Ով որքան հարկ է վճարել․ 10 խոշոր հարկատուների հարկային մուտքերի համեմատականները. Armdaily

Armdaily-ն գրում է.

ՀՀ պետական եկամուտների կոմիտեն հրապարակել է Հայաստանի 1000 խոշոր հարկատուների ցանկը 2021 թվականի առաջին կիսամյակի (հունվար-հունիս) արդյունքներով: Այսպիսով՝ հանրապետության 1000 խոշոր հարկատուները միասին այս տարվա հունվար-հունիս ամիսներին պետբյուջե են վճարել 584 մլրդ 440 մլն 174 հազար դրամի հարկեր եւ տուրքեր:

Նախորդ տարվա նույն ժամանակահատվածում հավաքագրվել էին 534 մլրդ 489 մլն 329 հազար դրամ հարկեր եւ տուրքեր: Այսինքն՝ 2021-ի 2-րդ եռամսյակում խոշոր հարկ վճարողների վճարած հարկերը աճել են 49 մլրդ 950 մլն 845 հազար դրամով կամ 9.35 տոկոսով: ՊԵԿ-ը 2021 թվականի հունվար-հունիսի ընթացքում պետական բյուջե է հավաքագրել 750.2 մլրդ դրամ։

Միայն 1000 խոշոր հարկատուները ապահովել են ընդհանուր հարկերի 77.9 տոկոսը։ 2021 թվականի առաջին կիսամյակի ՀՀ ամենախոշոր հարկատուն «Գազպրոմ Արմենիա» ընկերությունն է՝ վճարած 28 մլրդ 445 մլն 853 հազար դրամ հարկերով: 2020 թվականի առաջին կիսամյակում «Գազպրոմը» երկրորդ խոշոր հարկատուն էր՝ վճարած 25մլրդ 830մլն 27 հազար դրամի հարկորով։

Երկրորդ խոշոր հարկատուն այս տարի «Զանգեզուրի պղնձամոլիբդենային կոմբինատն» է՝ վճարած 26 մլրդ 809 մլն 944 հազար դրամի հարկերով: Նախորդ տարի վճարած 22մլրդ 453մլն 423 հազար դրամի հարկերով կոմբինատը երրորդ խորշոր հարկատում է։

Երրորդ խոշոր հարկատուն այս տարի ՀՀ պաշտպանության նախարարության աշխատակազմն է՝ վճարած 25 մլրդ 390 մլն 499 հազար դրամի հարկերով: Նախորդ տարվա նույն ժամանակահատվածում այս հարկատուն վճարել էր 16 մլրդ 479 մլն 293 հազար դրամի հարկ։

Չորրորդ խոշոր հարկատուն «Գրանդ Տոբակո» ընկերությունն է՝ վճարած 12 մլրդ 938 մլն 804 հազար դրամի հարկերով: Նախորդ տարի նույն ժամանակահատվածում ընկերությունը գլխավորում էր 1000 խոշոր հարկատուների ցուցակը՝ վճարած 26 մլրդ 268 մլն 97 հազար դրամի հարկերով։ Սա 1000 խոշոր հարկատուների ցանկի ամաենամեծ անկումն է։

Հինգերորդ խոշոր հարկատուն «Գեոպրոմայնինգ գոլդ» ընկերությունն է՝ վճարած 12 մլրդ 123 մլն 27 հազար դրամ հարկերով: 2020-ի նույն ժամանակահատվածում այս ընկերությունը ավելի շատ հարկ էր վճարել՝ 15 մլրդ 961մլն 924 հազար դրամ։

Վեցերորդն այս տարի «Ինտերնեյշնլ Մասիս Տաբակ» ընկերությունն է՝ վճարած 10 մլրդ 217 մլն 416 հազար դրամ հարկերով: 2020 թվականի առաջին կիսամյակում ըներությունը վճարել էր 9 մլրդ 54 մլն 100 հազար դրամի հարկ։

Յոթերորդ՝ «Թեղուտ» ընկերությունն է՝ վճարած 9 մլրդ 800 մլն 663 հազար դրամի հարկերով։ Անցած տարի այս ընկերությունը ցանկի միայն 18-րդ հորիզոնականում էր՝ վճարած 3 մլրդ 909 մլն 709 հազար դրամի հարկերով։

Ութերորդ խոշոր հորիզոնականում «ՄՏՍ Հայաստանն» է, որը հունվար-հունիսին վճարել են 8 մլրդ 881 մլն 873 հազար դրամի հարկ։ Նախորդ տարվա նույն ժամանակահատվածում այս ընկերությունը վճարել էր 6 մլրդ 675 մլն 128 հազար դրամի հարկ և դուրս էր մնացել առաջին տասնյակից, այն միայն 12-րդն էր։

Իններորդ խոշոր հարկատուն՝ «Սիփիես Օիլ» ընկերությունն է՝ վճարած 6 մլրդ 811 մլն 568 հազար դրամ հարկերով: Նրանց վճարած հարկերը նվազել են՝ անցած տարվա նույն ժամանակահատվածում այս ընկերությունը վճարել էր 9 մլրդ 768 մլն 22 հազար դրամի հարկ։

1000 խոշոր հարկատուների տասնյակը հունվար-հունիսին եզրափակում է Բարսեղ Բեգլարյանին պատկանող «Ֆլեշ» ընկերությունը՝ վճարած 6 մլրդ 345 մլն 493 հազար դրամ հարկերով: Անցած տարի ընկերությունը վճարել էր 7 մլրդ 949 մլն 18 հազար դրամի հարկ։