«Պատիվ ունեմ» և «Հայաստան» դաշինքների՝ մանդատները վերցնելու դեպքում խորհրդարանում կտեսնեք բոլորովին այլ ընդդիմություն, քան ԲՀԿ-ն և ԼՀԿ-ն էին. Թեհմինա Վարդանյան (տեսանյութ)
Դեռևս չկա որոշում՝ «Պատիվ ունեմ» դաշինքը կվերցնի՞ մանդատները, թե՞ ոչ, բայց պետք է մտածենք մեր ընտրողների և հատկապես գործող իշխանությանն ընտրած մարդկանց մասին, որոնք մեծամասամբ մոլորյալներ են և հավատացել են Փաշինյանին. զարմանալի է, որ այսքանից հետո Փաշինյանին ընտրողներ են եղել, բայց նրանք ևս մեր երկրի քաղաքացիներ են: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Պատիվ ունեմ» դաշինքի և «Հայրենիք» կուսակցության անդամ Թեհմինա Վարդանյանը:
«Երևանի ավագանու «Լույս» խմբակցությունն ունի ընդամենը երեք մանդատ, բայց մեր այնտեղ լինելն օգտակար է։ Օրենքներ անցկացնելու հարցում ամեն ինչ չէ, որ լինելու է ըստ մեր պատկերացրածի։ Փաշինյանը վերջին երեք տարում ընդհանրապես չի փոխվել և հետայսու էլ չի փոխվելու, որքան էլ թախանձագին ելույթներ է ունենում։ Խորհրդարանի պատկերն էապես այլ է լինելու, եթե մենք և մյուս ընդդիմադիր դաշինքը մտնենք խորհրդարան»,- ասել է քաղաքական գործիչը:
Ըստ Վարդանյանի՝ ԲՀԿ-ն և ԼՀԿ-ն՝ իբրև ընդդիմություն, մի շարք կոպտագույն բացթողումներ են թույլ տվել, ինչի արդյունքում անգամ անցողիկ շեմը չհաղթահարեցին. «Իրական ընդդիմադիր ուժերին խանգարեցին մանր և իրենց ընդդիմադիր համարող ուժերը։ Անգամ ընդդիմադիր դաշինքներն իրար խանգարեցին։ Երբ ՀՀԿ-ն և «Հայրենիքը» վրանների տակ պայքարում էին, այլ ընդդիմադիր ուժեր իրենց քարոզարշավին էին նախապատրաստվում։ Մենք քարոզարշավն սկսեցինք չափազանց ուշ, քանի որ կարծում էինք՝ հարցը կարելի է լուծել այլ եղանակով»:
Ընդդիմադիր գործչի կարծիքով՝ հետընտրական փուլում հեշտ է մեղքը բարդել ընդդիմադիրների չմիավորման հանգամանքի վրա. «Օրեցօր և ժամառժամ իրավիճակ է փոխվում, տեսնում ենք բազմաթիվ ընտրատեղամասերում վերահաշվարկի արդյունքը։ Ընդդիմադիրներս հայտարարել ենք, որ մենք պայքարելու ենք յուրաքանչյուր քվեի համար ցանկացած մեխանիզմով՝ ՍԴ, տեղամասերում վերահաշվարկներ և այլն։ Այս ամենի արդյունքում էլ մանդատների հետ կապված վերջնական որոշում կկայացվի»:
Թեհմինա Վարդանյանի պնդմամբ՝ ԱԺ դահլիճ մուտք գործելուց հետո ընդդիմադիր խմբակցությունները պետք է ծառայեն ընդհանուր նպատակի և արդարացնեն իրենց ընտրողների քվեները. «Պայքարելու ենք իշխանության բերած տարբեր խառնիճաղանջ նախագծերի և վարքուբարքի դեմ՝ համագործակցելով «Հայաստան» դաշինքի հետ։ Հայաստանի և աշխարհի պատմության մեջ չկա որևէ դեպք, որ կապիտուլյանտ ղեկավարը վերընտրվի։ Հանրային համերաշխության մթնոլորտ չկա ընդդիմադիրների և իշխանության միջև»:
«Պատիվ ունեմ» դաշինքի անդամի պնդմամբ՝ ընտրության արդյունքները կանխատեսելի չէին, թեև վերջին երկու-երեք օրերին ընդդիմադիրների նկատմամբ բռնաճնշումները տալիս էին նման ելքի հիմքեր: «Ե՛վ մեզ, և՛ մյուս ընդդիմադիր դաշինքին ընտրել են, որ չընտրեն Նիկոլ Փաշինյանին և նրա կցորդ քաղաքական ուժերին։ Մենք ի վերջո որոշում կայացրինք մասնակցելու այս ընտրությանը, քանի որ այլընտրանք չկար։ Փաշինյանն սկսել է պողպատ ճոճել, բայց ժողովրդին ժանգոտ ժեշտի առաջ է կանգնեցնելու»,- ամփոփել է Թեհմինա Վարդանյանը: