Վրաստանում հուղարկավորել են ԼԳԲՏ երթի ժամանակ ծեծի ենթարկված և օրեր անց մահացած հեռուստաօպերատորին (տեսանյութ, լուսանկարներ)
Թբիլիսիում տեղի է ունեցել ընդդիմադիր «Փիրվելի» հեռուստաընկերության օպերատոր Լեքսո Լաշկարավայի հուղարկավորությունը, որը հուլիսի 5-ին դաժան ծեծի էր ենթարկվել ԼԳԲՏ երթի հակառակորդների կողմից և օրեր անց մահացել: Այս մասին գրում է newsgeorgia.ge կայքը:
Լաշկարավան այն 53 լրագրողներից մեկն էր, որոնք հարձակման էին ենթարկվել հուլիսի 5-ին Թբիլիսիում հայտարարված ԼԳԲՏ երթի ժամանակ: Քաղաքացիական բողոքի ցույցեր են տեղի ունեցել Թբիլիսիում և Վրաստանի այլ մեծ քաղաքներում, լրագրողները համերաշխություն են հայտնել տուժած գործընկերներին և պահանջել վարչապետի հրաժարականը՝ մեղադրելով նրան քաղաքացիների սահմանադրական իրավունքները չպաշտպանելու համար:
Վրաստանի մարզերում հեռարձակվող 10 հեռուստաալիք, ինչպես նաև մի քանի հայտնի ռադիոկայաններ, դադարեցրել են հեռարձակումը` ի հիշատակ օպերատորի. 10 րոպե էկրաններին եղել է «Հանուն Լեքսոյի» հեշթեգով գրությունը:
«Փիրվելի» հեռուստաընկերությունը հեռարձակել է Լեքսո Լաշկարավայի հրաժեշտի արարողությունը. Իոսելիանի փողոցում գտնվող նրա տան մոտ օպերատորները հեռուստատեսային տեսախցիկներով միջանցք են ստեղծել:
Տան մոտ տեղադրվել է Լաշկարավայի լուսանկարը և այն, ինչ մնացել էր նրա տեսախցիկից:
Լեքսո Լաշկարավան մահացել է տանը: Օպերատորը հուլիսի 5-ին Թբիլիսիում տեղի ունեցած անկարգությունների ժամանակ դաժան ծեծի ենթարկվելուց հետո տեղափոխվել էր հիվանդանոց, վիրահատության ենթարկվել և մի քանի օր անցկացրել հիվանդանոցում:
Լաշկարավան 10-ամյա դուստր ուներ:
Հիշեցնենք, որ երկրի ՆԳՆ-ն հաղորդել էր, որ օպերատորի մահը կարող էր վրա հասած լինել թմրանյութերի չարաշահումից: Լաշկարավայի մերձավորներն ու նրա գործընկերները հերքել են այս մեղադրանքները: