ դաշտում անասունների հետ է. դպրաբակցի Վրեժը գոհ է նոր հովիվից
Նախորդ շաբաթ մեծ աղմուկ էր բարձրացել, երբ Էկոնոմիկայի նախարարի պաշտոնակատար Վահան Քերոբյանը հայտարարել էր, որ Հայաստանում հովիվների պակաս կա, և Դպրաբակ գյուղի բնակիչ Վրեժ Վարդանյանն էլ դիմել է իրեն, որպեսզի հովիվ գտնեն։
Քերոբյանը ֆեյսբուքյան իր էջում հայտնել էր, որ մի երիտասարդ գնացել է Վրեժի մոտ ու աշխատանքի ընդունվել։
ArmDaily.am-ի հետ զրույցում դպրաբակցի Վրեժի որդին՝ Կարոն, հայտնեց, որ գոհ են աշխատողից։
«Էկոնոմիկայի նախարար Վահան Քերոբյանը որ ասել էր պահանջարկ կա հովիվների, էդ հայտարարությունը կարդալով եկել էր աշխատանքի հետևից ընդամնեը։ Էդ հայտարարությունը, ոնց որ իր արդյունքը տվեց։ Նախկինում, եթե չեմ սխալվում, աշխատել է խոզի ֆերմայում էդ տղան, հետո էլ որոշակի խնդիրներ է ունեցել. հայրը, եթե չեմ սխալվում, առողջական խնդիրներ ա ունեցել, գնացել ա հորը խնամելու։ Հետո նորից աշխատանք ա ման եկել ու արդեն տեսել ա այդ հայտարարությունը ու եկել ստեղ»,- պատմեց Կարոն։
Նոր հովիվը Նոյեմբերյանից է, որը Դպրաբակից մոտ 120 կմ հեռավորության վրա է։ Կարոն մեզ ասաց, որ իրենք պահովել են կացարանով հովիվին, և նա այժմ գյուղում է մնում։
Նշենք, որ կայքը ուսումնասիրություն էր արել և պարզել, որ Հայաստանում իրոք հովիվի աշխատանքի կարիք կա, որի համար ֆերմերները առաջարկում են 120-150 հազար դրամ աշխատավարձ։