Իրականում ինչ տեսանյութ է տարածվում Սամվել Բաբայանի մասնակցությամբ (տեսանյութ)

Համացանցում ակտիվորեն տարածվում է մի տեսանյութ, որը ըստ վերնագրերի՝ արված է Ստեփանակերտում՝ բունկերում, պատերազմի ժամանակ:

Տեսանյութում քննարկվում է Շուշիի պաշտպանության օպերացիան, և հասկանալի է դառնում, որ այն ղեկավարել է Սամվել Բաբայանը:

ArmDaily.am-ի հետ զրույցում Սամվել Բաբայանի «Ազատական» կուսակցության խորհրդի անդամ Արամ Ղալչյանը հայտնեց՝ տեղյակ չեն, թե ում կողմից է այն տարածվել համացանցում, բայց այդպիսի տեսանյութի գոյության մասին տեղյակ են։

«Այդ տեսանյութը մեր կողմից տրամադրվել է նախաքննական մարմին, բայց թե դա ով է գցել համացանց և դա տարածում, չգիտենք։ Տեսանյութը արված է Շոշ գյուղում, դա նոյեմբերի 5-ի երեկոյան 20։00-ն է, երբ պարոն Բաբայանը փորձում էր կազմակերպել էն գործողությունը, որով Շուշի ներթափանցած ադրբեջանական զորքերի թիկունքը պետք էր կտրել։ Դա միակ արդյունավետ եղանակն էր, որը կկանխեր Շուշիի անկումը։ Այդ պայմաններում երեք գումարտակ էին ներգրավված, գիշերը ժամը 2-3-ին գումարտակները հրաժարվում են մարտական առաջադրանքը կատարել և արդյունքում առավոտյան Շուշին վերջնականպես ընկնում է։ Այն, որ պիտի ամբողջը կյանքի կոչվեր, ծրագիրը կար, համապատասխան պարզաբանումները զորքին, հրամանատարներին ներկայացվել էր, խնդիրը դրված էր, ընդամենը պետք էր կատարել դա։ Բայց եկեք ու տեսեք, որ ռազմական ղեկավարությունը իր մեջ այդքան ուժ ու կամք չգտավ, որ այդ ծրագիրը կյանքի կոչեր»,- ասաց Ղալչյանը։

Ստորև ներկայացնում ենք ձայնագրության սղագրությունը:

Սամվել Բաբայան – Այստեղ քարտեզի վրա նշիր, այստեղ ականապատ դաշտ է, մերոնք են դրել, չգնաք այդ ականապատ դաշտի վրա պայթեք:

– Սղնախը անցա՞ծ:

– Սղնախից անց:

Սամվել Բաբայան – Այո, Սղնախն արդեն անցնում ես, դրա տակ, Սղնախի էս կողքով գալիս ես այստեղ: Դրանից այս կողմ, կիլոմետր-կիլոմետր ու կես դեպի Քիրսը: Ունե՞ք ճանապարհ, որով փայտ էիք հանում, չգիտեմ ինչ էիք անում, ճանապարհ ունե՞ք:

– Այո, կարյերով, կարյերի մոտով:

Սամվել Բաբայան – Դա է, հենց այդ ճանապարհը պետք է փակվի: Այս հետևում նստած ժողովուրդը, որ դու գնաս հարձակման, արդեն դառնալու են ավտոմատ ռեզերվ:

Ուրեմն խնդիրը հետևյալն է: Արդեն հակառակորդը Շուշին շրջափակել է: Վաղվա մեր գործողությունից կախված է ամբողջ Ղարաբաղի ճակատագիրը: Կարողանո՞ւմ եք հասկանալ, թե ինչ եմ ասում: Այսինքն՝ որևիցե մի րոպե հապաղել կամ պրոբլեմներ ստեղծել չկա: Ինչ խնդիր որ ստացել եք, ամեն մարդ իր խնդիրը կատարում է: Որ հակառակորդի թիկունքը փակվի, սնուցման մեխանիզմը փակվի, հակառակորդին կարողանանք ոչնչացնել: Հակառակ դեպքում մենք պիտի այստեղից դուրս գանք ուղիղ Երևան, ասենք՝ Ղարաբաղ, ցտեսություն, հողերը տանք, գնանք: Դեռ հարց է՝ ադրբեջանցին թողնո՞ւմ է, որ մեր զորքերը, ժողովուրդը հանենք: Այսինքն՝ էս օպերացիան ձևական չի:

Ասես տանկս փչացել է, էլեկտրոնիկան լավ չի աշխատում, ընկավ փոսը… Էդ էկիպաժների հետ բոլորդ խոսեք: Հետևակը նույն ձևի, բոլորը՝ հստակ: Արագությունը մեր գլխավոր խնդիրն է: Արագ զբաղեցնել էն դիրքերը, որը պետք է: Եղա՞վ: Առավոտ մի րոպե մեկը չուշանա: 6-ին արդեն ելման դիրքում ենք: Մի ժամ նստում եք, դիրքերը նայում եք, որտեղ, ինչ, կողմնորոշվում, 7-ին արդեն ճեղքումը սկսվում է: Արտիլերիան մի 15 րոպե աշխատելու ա, շուտ բացի, որ մտնելու ենք հարձակման: Հասկացա՞նք իրար: Իրար ման չենք գալու՝ գտնենք: Հեռախոս, բան, իրար հետ փոխանակե՞լ եք բոլորդ:

–Այո:

Տարածվել է Շուշիի պաշտպանության օպերացիայի քննարկումը բունկերում. Մանրամասները ներկայացնում է Սամվել Բաբայանը