Էկվադորի բանտերում անկարգությունների հետևանքով զոհերի թիվը հասել է 27-ի․ վիրավորվել է 8 ոստիկան
Էկվադորի Գուայասի և Կոտոպաքսի նահանգներում գտնվող երկու բանտերում տեղի ունեցած անկարգությունների հետևանքով զոհերի թիվը հասել է 27-ի, հայտնում է Al Jazeera լրատվականը։
Նախագահ Գիլերմո Լասոն հրահանգել է «կարգուկանոն հաստատելու նպատակով Էկվադորի բանտերում մոբիլիզացնել բոլոր անհրաժեշտ մարդկային և տնտեսական ռեսուրսները»։
Հայտնի է, որ բանտարկյալներից 19-ը զոհվել են Կոտոպաքսիում, իսկ 8-ը` Գուայասիում, վիրավորների թիվը 57-ն է, այդ թվում՝ 8 ոստիկան, որոնցից մեկը բռնաբարվել է։ Կոտոպաքսիի բանտից փախած բանտարկյալներից 86-ը վերադարձվել են, սակայն փախած բանտարկյալների թիվը հայտնի չէ։
Ինչպես ավելի վաղ տեղեկացրել էինք, իրավապահներին, հատուկ ջոկատայինների աջակցությամբ, միայն մի քանի ժամ անց է հաջողվել վերականգնել վերահսկողությունը Գուայասի և Կոտոպաքսի նահանգներում գտնվող երկու բանտերի նկատմամբ:
Էկվադորի բանտային համակարգը ներառում է 60 բանտ՝ նախատեսված 29 հազար բանտարկյալների համար։ Ըստ երկրի մարդու իրավունքների պաշտպանի՝ 2020 թվականի ընթացքում տեղի բանտերում գրանցվել է 103 սպանություն։